Монгол Улсын Ерөнхийлөгч У.Хүрэлсүхийн урилгаар хүрэлцэн ирсэн БНАЛАУ-ын Ерөнхийлөгч Тонглун Сисүлитийн төрийн айлчлал өндөрлөлөө.

Эрхэм зочдыг Ерөнхийлөгчийн Тамгын газрын дарга Я.Содбаатар болон албаны төлөөлөгчид "Чингис хаан” олон улсын нисэх онгоцны буудалд үдэж мордуулсан юм. Айлчлалын хүрээнд хийсэн төрийн тэргүүн нарын албан ёсны яриа хэлэлцээ халуун дотно уур амьсгалд болж, Ерөнхийлөгч У.Хүрэлсүхийн 2023 онд Лаос улсад хийсэн төрийн айлчлалаар хүрсэн ололт амжилтаа бататган ахиулж, харилцааны түүхэн шинэ жарны хуудсыг нээлээ.

Монгол Улс нь Ази, Номхон далайн бүс нутгийн олон талт хамтын ажиллагаанд идэвхтэй оролцох бодлого баримталдаг. Энэ хүрээнд Лаос улсыг Зүүн өмнөд Ази дахь чухал түнш хэмээн үзэж, харилцаа, хамтын ажиллагааг гүнзгийрүүлэн хөгжүүлэх, ард түмний найрамдал, нөхөрлөлийг бэхжүүлэх, хамтын ажиллагааны хэтийн төлөвийг тодорхойлоход энэ удаагийн айлчлал онцгой ач холбогдолтой боллоо.

Европ тивийн газрын ховор элементийн хамгийн том ордыг нээсэн нь европчуудын хувьд ховор элементийн зах зээл дэх Хятадын ноёрхлыг зогсооход түлхэц болно гэж шинжээчид үзэж байна. Ирэх жилүүдэд цэвэр эрчим хүч рүү эрчимтэй шилжих тул газрын ховор элемент болон чухал ашигт малтмалын эрэлт эрс өсөх төлөвтэй байгаа юм.

Норвегийн зүүн өмнөд хэсэгт орших Фен карбонатитын цогцолбор нь газрын ховор элементийн ислийн нийт 8.8 сая тонн нөөцтэй гэж "Rare Earths Norway” компанийн энэ сарын 6-нд хийсэн мэдэгдэлд дурджээ. Энэхүү нээлт нь өнгөрсөн онд хөрш Шведэд илрүүлсэн газрын ховор элементийн асар том ордын сүрийг дарлаа.

"Rare Earths Norway” компанийн гүйцэтгэх захирал Альф Рейстад CNBC телевизэд мэдээлэхдээ, Фен дэх нээлт нь компанийн хувьд "томоохон үйл явдал” боллоо гэжээ. "Өнөөдөр Европт газрын ховор элементийг огт олборлохгүй байгаа гэдгийг онцлох нь зүйтэй” гэж А.Рейстад даваа гарагт цахим хурлын үеэр хэлсэн байна.

Европын Холбооны /ЕХ/ Чухал түүхий эдийн тухай хуулийн нэг зорилго бол 2030 он гэхэд ЕХ-ны газрын ховор элементийн жилийн хэрэгцээний 10-аас доошгүй хувийг олборлох явдал бөгөөд манай компани энэ зорилгод хувь нэмрээ оруулна гэдэгт найдаж байна гэж "Rare Earths Norway” мэдэгджээ.

Осло хотоос баруун өмнө зүгт 210 км-ийн зайд орших Телемарк тойрог дахь газрын ховор элементийн орд нь Норвег улсыг Европын ховор элемент, чухал түүхий эдийн сүлжээний салшгүй хэсэг болгоно гэж тус компанийн мэдэгдэлд дурдсан байна.

БНХАУ-ын Коммунист намын Төв хорооны гадаад хэрэг эрхэлсэн хорооны тамгын газрын дарга, Гадаад хэргийн сайд Ван И есдүгээр сарын 18-21-ний өдрүүдэд ОХУ-д айлчилна гэж Хятадын Гадаад хэргийн яамны албан ёсны төлөөлөгч Мао Нин мэдээлжээ. 

Ван И ОХУ-ын Аюулгүйн зөвлөлийн нарийн бичгийн дарга Николай Патрушевийн урилгаар тус улсад айлчилж, Орос-Хятадын стратегийн аюулгүй байдлын 18 дахь удаагийн зөвлөлдөх уулзалтад оролцох юм.

ОХУ-ын Гадаад хэргийн яамны албан ёсны төлөөлөгч Мария Захарова өнгөрсөн долоо хоногт мэдээлэхдээ, тус улсын Гадаад хэргийн сайд Сергей Лавров, Ван И нар есдүгээр сарын 18-нд Москвад хэлэлцээ хийнэ гэжээ. Талууд Украины асуудлаар, түүнчлэн Ази, Номхон далайн бүс нутгийн тогтвортой байдал, аюулгүй байдлыг хангах талаар санал бодлоо солилцоно.

Зүүн Хятадын тэнгис дэх Сенкаку (Дяоюйдао) арлуудын ойролцоо Хятад улс судалгааны хөвүүр суурилуулсан тухай "Yomiuri” сонин мэдээлжээ. Эдгээр арлууд нь Япон, Хятадын хооронд газар нутгийн маргаан үүсгээд байгаа билээ.

Тус сонинд мэдээлснээр, судалгааны хөвүүрийг Японы эдийн засгийн онцгой бүсийн дотор суурилуулсан байна. Үүнтэй холбогдуулан Японы эрх баригчид Хятадын талд хэдийнэ эсэргүүцэл илэрхийлсэн бөгөөд үүнээс өмнө Хятадын тал  2016 ба 2018 онд уг бүсэд далайн давлагааны өндөр, усан доорх урсгалын хурдны талаар мэдээлэл цуглуулах судалгааны хөвүүрүүдийг суурилуулж байсныг уг сонинд дурджээ. 

Хятадын эрх баригчид өөрийн газар нутаг гэж үздэг Сенкаку бүлэг арлын тавыг нь Токио хотын эрх баригчид хувийн эзэмшигчдээс худалдан авсан гэдгээ 2012 оны есдүгээр сард мэдэгдсэний дараа уг арлуудтай холбоотой газар нутгийн маргаан хурцдаж,  БНХАУ-д Японы эсрэг томоохон жагсаал цуглаан болсон билээ. Үүнээс хойш Хятадын хөлөг онгоцууд маргаантай арлуудын ойролцоо байнга үзэгдэж, сүр хүчээ харуулах зорилгоор эргийн бүс рүү үе үе нэвтэрдэг болсон байна. Өнгөрсөн онд Хятадын хөлөг онгоцууд арлуудын ойролцоо 336 хоног байрлаж, Япон улс өөрийн нутаг дэвсгэр гэж үздэг бүс рүү үе үе нэвтэрч байжээ. 

"Белград-2023” чөлөөт бөхийн ДАШТ гурав дахь өдрөө үргэлжилж байна. Өнөөдөр барилдах бөхчүүдийн нэрс нэгэнт тодорхой болжээ.

Энэ удаагийн ДАШТ манай чөлөөт бөхийнхний хувьд нэлээд хатуухан сугалаа таарч, ээлж дараалан ялагдал хүлээсэн тэмцээн болж байгаа.

57 кг-ын жинд хүч үзсэн ДАШТ-ий хүрэл медальт З.Занабазар эхний даваанд AIN-Беларусийн залуу бөх Дмитрий Шамелог 6:0 оноогоор ялж, AIN-Оросын олимп дэлхийн аварга Заур Угуевт 0:6 оноогоор ялагдсан бол 74 кг-ын жинд барилдсан О.Сүлдхүү эхний даваанд гоц мөргөж, хоёрдугаар тойрогт ДАШТ-ий алт, мөнгөн медальт Сербийн Хетик Цаболовт 1:11 гэсэн оноогоор цэвэр ялагдав.

79 кг-ын жинд зодоглосон Б.Бямбадорж эхний тойрогт БНХАУ-ын Ли Пэйлоныг 5 минут 55 секундэд цэвэр ялж, дараагийн даваанд Украины Васил Михаиловт 0:10 оноогоор цэвэр ялагдлаа.

Харин 86 кг-ын жинд барилдсан Б.Бат-Эрдэнэ эхний тойрогт БНСУ-ын Кан Д-г 4:0 оноогоор ялж, хоёрдугаар тойрогт Туркменистаны Д.Оразгылыжовыг 14:9 оноогоор ялсан юм.

Гуравдугаар тойрогт Ираны олимп дэлхийн аварга Хассан Язданитай хүч үзнэ

92 кг-д өрсөлдсөн Г.Ганхуяг эхний тойрогт хийлж, хоёрдугаар тойрогт AIN-Беларусийн Хажи Ражабовыг 7:0 оноогоор яллаа. Гурвын даваанд 2023 оны Азийн аварга Японы Араш Ёшидатай хүч үзнэ. Ганхуяг 19 настай япон залуутай Азийн АШТ-ий хагас шигшээд өрсөлдөж, 7:9 оноогоор дийлдсэн удаатай.

Дэлхийн дэвжээнд даагаа нэхсэн ч 1:11 оноогоор цэвэр ялагдав.

Хэрвээ Японы бөх хагас шигшээд Азербайжаны О.Нурмагомедовыг ялвал Ганхуягт дагаж барилдах боломж гарах юм.

БНХАУ-ын дарга Ши Жиньпин ОХУ-ын Ерөнхий сайд Михаил Мишустинтэй Бээжин хотноо лхагва гарагт уулзжээ.

Ши Жиньпин ОХУ-ын Ерөнхийлөгч Владимир Путинд чин сэтгэлийн мэндчилгээ дамжуулахыг М.Мишустинаас хүсээд гуравдугаар сард тус улсад хийсэн төрийн айлчлал нь амжилттай болж, В.Путинтэй Хятад, Оросын харилцаа, олон салбарын хамтын ажиллагааны талаарх цаашдын хөгжлийн бодлогыг тодорхойлсныг онцолжээ. Энэ нь хоёр орны харилцааг бэхжүүлэн хөгжүүлэх, ард түмний хүсэл эрмэлзэл, цаг үеийн чиг хандлага юм гэж тэрбээр хэлсэн байна.

БНХАУ-ын дарга мөн хоёр тал Хятад-Оросын харилцааны асар их нөөц боломж, өргөн хэтийн төлөв, хүчтэй хөшүүргийг ашиглан олон салбарын хамтын ажиллагааг ахиулж, шинэ эринд иж бүрэн стратегийн хамтын ажиллагааны түншлэлийн харилцаагаа баяжуулна гэдэгт итгэлтэй байна гэв.

Хятад, Орос хоёр орон өөрсдийн язгуур ашиг сонирхолтой холбоотой асуудлаар харилцан бие биенээ тууштай дэмжиж, НҮБ, Шанхайн хамтын ажиллагааны байгууллага, БРИКС, "Хорийн бүлэг” зэрэг олон талт талбарт хамтын ажиллагаагаа эрчимжүүлэх ёстой гэж Ши Жиньпин цохон тэмдэглэлээ. 

Хоёр тал эдийн засаг, худалдаа, хөрөнгө оруулалтын хамтын ажиллагааны түвшинг ахиулж, хоёр талын хамтын ажиллагааны институц, механизмыг боловсронгуй болгож, эрчим хүч, дэд бүтцээр холбогдох чиглэлд хамтын ажиллагааг уялдуулан өргөжүүлж, эдийн засгаа өсгөх шинэ зорилгуудыг бий болгохын тулд цаашид нөөц бололцоогоо ашиглах ёстой гэж Ши Жиньпин тэмдэглээд, ард түмэн хоорондын болоод соёлын харилцааг өргөжүүлэх хэрэгтэйг нэмж хэлжээ.

Мөн Хятад улс нь бүс нутгийн илүү нээлттэй, том зах зээлийг бий болгоход хувь нэмрээ оруулах, дэлхийн аж үйлдвэр, нийлүүлэлтийн сүлжээний тогтвортой, жигд байдлыг хангах, бүс нутгийн улс орнуудад бодит үр ашиг авчрахын тулд "Бүс ба зам” санаачилга болон Евразийн эдийн засгийн холбоо хоорондын уялдаа холбоог бэхжүүлэх чиглэлд Орос, Евразийн эдийн засгийн холбооны гишүүн орнуудтай хамтран ажиллахад бэлэн байна гэв.

Хятадад албан ёсны айлчлал хийж буй М.Мишустин хариуд нь В.Путин чин сэтгэлийн мэндчилгээ дэвшүүлж, сайн сайхныг хүсэн ерөөснийг Ши Жиньпинд уламжлав. Ши Жиньпиний гуравдугаар сард Орост хийсэн түүхэн төрийн айлчлал маш амжилттай болж, Орос Хятадын иж бүрэн стратегийн түншлэлийн хамтын ажиллагааны шинэ эрин үеийг эхлүүлснийг тэрбээр онцоллоо.

М.Мишустин үргэлжлүүлэн хэлэхдээ, Хятад улстай хоёр орны төрийн тэргүүн нарын хүрсэн чухал тохиролцоог хэрэгжүүлж, өндөр дээд түвшний уулзалтууд, холбогдох механизмыг бүрэн ашиглан олон салбарын ажил хэрэгч хамтын ажиллагааг гүнзгийрүүлэхэд бэлэн байна гэв.

Японы Ерөнхий сайд Кишида Фүмио ирэх долоодугаар сард болох НАТО-гийн дээд хэмжээний уулзалтад оролцохоор төлөвлөж байгаа талаар Засгийн газрын эх сурвалжууд мэдээлэв.

Эх сурвалжуудын мэдээлснээр, К.Фүмио Литва улсад болох дэлхийн хамгийн том цэргийн эвслийн уулзалтад түнш орны төлөөлөгчийн хувиар оролцох бодолтой байгаа ажээ. Оросын өдүүлсэн дайн үргэлжилсээр байгаатай холбоотойгоор уулзалтын үеэр Украинд дэмжлэг үзүүлэх талаар голчлон хэлэлцэх төлөвтэй байна.

Япон улс энэ сарын эхээр Хирошима хотдоо "Долоогийн бүлэг”-ийн дээд хэмжээний уулзалтыг зохион байгуулсан билээ. Литвад хүрэлцэн очих үеэрээ К.Фүмио Япон улс Украины асуудлыг зохицуулахад үргэлжлүүлэн хувь нэмрээ оруулахыг эрмэлзэж буйг илэрхийлэхийг зорьж байгаа ажээ.

Түүнчлэн Орос, Хятад хамтын ажиллагаагаа бэхжүүлэх хандлагатай байгаа тул К.Фүмио НАТО-той харилцаа, хамтын ажиллагаагаа гүнзгийрүүлэх хүсэлтэй байгаа юм байна. Тэрбээр Европ болон Энэтхэг-Номхон далайн бүс нутгийн аюулгүй байдал салшгүй холбоотой гэсэн Японы байр суурийг цохон тэмдэглэх төлөвтэй байна.

К.Фүмиогийн хувьд НАТО-гийн дээд хэмжээний уулзалтад хоёр дахь удаагаа оролцох гэж буй нь энэ юм. Тэрбээр өнгөрсөн оны зургаадугаар сард уг уулзалтад оролцсон Японы анхны Ерөнхий сайд болсон билээ. 

БНХАУ-ын даргаар гурав дахь удаагаа сонгогдсон Ши Жиньпин хамгийн эхний гадаад айлчлалаа ОХУ-д хийж, Ерөнхийлөгч В.Путинтэй уулзах үеэрээ Украины хямрал, 2030 он хүртэлх хоёр орны худалдаа-эдийн засгийн хамтын ажиллагааны гол чиглэлүүдийг хөндөн ярилцлаа.

Айлчлалын өмнө В.Путин Хятадын "Жэньминь Жибао” сонинд нийтлүүлсэн өгүүлэлдээ "хоёр улсын харилцаа түүхэнд байгаагүй өндөр түвшинд хүрч, дэлхий дахины тогтвортой байдлын тулгын чулуу болсон” гэдгийг онцлон тэмдэглэжээ.  Харин Хятадын удирдагч Ши Жиньпин дурдахдаа "Хятад-Оросын хэлхээ холбоо нь хоёр талын харилцааны хүрээнээс нэгэнт хальж, орчин үеийн дэлхийн дэг журам ба хүн төрөлхтөний хувь заяанд амин чухал ач холбогдолтой болсон” гэдгийг онцоллоо.

Талууд 14 баримт бичиг ба 2 хамтарсан мэдэгдэлд гарын зурсан байна.  

"Хятад-Оросын хэлхээ холбоо нь хоёр талын харилцааны хүрээнээс нэгэнт хальж, орчин үеийн дэлхийн дэг журам ба хүн төрөлхтөний хувь заяанд амин чухал ач холбогдолтой болсон"

Хэлэлцээний дараа болсон хэвлэлийн хурлын үеэр В.Путин Хятад улсын энхийн санаачилгын талаар хэлэхдээ "уг төлөвлөгөөний олон зүйл заалт нь Оросын байр суурьтай нийцэн тохирч байгаа учраас хямралыг энхийн замаар зохицуулахад үндэс суурь болгох боломжтой, гэвч үүнд Барууныхан ба Киев бэлэн бус байна” гэдгийг дурджээ.  

Хятадын удирдагч Ши Жиньпин мэдэгдэхдээ, Хятад улс НҮБ-ын дүрмийн зарчмуудыг удирдлага болгож, Украины хямралын асуудлаар алагчлахгүй шударга байр суурийг баримталж, энхийг тогтоохын тулд яриа хэлэлцээ хийх нь зүйтэй гэж үзэж байгааг илэрхийллээ.

Сануулан дурдахад, 2013 онд Ши Жиньпин Хятад улсын даргаар сонгогдсоныхоо дараа хамгийн түрүүнд ОХУ-д айлчилж байсан бөгөөд тэр үед Украинд байдал түгшүүртэй болж эхэлж байсан бол одоо дайн ид өрнөж буй үед Москвад ирлээ.  

В.Путинтэй хэлэлцээ хийхийн өмнө Хятадын удирдагч Оросын Ерөнхий сайд М.Мишустинтэй уулзжээ. Хоёр орны худалдааны эргэлт өнгөрсөн онд 30 гаруй хувиар өсөж, 190 тэрбум долларт хүрсэн бол энэ онд 200 тэрбумд хүргэх зорилт тавьсныг Оросын Засгийн газрын тэргүүн дурдлаа.

Хятад судлаач М.Коростиковын ярьснаар, Ши Жиньпинийг дагалдан Хятадын бизнесийн төлөөлөгчид Москвад ирсэн бөгөөд тэд барууны компаниудын орхин гарсан Оросын зах зээл дэх оролцоогоо нэмэгдүүлэх сонирхолтой байна. Тухайлбал, одоогоор Оросын зах зээлд үлдсэн автомашин үйлдвэрлэгч 14 компанийн 11 нь Хятадынх байгаа бол Хятадын ухаалаг гар утасны брэндүүд Оросын зах зээлийн 75 хувийг, зөөврийн компьютерийн брэндүүд 40 хувийг эзлэх болжээ.

Барууныхан Оросын эсрэг тогтоосонтой ижил хоригуудыг Хятадын эсрэг тогтоосон бөгөөд гэхдээ үүнийгээ алгуур байдлаар хэрэгжүүлж байгаа гэдгийг судлаач тэмдэглэн хэлэв. Иймээс Орос улс Барууны хоригийг хэрхэн сөрөн зогсож буйг өөрийн нүдээр харж, дүгнэлт хийхийн тулд Ши Жиньпин Москваг зорин ирсэн ажээ.

Ф.Кишидагийн гэнэтийн айлчлал

Москва хотноо Орос-Хятадын хэлэлцээ ид явагдаж байх тэр мөчид Япон Улсын Ерөнхий сайд Фүмио Кишида Украинд гэнэт айлчилсан нь олон улсын ажиглагчдыг төдийгүй мэдээлэлд ойрхон байдаг Японы сэтгүүлчдийг хүртэл алмайруулсан үйл явдал байлаа. 3 дугаар сарын 20-ны даваа гарагт тэрбээр Нью Делид айлчилж, Энэтхэгийн Ерөнхий сайдтай уулзсан бөгөөд үүнийхээ дараа шууд Токио руу нисэхээр төлөвлөж байсан бололтой. Гэвч Кишида Польш руу нисээд, тэндээсээ шөнийн галт тэргээр Киевт иржээ. Энэ бол Дэлхийн II дайн дууссанаас хойших хугацаанд, нутаг дэвсгэрт нь дайн болж буй улсад Япон Улсын Засгийн газрын тэргүүн анх удаагаа айлчилсан тохиолдол юм.  

Орос-Украины мөргөлдөөн эхэлсэн цагаас хойш Япон улс Украиныг дэмжсээр ирсэн бөгөөд Оросын эсрэг хориг арга хэмжээ авсан "G7” бүлгийн орнуудын удирдагчдаас Киевт очоогүй ганц хүн нь Кишида байлаа. Түүнийг Украинд ойрын үед ирнэ хэмээн хүлээж байсан боловч энэ удаагийн гэнэтийн айлчлал чухамдаа Хятадын удирдагчийн Москвад хийсэн айлчлалтай давхацна гэдгийг хэн ч таамаглаагүй нь үнэн. 

Японы ГХЯ үүнийг тайлбарлахдаа "Ерөнхий сайд Ф.Кишида Украины ард түмний эр зориг, тэсвэр тэвчээрийг үнэлэн, хүндэтгэл үзүүлэхээр тус улсад айлчилсан” гэжээ. Тэрбээр Киевийн ойролцоох Буча хотод очиж, өнгөрсөн онд Оросын цэрэгт эзлэгдээд байх үед амиа алдсан энгийн иргэдийн дурсгалыг хүндэтгэн цэцэг өргөж, нэг минут чимээгүй зогслоо. Тус хотын дэд бүтцийн байгууламжуудыг сэргээн босгох ажилд Японы компаниуд оролцож байгаа бөгөөд япончууд өнгөрсөн өвөл өндөр хүчин чадалтай генераторуудыг Украинд нийлүүлж байв. Кишида айлчлалынхаа үеэр эрчим хүчний болон бусад салбарт Японоос 470 сая ам.долларын тусламж үзүүлнэ гэж амлалаа. 

Ер нь бол, дайн дэгдсэнээс хойш япончууд Украиныг идэвхтэй дэмжиж байгаа бөгөөд 7 тэрбум гаруй ам.долларын тусламж үзүүлснээс гадна Японд дүрвэж очсон 2 мянга орчим украинчуудыг орон гэр, ажлын байраар хангаж, сурч боловсроход нь тусалж байна. Энэ бол дүрвэгчид, цагаачдын талаар хатуу бодлого баримталдаг улсын хувьд түгээмэл бус тохиолдол.   

Нөгөөтэйгүүр, улс орны дотоодод Кишидагийн нэр хүнд төдийлөн сайнгүй байгаа бөгөөд хугацаанаас нь өмнө парламентын сонгуулийг явуулъя гэсэн үг яриа сөрөг хүчнийхний дунд гарах болсон аж. Иймээс гадаад бодлогын тал дээр идэвхийг үзүүлж, Киевт айлчилснаар Японы олон нийтээс сайн үнэлгээ авахаар тооцоолсон байхыг үгүйсгэхгүй гэж зарим ажиглагч дүгнэжээ.

Хамгийн гол нь, Азийн авторитар дэглэмтэй улсын удирдагчийг оросууд урьсан бол Ази тивийн ардчилсан улсууд Украиныг дэмжиж байна гэсэн мессежийг дэлхий дахинд өгч, Хятадын удирдагчийн айлчлалыг "бүдэгрүүлэх”-ийн тулд барууныхан Кишидаг Киев рүү явуулахаар шавдуулсан бололтой.

Сибирийн хүч-2: Үнийн асуудал л үлдлээ

"Хоёр хүн уулзаа л биз” гээд тоохгүй орхиж боломгүй том асуудал бол Хятадын удирдагчийн айлчлалын үеэр манай улсаар дайран өнгөрөх "Сибирийн хүч-2” байгалийн хий дамжуулах хоолой юм.

Мягмар гарагт болсон Путин-Ши нарын хэлэлцээний үеэр уг асуудлыг эхлээд цөөн хүний хүрээнд, дараа нь өргөтгөсөн бүрэлдэхүүнтэйгээр хэлэлцжээ. Ингээд холбогдох баримт бичгүүдэд гарын үсэг зурахад бэлтгэх ажлыг ойрын үед дуусгах чиглэлийг хоёр улсын удирдагчид холбогдох албан тушаалтнуудад өгчээ.

Хэлэлцээний дараа Ерөнхийлөгч В.Путин хэлэхдээ, асуудлыг шийдэх тал дээр томоохон ахиц дэвшил гарч, Орос, Хятад хоёр улс хийн хоолой барих төслийн бүх үндсэн параметр үзүүлэлтийг зөвшилцөн тохиролцсон, мөн өмнө нь Монголын талтай бүх тохиролцоог хийсэн гэдгийг мэдэгдлээ.    

Оросын "Газпром” компанийн мэдээлснээр, 2022 оны 1 дүгээр сард төслийн ТЭЗҮ-г боловсруулах тухай протоколыг Монголын талтай байгуулсан бол зураг төслийн ажил 2023 онд багтаж дуусна гэдгийг ОХУ-ын Засгийн газрын Шадар сайд В.Абрамченко мэдэгдэж байв.

Жилд 50 тэрбум шоо метр хийг Хятадад нийлүүлэх уг хоолойн нэг хэсэг нь Монгол Улсын нутаг дээгүүр 962,9 км урт зурвас газраар дайран өнгөрөх бөгөөд барилгын ажил 2024 онд эхэлж, 2027-2028 онд дуусах төлөвтэй байна. Барууныхны хоригийн улмаас "Газпром”-оос Европын Холбоонд нийлүүлдэг хийн хэмжээ 80 тэрбум шоо метрээр буураад буй энэ үед "Сибирийн хүч-2” магистраль хоолойг барих ажлыг түргэвчлэхийг Оросын тал эрмэлзэж байна.  

Ойрын жилүүдэд "Газпром”-ын Хятадад нийлүүлэх хийн хэмжээ жилд 48 тэрбум шоо метрт хүрэх бол "Сибирийн хүч-2” ашиглалтад орсноор 2030 он гэхэд жилд 100 тэрбум шоо метрт хүрэх юм. Үүн дээр 100 сая тонн шингэрүүлсэн шатдаг хийг нэмэх аваас Орос улс Хятадын зах зээлд томоохон байр суурийг эзлэх болно.  

Нэгэнт талууд үндсэн параметрүүдээ тохиролцсон тул одоо зөвхөн үнэ ханшийн асуудлыг шийдвэрлэх л үлдлээ. Энэ тухайд ОХУ-ын Засгийн газрын Шадар сайд А.Новак хэлэхдээ "бүх гэрээ хэлцлийг харилцан ашигтай нөхцөлөөр байгуулдаг, алдагдалтай гэрээнд хэн ч гарын үсэг зурахгүй” гэлээ.