Фото - Saikhan.mn

“Бээжин-2022” өвлийн олимпын наадмын талаар Ши Жиньпиний хэлсэн үгс

dorj — Fri, 07 Jan 2022 07:06:55 +0800

Өвлийн олимпын XXIV наадам БНХАУ-ын нийслэл Бээжин хотноо эхлэхэд нэг сарын хугацаа үлдээд байна.

Тус улсын дарга Ши Жиньпин мягмар гарагт Бээжингийн өвлийн олимпын наадмын бэлтгэл ажилтай танилцах үеэрээ "Спорт бол хүмүүсийн эрүүл мэндийг сайжруулах чухал хэрэгсэл, эдийн засаг, нийгмийн хөгжлийн чухал хөдөлгөгч хүч бөгөөд улс орны соёлын чадавхыг харуулах чухал талбар юм” гэж хэлжээ.

Тэрбээр өнгөрсөн хугацаанд Бээжингийн өвлийн олимпын наадмын бэлтгэл ажилтай хэд хэдэн удаа танилцсан бөгөөд "гайхамшигтай олимпын наадам” үзүүлэхээ дэлхий нийтэд амласан юм. Ингээд "Бээжин-2022” өвлийн олимпын наадмын талаар түүний хэлсэн үгнээс онцлох эшлэлийг хүргэе.

Спорт нь хүн ардын эрүүл мэндийг сайжруулаад зогсохгүй өөр өөр улс орны ард түмэн хоорондын харилцан ойлголцлыг бэхжүүлдэг. Эв нэгдэл, найрамдал, энх тайван гэх мэт олимпизмын үзэл санаа Хятадын ард түмний зүрх сэтгэлд гүн гүнзгий оршдог.
Хятад улс өвлийн олимпын наадмыг зохион байгуулснаар Хятадын 300 сая иргэн өвлийн спортоор сонирхон хичээллэх үндэс суурь тавигдах бөгөөд ингэснээрээ олон улсын олимпизмын үйл хэргийн хөгжил дэвшилд ихээхэн хувь нэмэр оруулах болно.
"Бээжин-2022” өвлийн олимпын наадмыг зохион байгуулах гол зорилгуудын нэг нь Хятадын өвлийн спортын хөгжлийг хурдасгах, спортод бүх нийтийн оролцоог нэмэгдүүлэх юм.
Хятад улс дэлхий нийтэд ногоон, хүртээмжтэй, нээлттэй бөгөөд авлигаас ангид Өвлийн олимпын наадмыг үзүүлэхийн төлөө уйгагүй зүтгэнэ.
Өвлийн олимп болон паралимпын наадмыг зохион байгуулах нь Хятадын Коммунист нам болон Хятад улсын хувьд чухал ажил бөгөөд Хятад улс олон улсын хамтын нийгэмлэгт өгсөн амлалтаа биелүүлж буй хэрэг юм.
Бүх тал энэ өвлийн олимпын наадамд идэвхтэй оролцож, цар тахлын нөлөөг даван туулж, олимпын наадам аюулгүй бөгөөд амжилттай болно гэдэгт бид бүхэн итгэлтэй байна.
Дэлхий дахинд гайхамшигтай олимпын наадмыг үзүүлэхийн төлөө Хятад улс чадах бүхнээ хийх болно. Дэлхий дахин тэр чигтээ Хятад руу харж байна, Хятад улс бэлэн.

"Бээжин-2022” өвлийн олимпын наадам нь хоёрдугаар сарын 4-20-нд болох бол Өвлийн паралимпын наадам нь гуравдугаар сарын 4-13-нд болно.

Зохион байгуулагчдынх нь мэдэгдсэнээр, "Бээжин-2022” өвлийн олимпын тэмцээн уралдаанууд болох байгууламжууд нь бүгд сэргээгдэх эрчим хүчний эх үүсвэр ашиглах бөгөөд үүгээрээ урьд урьдын олимпын наадмуудаас онцлогтой юм.

Энэ удаагийн өвлийн олимпын наадамд дэлхийн 2892 тамирчин биаталон, бобслей, кёрлинг, мөсөн хоккей, лүж буюу тобагган чарга, тэшүүр, цанаар гулгах гэсэн спортын долоон төрлийн 109 тэмцээн уралдаанд хурд хүч, авхаалж самбаагаа сорино.

Токиогийн Олимпод өрсөлдсөн тамирчдын онцлох гэрэл зургууд....

dorj — Thu, 12 Aug 2021 04:30:47 +0800

Токиогийн Олимпын наадмын үеэр гэрэл зургийн дуранд буулгасан тамирчдын сонирхолтой агшнуудыг Их Британийн "BBC Sport” сувгийн онцлон сонгосноор та бүхэнд танилцуулъя.

Долоодугаар сарын 26: Их Британийн тамирчин Том Дейли эрэгтэйчүүдийн 10 м тавцангаас үсрэх хосын төрөлд өөрийн оролцож буй дөрөв дэх Олимпын наадмаас алтан медаль хүртсэний дараа

Наймдугаар сарын 7: БНХАУ-ын тамирчид Олимпын 15 дахь өдөр уран сайхны сэлэлтийн төрөлд үзүүлбэрээ үзүүлж буй нь

Долоодугаар сарын 27: Бразилын тамирчин Итало Феррейра хагас шигшээ тэмцээний үеэр давлагаан дээр гулгаж буй нь

Наймдугаар сарын 2: Катарын тамирчин Мутаз Эсса Баршим, Италийн тамирчин Жанмарко Тамбери нар эрэгтэйчүүдийн өндрийн харайлтын төрөлд хамтдаа алтан медаль хүртсэн нь

Наймдугаар сарын 4: Өмнөд Африкийн тамирчин Эрин Стеркенбург, БНСУ-ын тамирчин Со Чэхён нар Олимпын 12 дахь өдөр эмэгтэйчүүдийн спорт авиралтын төрөлд өрсөлдөж буй нь

Долоодугаар сарын 30: Их Британийн тамирчин Бетани Шрайверыг дугуйн "BMX” төрөлд алтан медаль хүртсэнийх нь дараа түүний нутаг нэгт тамирчин Кай Уайт өргөн явж буй нь

Долоодугаар сарын 31: Их Британийн тамирчид Жеймс Гай, Адам Пити, Кэтлин Доусон нар 4х100 метрийн буухиа холимог сэлэлтийн төрөлд алтан медаль хүртсэнээ мэдэж буй нь

Наймдугаар сарын 3: Норвегийн тамирчин Карстен Уорхольм 400 метрийн саадтай гүйлтийн төрөлд алтан медаль хүртэж, дэлхийн дээд амжилтыг шинэчлэн тогтоож буй нь

Наймдугаар сарын 7: Израилын тамирчин Линой Ашрам Олимпын 15 дахь өдөр "Ariaka” гимнастикийн хүрээлэнд ганцаарчилсан үзүүлбэрээ үзүүлж буй нь

Наймдугаар сарын 4: Скай Браун скейтбордингийн төрөлд хүрэл медаль хүртсэнээр Их Британийн хамгийн залуу Олимпын медальтан болж буй нь

Наймдугаар сарын 3: Америкийн тамирчин Симона Байлз өөрийн өрсөлдсөн төрөлдөө хүрэл медаль хүртсэн мөчөө дасгалжуулагч Сесиль Ландитайгаа хуваалцаж буй нь

Долоодугаар сарын 25: Польшийн тамирчин Дамиан Дуркач ОХУ-ын Олимпын хорооны тамирчин Габиль Мамедовыг буулган авсныхаа дараа

Долоодугаар сарын 26: Америкийн тамирчин Кевин МакДауэлл триатлоны эрэгтэйчүүдийн ганцаарчилсан төрөлд өрсөлдөхөөр үсэрч буй нь

Долоодугаар сарын 22: Японы тамирчин Хитоми Хатакеда тэмцээндээ оролцохоосоо өмнө бэлтгэл хийж буй нь

Долоодугаар сарын 26: Их Британийн тамирчин Томас Пидкок Швейцарын тамирчин Матиас Флюкигерийг Изү ууланд хошуучлан явж буй нь

Долоодугаар сарын 30: Өмнөд Африкийн тамирчин Жулиа Винсент эмэгтэйчүүдийн 3 метрийн трамплины төрөлд оролцож буй нь

Наймдугаар сарын 1: Америкийн тамирчин Рэйвен Сондерс Олимпын найм дахь өдөр эмэгтэйчүүдийн бөөрөнцөг түлхэлтийн төрөлд өрсөлдөж буй нь

Охидууд яагаад амьдралаа бусниулдаг вэ?

dorj — Tue, 09 Oct 2018 15:27:29 +0800

Хэрвээ бүсгүй та одоо ганц бие байгаа бол, эсвэл ямарваа нэгэн дотно харилцааг үүсгэж, ирээдүйн ханиа сонгохоор зэхэж байгаа бол энэ мэдээллийг унишихад илүүдэхгүй. Учир нь охид, бүсгүйчүүд дараах нийтлэг алдаануудыг гаргадгаас болж амьдрал нь баяр баясгалангүй, тухгүй болдог байна.

1. Нойтон хамуу шиг наалдах

Хэрвээ чи хайртай хүндээ нойтон хамуу шиг наалдаад байх юм бол найз залуу чинь чамаас залхах болно шүү. Тиймээс тэрээр хувь хүн байхаа больж, харин найз залуугийнхаа үргэлжлэл нь болж буй мэт санагдана. Ингээд л хайртай хүн чинь зайгаа барьж эхлэх болов уу.

2. Өмчлөх

Найз залуугаа өөрийн болгоод өмчилчихсөн мэт хандаж, зөвхөн чамтай л байх ёстой мэтээр хандвал бага багаар найз залуу чинь өөрөө ч мэдэхгүй чамаас хөндийрөх болно. Үүнээс болоод та хоёрын дунд байнгын хэрүүл маргаан үүсэж, харилцаа чинь төдийлөн таатай биш байх болов уу.

3. Уучлал гуйж чаддаггүй

Эмэгтэй хүн уужуу ухаантай, хүлцэнгүй байж чадвал харилцаа чинь урт хугацааны турш үргэлжилж болох юм. Хамгийн гол нь өөрийн алдааг ойлгож, хайртаасаа уучлал гуйж чаддаг байх нь та хоёрын харилцаанд зайлшгүй байх шаардлагатай нэг зүйл юм.

4. Уйланхай
Уйланхай охидууд байнга л ямар нэгэн юманд гомдоллож, үргэлж л уйлж байдаг. Энэ нь та хоёрын харилцаанд сөрөг үр дагаварыг авчрах нь мэдээж.

5. Өөртөө итгэлгүй
Юу хүсэж байгаагаа мэдэхгүй эмэгтэй бол найз залуудаа ч запас хувилбараар хандсан байж болно. Хэрвээ хэн нэгэн найз залуугаас нь илүү мэт санагдвал тэрээр шууд л салж чадна.

6. Шаардлага өндөртэй, давамгайлагч
Эр нөхрөөсөө үргэлж ямар нэгэн зүйл хүсч, "ийм байх" ёстой хэмээн тулгах нь тохиромжгүй юм. Ихэнхи эрчүүд түрэмгий бүсгүйчүүдэд дургүй байдаг.

7. Зөрүүд
Хүн бүр өөрийн гэсэн бодолтой байдаг. Гэхдээ л зарим тохиолдолд бүсгүйчүүд маань өөрсдийн үзэл бодлоо буруу байсан ч зөв хэмээн тулгаж, зөрүүдлэх нь ирээдүйн харилцаанд муугаар нөлөөлнө.

8. Тагнуулч

Зарим охид байнга л найз залуугийнхаа утсыг үзэж, мэссеж, дуудлага бүрийг нь шалгаж, байнга ямар нэг зүйлийг асууж шалгааж байдаг. Хэрвээ та хоёр нэг нэгэндээ итгэдэг л бол энэ тийм ч таатай зүйл биш шүү.

9. Өөрийн бодолгүй

Яагаад ч юм ийм эмэгтэй нэг талаас үнэхээр тохиромжтой мэт санагдана. Тэрээр найз залуугийнхаа хэлсэн болгоныг дэмжиж, хүлээн зөвшөөрдөг. Харилцаанд нь ямар нэг зүйл таалагдахгүй байсан ч тэрээр бүхнийг хүлээн зөвшөөрснөөр эцэст нь бүх зүйл нурж, үгүй болдог.

10. Зодоонч эмэгтэй
Ийм төрлийн эмэгтэйчүүд маш огцом ууртай байдаг. Хэрвээ тайван сайхан амьдралыг хүсэж байвал бүсгүй та зангаа тэвчихээс өөр аргагүй.

11. Хэт задгай
Эдгээр охид хэн нэгэнтэй харилцаатай байсан ч бусадтай сээтэгнэж байдаг. Хэсэг хугацааны дараа энэ асуудал үнэхээр төвөгтэй мэт санагдаж, та хоёрын харилцаанд асуудал үүсэх болно.

Гадаадын иргэдийн эд зүйлсийг хулгайлдаг бүлгийг илрүүлжээ

dorj — Tue, 09 Oct 2018 15:25:33 +0800

Нийслэлийн цагдаагийн газрын Мөрдөн шалгах газрын Хулгайлах гэмт хэрэгтэй тэмцэх хэлтсийн алба хаагчид нийслэлийн төвийн дүүргүүдийн нутаг дэвсгэрээр явж гадаадын иргэдийн цүнх, халааснаас гар утас, эд зүйлийг нь хулгайлдаг бүлэг этгээдүүдийг илрүүлэн шалгаж байна.

М нарын дөрвөн этгээд нь төрсөн ах дүү нар болон хамаатан садны холбоотой бөгөөд өмнө нь халаасны хулгайн хэргээр удаа дараа шалгагдаж, ял шийтгэгдэж байжээ. Уг хэрэгт ченж А гэгчийг холбогдуулан шалгаж байгааг ч албаны эх сурвалж хэлж байна.

Бямба гарагт бүх нийтээрээ мод тарина

dorj — Tue, 09 Oct 2018 15:24:27 +0800

Монгол Улсын Ерөнхийлөгчийн 2010 оны 04 дүгээр сарын 14-ний өдрийн 63 дугаар Зарлигийн дагуу жил бүрийн 5,10 дугаар сарын хоёр дахь долоо хоногийн Бямба гарагийг бүх нийтийн мод тарих үндэсний өдөр болгосон билээ.

Иймд Баянзүрх дүүргийн ЗДТГ-аас дүүргийн нутаг дэвсгэрийн ногоон байгууламжийг нэмэгдүүлэх, нөхөн сэргээх, агаарын бохирдлыг бууруулах, байгаль орчноо хамгаалах үйлсэд хүн бүрийн оролцоог нэмэгдүүлэх зорилгоор мод тарих үндэсний өдрийг ирэх Бямба гарагт зохион байгуулах гэж байна.

Мод тарих үндэсний өдрөөр Засаг даргын Тамгын газрын дотоод хэлтэс, албад Баянзүрх хайрханы өвөрт мод, бут, сөөг тарих бол дэргэдэх хэлтэс албад, Ерөнхий боловсролын сургууль, эмнэлэг, цэцэрлэгүүд өөрийн эзэмшлийн талбайд тарих юм. Иймд дүүргийн нутаг дэвсгэрт үйл ажиллагаа явуулж буй иргэн аж ахуй нэгж байгууллагууд мод тарих үндэсний өдөрт идэвхтэй оролцоно уу хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

Хайлаастын уулзвараас Дарь-Эх хүрэх замын ажил үргэлжилж байна

dorj — Tue, 09 Oct 2018 15:23:53 +0800

Хайлаастын уулзвараас Дарь-Эхийн зам хүртэл 1.4 км авто зам, 57 у/м төмөрбетон гүүрийн барилгын ажил үргэлжилж байна. Тус автозамын трассд нийт 105 нэгж талбар байгаа бөгөөд 101 нэгж талбарт иргэдтэй зөвшилцөж, газрыг чөлөөлжээ. Үлдсэн 4 нэгж талбарын өмчлөгч, эзэмшигчтэй зөвшилцөж байна.

Өнөөдрийн байдлаар тухайн ажлын хүрээнд 57 у/м гүүр, 2 цэгт ус зайлуулах хоолойн ажил хийгдэж дууссан бөгөөд цахилгааны шугам, цэвэр усны шугамын шилжүүлэг, 2 уулзварт гэрлэн дохио суурилуулах, авто замын гэрэлтүүлгийн угсралт, борооны ус зайлуулах далд шугам болон авто замын барилгын ажил үргэлжлэн хийгдэж байна.

Тус авто замын зорчих хэсгийн өргөн 14м, 4 эгнээ хатуу хучилттай, 2 талдаа 1м өргөн ногоон байгууламж, 2.25м өргөн явган хүний зам, гэрэлтүүлэг, борооны ус зайлуулах шугамтай иж бүрэн авто зам байх бөгөөд хотын төвийг тойрсон гол гудамж зам байх ба ачаа тээврийн үндсэн урсгалыг өнгөрүүлэх ач холбогдолтой юм.

Авто замын барилгын ажлыг "Мотор Сервис” ХХК гүйцэтгэж байна.

ГЭГЭЭН ХАЙРЫН ӨДӨРТ ЗОРИУЛСАН "ТУСГААР ТОГТНОСОН ИНЭЭД" ШОУ ТОГЛОЛТ ҮЗЭГЧДИЙН ХҮСЭЛТЭЭР ТА БҮХЭНДЭЭ ХҮРЭХЭД БЭЛЭН БОЛООД БАЙНА.

dorj — Thu, 25 Jan 2018 07:04:47 +0800

Х.Баттулга: Би амлалтаа мартаагүй

dorj — Thu, 25 Jan 2018 04:44:48 +0800

Монгол Улсын Ерөнхийлөгч Х.Баттулга орон нутгийн иргэдтэй хийх уулзалтаа өнөөдөр Хэнтий аймгийн Чингис хотоос эхлүүллээ.

Төрийн тэргүүнийг аймгийн ИТХ-ын дарга Л.Батсайхан, Засаг дарга Н.Ганбямба нар угтан, Аймгийн засаг даргын Тамгын газрын дэргэдэх Чингисийн талбайд "Чингис” цэргийн хүрээ жагсаж, хүндэтгэн угтлаа.

Ууган дөрвөн аймгийн нэгд тооцогддог Хэнтий аймгийн хүн ам 2017 оны эцэст 76 мянга гаруй болж нэмэгдсэн бөгөөд 50.5 хувь нь эрэгтэйчүүд юм байна. Мөн тус аймгийн хөдөлмөр эрхлэлтийн газарт 800 орчим хүн ажил хайж бүртгүүлсэн байгаагийн 52.3 хувь нь 15-35 хүртэлх насны залуус гэв. Мөн Хэнтий аймгийн хэмжээнд иргэн, аж ахуйн нэгжүүд нь 144.1 тэрбум төгрөгийн өртэй, түүнээс чанаргүй зээлийн хэмжээ нь хоёр тэрбум, 10 сая төгрөгт хүрсэн байна. Арилжааны дөрвөн банк тус аймгийн иргэдэд 50 гаруй нэр төрлийн зээлийг 5-36 хувийн хүүтэй олгож байгаа статистик гарчээ.

Түүнчлэн аймгийн хэмжээнд 2017-2018 оны өвөл 18 сумын 88 багийн 7.2 мянган малчин өрх 4.8 сая малтай, хонин толгойд шилжүүлснээр 8.2 сая толгой мал өвөлжиж байна. Мөн отроор гадны нийт зургаан аймгийн 102 өрхийн 93375 толгой мал өвөлжиж байгаа юм байна. Он гарсаар 38 хэм хүртэл хүйтэрч байгаа тул малын хэвтэр хөлдөх, хээл хаях явдал ихсэж, өнөөдрийн байдлаар 215 үхэр, 562 хонь, 641 ямаа нийт 1478 толгой мал хорогджээ.

Эдгээр мэдээлэлтэй танилцсаны дараа Монгол Улсын Ерөнхийлөгч Х.Баттулга Хэнтий аймгийн иргэдтэй "Хан Хэнтий” чуулгын байранд уулзлаа.Төрийн тэргүүн уулзалтыг нээж хэлсэн үгэндээ:

-Хэнтий нутгийн та бүхэнд энэ өдрийн мэнд хүргэе. Сонгуулиас хойш зургаан сарын хугацаа өнгөрсөн байна. Ерөнхийлөгчийн хувиар анхныхаа уулзалтыг Хэнтий нутгийн зон олон та бүхэнтэй хийж байна. Та бүхэн санаж байгаа байх, сонгуулийнхаа анхны уулзалтыг мөн Хан Хэнтий нутагт хийж байлаа. Би энд ирэхээсээ өмнө Улаанбаатар хотын долоон дүүргийн иргэдтэй уулзсан. Ард түмний амьдрал ямар байна, төр засгаас, УИХ-аас юу хүсэж байна вэ, гэдэг талаас нь уулзаж, ярилцсан. Орон нутагт ч гэсэн адилхан иргэдээ сонсоно гээд уулзалтыг эхлүүллээ.

Хэнтий аймгийн Хэрлэн сумын 4-р багийн иргэн Төмөртогоо:

-Сонгуулийнхаа бүрэн эрхийн хугацаанд ард түмэнтэйгээ амь нэг, эв нэгдлийг илэрхийлсэн Ерөнхийлөгч байгаарай гэж хүсэж байна. Иргэдийн өр, зээл дарах асуудлыг та ярьж байгаа. Нэгэн зэрэг бүх өрийг дарахад эдийн засгийн нөхцөл байдал хүнд гэдэг нь ойлгомжтой. Үүний зэрэгцээ 300 мянган төгрөгийн тэтгэвэр авагчдын дийлэнх нь өр зээлтэй байгаа. Тэр дундаа 24-36 сарын зээлтэй ахмадууд 500 мянгаас доош төгрөгийн зээлтэй байдаг юм. Хөгшид энэ зээлийг өөрсдөө тансаглах гэж биш ач, зээ нарынхаа утасны төлбөрийг төлөх гэж, үр хүүхдээ хүний дайтай орон байртай болгох гэж л авдаг. Тиймээс та бүрэн эрхийнхээ хугацаанд 500 мянгаас доош төгрөгийн зээл авдаг ахмадуудын зээлийг нэг удаа тэглэх боломж байна уу, гэдгийг танаас хүсмээр байна.

Хэнтий аймгийн Хэрлэн сумын 4-р багийн иргэн Даваа:

-Улаанбаатар утаатай гэж ярьж байна. Манай аймаг ч гэсэн сүүлийн үед утаатай болсон. Тиймээс анхнаас нь дэд бүтцийн асуудлыг нь шийдэж, зохион байгуулалттай байлгамаар байна. Олон тэрбум төгрөгийг утаанд зарцуулсан гэж байх юм. Энэ их мөнгөөр цэцэрлэг, сургууль барих хэрэгтэй. Манай аймаг жишээ нь, Хэрлэн голын захад байдаг учраас их хүйтэн, сургууль цэцэрлэг нь хол байна.

Хэнтий аймгийн иргэн:

-Тэтгэвэр, тэтгэмжийн асуудалд нухацтай хандмаар байна. Дээхэн үед тэтгэвэрт гарсан хүмүүсийн тэтгэвэр олигтой нэмэгдээгүй, мөнгөний ханш унасаар байна. Сая нийтэд нь 20 гаруй мянган төгрөгөөр нэмлээ. Үүнд анхаарах ёстой. Хоёрдугаарт, нефть импортлогчид монополь болжээ. Төр засагт ч дийлдэхгүй болж. Хэрвээ, шатахуун өгөхгүй байгаа бол түүнийг байлгах шаардлага байхгүй гэж бодож байна. Ард түмнээ энэрэхийг нь энэрдэг, болохгүй зүйлс дээр төр төмөр нүүрээ харуулмаар байна. Гуравдугаарт, банк гэж бас нэг монополь байгууллага байна. Хүү гэж, хүүгийн хүү гэж авдаг. Олон сарын тэтгэврийн зээл авчихаар бараг гар дээр мөнгө үлдэхгүй байна. Ажил хийе гэхээр ажилд авахгүй, тэтгэвэр бага тийм л хаягдмал улс болчихоод байна.

Сүхбаатар аймгийн иргэн:

Өнгөрсөн 27 жил хөдөө аж ахуйг хөгжүүлж чадсангүй. Дэндүү дээ гэмээр юм хийсэнгүй. Хийж мэдэхгүй байна уу, эсвэл хайхрахгүй орхив уу. Малын эрүүл мэнд, үржлийн асуудлаар нэг хууль хэлэлцэх гэж таван жил боллоо. Гэсэн ч хуулийг нь мэргэжилтнүүд сайшаан хүлээж авсангүй. УИХ-ын гишүүн сонгохдоо хөдөө аж ахуй гэсэн амин салбарын мэргэжилтэй хүнийг сонгомоор байна, иргэд ээ. Нөгөө талаар энэ салбарыг шинэчлэхгүй бол малчид маань ноолуурын үеэр л хэдэн төгрөгийн орлого олно, ноос гэж бараг авахгүй, ашиг шимийг нь хүртэхгүй байна. Малын ашиг шимээ хүртэх томоохон арга хэмжээ авахгүй бол болохоо больсон байна шүү.

Булган аймгийн иргэн Б.Сүхбат:

Би 30 настай. Сүүлийн 3-4 жил Солонгос явж ажил хийлээ. Ерөнхийлөгч та залуусын оролцоо бага байна гэж хэллээ. Тэд угаасаа энд байхгүй, Солонгост байгаа. Би мэргэжилгүй, дээд сургуульд сураагүй. Олигтой онц сурахгүй л бол тэнд сурах хэрэггүй гэж бодсон юм. Үе тэнгийн найзуудтайгаа уулзахад, дипломтой ч ажилгүй байна. Ялангуяа, хүний газар боолын хөдөлмөр эрхлээд явж байхад тийм хүмүүстэй олон таарах юм. Одоо АНУ-ын визтэй холбоотойгоор тийшээ явах хүмүүсийн тоо нэмэгдэж байх шиг байна. Австрали руу бас явуулна гэж байна. Тэгэхээр залуус Монголд үлдэхгүй л болох гээд байна даа. Залуусыг яаж тогтоох юм бэ. Бид гадаадад хар ажил хийж, ард байгаа олон хүнээ тэжээж байгаа ч нөгөө талдаа надад буруу санагдаад байдаг юм.

Иргэдийг үг хэлж дууссаны дараа Монгол Улсын Ерөнхийлөгч Х.Баттулга:

-Уулзалтад идэвхтэй оролцож, өөрсдийнхөө бодож, санаж байгаа зүйлсээ ний, нуугүй ярьсан Хэнтийчүүд та бүхэнд баярлалаа. Өнөөдөр бид УИХ, Засгийн газарт өөрсдийнхөө дуу хоолойг хүргэх ёстой. Сонгуульд өрсөлдөж, сонгогдохдоо амлаж, дараа нь иргэд, сонгогчидтойгоо уулздаггүй байдлыг бид засах ёстой.

Би хөдөө, орон нутгийн амьдралын талаар мэднэ. Орон нутгийн иргэдээс нэг юм сонсчихоод "өө тэгдэг юм уу” гээд байх зүйл надад байхгүй. Тиймээс яригдаж байгаа бүх асуудлыг шийдэхийн тулд энэ уулзалтуудыг хийж байгаа. Та бүхэн хотын иргэдтэй адил асуудлууд ярьж байна. Тэтгэврийн нас, ажилгүйдэл... гээд. Жишээ нь, тэтгэврийн доод хэмжээг 500 мянган төгрөг болгоод өгөөч гэж бүх хөгшид хэлж байна. Энэ асуудлыг дэмжихээс өөр аргагүй. Улаанбаатарт очоод энэ асуудлыг ярьж, хэлнэ.

Мөн хөдөө орон нутагт 3900 гаруй орон сууц ашиглалтад орсон байгаа. Эдгээр орон сууцанд багш, эмч, цагдаа зэрэг төрийн албан хаагчдыг оруулаад цалинг нь барьцаа болгоод хүүгүй зээлд оруулах асуудлыг Засгийн газарт тавьсан байгаа. Тэтгэврийн зээл, цалингийн зээлийн асуудал, өр тэглэх асуудлыг ярьсан. Энэ бол боломжгүй биш боломжтой зүйл шүү. Өнөөдөр газрын доорх баялгаа бид өдөр, шөнөгүй урд хөрш рүүгээ зөөж байна. Энэ нь хэдхэн хүний өмч болсон. Одоо Тавантолгойг зөв менежменттэй явуулах юм бол энэ ордын ашгаас иргэдийн өрийг дарах боломжтой. Ажил хэрэг болгохоор УИХ-ын гишүүн З.Нарантуягаар ахлуулсан ажлын хэсэг хуулийн төсөл бэлтгэж байгаа. Би бизнесийн салбараас гарч ирсэн учраас амласнаа биелүүлэх гэж зорьдог. Амлалтаа мартаагүй шүү гэв.

Мөн Төрийн тэргүүн одон медаль, хөдөө аж ахуй, оффшор бүс, агаарын бохирдол, дагуул хот зэрэг асуудлаар иргэдтэй ярилцлаа.

Монгол Улсын Ерөнхийлөгч Х.Баттулга өнөөдөр Дорнод аймгийн иргэдтэй уулзана.

Мэдээний дүрсийг доорх хаягаар үзнэ үү

Эх сурвалж: president.mn

Агаарын бохирдлыг бууруулах дэд хорооны даргыг сонгоно

dorj — Thu, 25 Jan 2018 04:41:07 +0800

Байгаль орчин, хүнс, хөдөө аж ахуйн байнгын хорооны хуралдаан өнөөдөр 14.00 цагт хуралдана. Хуралдаанаар Агаарын бохирдлыг бууруулах асуудлын дэд хорооны даргыг сонгох, Баяжуулсан хүнсний тухай хуулийн төслийн болон Хүнсний тухай хуульд өөрчлөлт оруулах, Хүнсний бүтээгдэхүүний аюулгүй байдлыг хангах тухай хуульд нэмэлт, өөрчлөлт оруулах тухай хуулийн төслийн Ажлын хэсгийг тус тус өөрчлөн байгуулах асуудлыг хэлэлцэхээр төлөвлөжээ.

Гэр хорооллын дахин төлөвлөлтийн ажилтай танилцав

dorj — Thu, 25 Jan 2018 04:22:56 +0800

УИХ-ын гишүүн, Өргөдлийн байнгын хорооны дарга М.Оюунчимэг, УИХ-ын гишүүн Б.Энх-Амгалан нар нийслэлийн Чингэлтэй дүүргийн 9, 11-р хорооны нутаг дэвсгэрт Гэр хорооллын дахин төлөвлөлт, орон сууцжуулах хөтөлбөрийн хэрэгжилттэй танилцахаар газар дээр нь ажиллалаа.

Тус хороодын нутаг дэвсгэрт байрлах "цагаан байр”-ууд анх 1952-1960 онд ашиглалтад орж байсан ба эдгээр 80 байр цэвэр, бохир усны шугаманд холбогдоогүй тул оршин суугчдын хашаан дотор нүхэн жорлон барих зай талбай үлдээгүй болсон байна. Энэ нь орчны бохирдлыг ихээр үүсгэж улмаар иргэдийн эрүүл, аюулгүй амьдрах эрх ноцтой зөрчигдөж буй явдал юм. Мөн 2014 онд Нийслэлийн Иргэдийн Төлөөлөгчдийн хурлаар 10 гаруй га газар талбай гэр хорооллын дахин төлөвлөлтөд хамрагдаж, орон сууцжуулах асуудлыг шийдвэрлэхээр төлөвлөсөн ч сонгон шалгаруулалтад тэнцсэн компани нь одоог хүртэл үйл ажиллагаагаа эхлээгүй байна.

Иймд нийт 747 өрхийн 1100 гаруй иргэд болоод орон нутгийн Засаг захиргаа тус "цагаан байр”-уудыг шинэчилэх, нэн тэргүүнд гэр хорооллын дахин төлөвлөлт, орон сууцжуулах хөтөлбөрт хамруулж өгөх хүсэлтийг УИХ-ын Өргөдлийн байнгын хороонд удаа дараа ирүүлсэн болно.

УИХ-ын Өргөдлийн байнгын хорооны гишүүд нөхцөл байдалтай танилцсаны дараа иргэдтэй уулзаж, тэдний саналыг сонсохын сацуу хамт ажилласан албан тушаалтнуудаас тайлбар авч, цаашид хэрхэн ажиллах талаар санал солилцлоо. Энэ үеэр Байнгын хорооны дарга М.Оюунчимэг хэлсэн үгэндээ, тус газрын дахин төлөвлөлт олон жил яригдаж байгаа боловч тодорхой үр дүнд хүрэлгүй өнөөдрийг хүргэсэн, харин өнөөдрийн уулзалтаар энэ асуудал нэг алхамаар урагшилж байна. Учир нь холбогдох яам, газрын албаны хүмүүс, иргэд хамтран ажиллах талаар нэгдсэн ойлголтод хүрлээ. Хамгийн гол нь иргэд өөрсдөө газар чөлөөлөх хүсэлтээ нэгдсэн журмаар бүрдүүлж, газараа үнэлэхдээ бодит байдалтай нийцүүлэхийг тэрээр иргэдээс хүсэв. Түүнчлэн энэ ажил үүгээр зогсохгүй газар чөлөөлөлт, барилгын ажил эхлэхэд тус Байнгын хороо газар дээр нь дахин ажиллаж, хяналт тавих болно гэлээ.

Харин УИХ-ын гишүүн Б.Энх-Амгалан хот төлөвлөлтөд төрийн хяналт, оролцооны талаар байр сууриа илэрхийлэв. Тэрээр, шинээр бий болох бүсэд сургууль, цэцэрлэг, үйлчилгээний төв, автотээврийн зогсоол зэрэг цогц төлөвлөлттэй байх ёстой. Ажил гүйцэтгэх сонгон шалгаруулалтын үйл ажиллагаанд төр хариуцлага хүлээж, хугацаанд нь хүлээлгэж өгөх. Мөн иргэдийн эрх ашгийг тэргүүнд тавьж, газар чөлөөлөх асуудлыг богино хугацаанд гүйцэтгэх, мөн "цагаан байр”-ны уугуул иргэдэд байр олгох зэрэг асуудлаар санал хэлэв.

Өргөдлийн байнгын хорооны гишүүдийн хамт газар дээр нь ажиллахаар Барилга, хот байгуулалтын яам, Нийслэлийн ерөнхий төлөвлөгөөний газар, Нийслэлийн ерөнхий төлөвлөгөөний газар, Гэр хорооллын дэд бүтцийн газар, Нийслэлийн Мэргэжлийн хяналтын газар, Нийслэлийн Чингэлтэй дүүргийн Засаг даргын Тамгын газар болон бусад албаны хүмүүс байлцлаа гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.