Сангийн дэд сайд Х.Булгантуяагаас цаг үеийн асуудлаар дараах тодруулгыг авсан юм.
-Урд хөршид үүсээд буй нөхцөл байдал манай улсын эдийн засагт хэрхэн нөлөөлөх, мөн төсвийн тодотголыг хийх боломж бий юу?
-Коронавирусын халдварын тархалт өндөр байгаагаас шалтгаалж, бүс нутаг төдийгүй дэлхийн эдийн засаг амаргүй байх төлөв байдалтай байгаа. Манай улсын хувьд өнгөрсөн оны нэгдүгээр сартай харьцуулахад төсвийн орлого багассан тоон үзүүлэлттэй байна. Төсвийн гүйцэтгэл нэгтгэгдэж гараагүй байгаа учраас төсвийн тодотгол хийнэ гэж хэлэх боломжгүй.
-Үүсээд буй нөхцөл байдалтай холбоотойгоор Санхүүгийн тогтвортой байдлын зөвлөл ямар ажил хийж, хэрэгжүүлж байна вэ?
-Санхүүгийн тогтвортой байдлын зөвлөлийн хувьд юун түрүүнд санхүү, эдийн засагтай холбоотой байгууллагуудын мэдээллийг нэгтгээд, тодорхой үүрэг, даалгавр өгч ажиллаж байна.
-Манай улсын эдийн засгийн хувьд ямар нэг эрсдэл учрах уу?
-Хятад улсын хувьд гоц халдварт өвчин гарсан бүс нутаг учир эдийн засгийн хувьд хүндээр тусч байгаа. Мөн тус улсын Засгийн газрын зүгээс банкуудаар дамжуулан 50 тэрбум орчим долларын санхүүжилт хийсэн. Яагаад гэвэл 11 сая хүн амтай БНХАУ-ын 4, 5-д бичигдэх том хот өнөөдөр тэг зогсолт хийж, ямар ч эдийн засгийн үйл ажиллагаа явагдахгүй байгаа.
-Манай улсын хувьд хөл хорио тогтоосонтой холбоотойгоор иргэд, түрээслэгч нарын зээлийн хүндрэлийн асуудал яригдаж байна. Үүнийг бид Засгийн газарт танилцуулна.
-Эдийн засагчдын хувьд төсөв тодотгох нь зүйтэй гэж үзэж байна, энэ тухайд?
-Төсвийн тухай хуулиар төсөв тодотгох хэд хэдэн заалтууд бий. Он гараад эхний хоёр сарын хувьд экспорт харьцангуй бага байдаг учир нэгдүгээр улиралд төсвийн орлого бага байгаа. Нөхцөл байдлыг харж байж дараа дараагийн шийдвэрийг гаргана.
-Тавантолгой ХК иргэдэд ногдол ашиг тараах тухай мэдээлсэн. Хувьцаа эзэмшдэг данс нээлгээгүй иргэд хэрхэн бүртгүүлэх вэ?
-Таван толгой ХК-ийн иргэдэд олгосон 1072 ширхэг хувьцаа болон тус компанийн хувьцааг хөрөнгийн зах зээлд арилжаалахгүй байгаа учир албан ёсоор худалдаж авсан ААН-үүд байдаг. Мөн хувьцаа эзэмшигч иргэдийн зарим нь гадаадад байгаагаас бүртгүүлж чадаагүй, бүртгэлтэй хэдий ч нас барсан тохиолдлууд гэхчлэн хөдөлгөөнтэй зүйлс олон бий. Одоогоор тэдгээр иргэдийн асуудлыг бүрэн шийдвэрлээгүй. Энэ долоо хоногт УУХҮЯ-наас мэдээлэл хийж, ногдол ашгийг тараахтай холбоотойгоор хувьцаа эзэмшдэг иргэд бүртгэлээ хийлгэхийг сануулсан. Мөн Эрдэнэс таван толгой ХК-ийн бонд босгох асуудлыг харьяа яаманд хэлэлцэж байгаа.
-НӨАТ-ын буцаан олголтын хувийг иргэдийн зүгээс нэмэгдүүлэхийг хүсч байна. Урамшууллын хувийг 8-10 хувь болгох боломжтой юу?
-Татварын багц хуульд тусгасны дагуу НӨАТ-ын урамшууллыг иргэд жилд нэг удаа авдаг байсан. Ингэснээр жилийн эцэст иргэдийн и баримт бүртгүүлэх тоо багасч, идэвх суларч байсан учир урамшууллыг улирал бүрээр авах боломж бололцоог хангаж өгсөн байгаа. Тиймээс татварын багц хуулийг шинэчилж баталсан энэ үед буцаан олголтын хувь хэмжээг нэмэгдүүлэх гэхээсээ илүүтэй бид ААН бүрийг татвар төлөгч байлгахыг эрхэм зорилго болгож байна.