Монголоос Их Британийн Лондон хот хүртэл 12 мянган км газрыг зөвхөн тэмээтэй туулахаар аян замдаа явж буй аялагч, уулчин Н.Байгалмаагийн талаар та дуулсан бизээ. "Steppes To The West" аяллын хүрээнд Монгол эмэгтэйн хүч чадал, тэсвэр тэвчээрийг дэлхий нийтэд батлан харуулж яваа зоримог бүсгүйн талаарх олны төдийлөн мэдэхгүй 14 баримтыг бид хүргэж байна.

1. Н.Байгалмаа зургаадугаар сарын 20-ны өдөр төрсөн. 

2. Тэр 19 настайгаасаа аялж эхэлсэн бөгөөд одоогоор 25 улсаар аялаад байна. 

3. Н.Байгалмаа дэлхийн ноён оргилуудад төрийн далбаагаа мандуулсан туршлагатай уулчин. 

Тэр Монгол улсын Алтай таван богдын оргил, Хорьдол сарьдаг, Сутай хайрхан, Асралт хайрхан цаашлаад Альпийн нурууны ноён оргил Эльбрус, Африкийн хамгийн өндөр уул Клемэнжаро зэрэг ноён оргилуудад гараад байна. 

4. Түүний нөхөр И.Нямдорж ч мөн аялагч. Тэд хоёр өхөөрдөм охинтой. 

 25 настайдаа нөхрийн хамт "Offroad Mongolia” аяллын компанийг үүсгэн байгуулжээ. 

5. Н.Байгалмаагийн энэ удаагийн аяллын талаарх баримтат нэвтрүүлэг "National Geography", "BBC" зэрэг сувгаар цацагдахаар төлөвлөгдөж байна. 

6. Н.Байгалмаа шүхрээр бууж, балет бүжиглэдэг төдийгүй боксын спортоор хичээллэдэг. 

7. Н.Байгалмаа 2017 оны аравдугаар сарын 30-нд Их Британи хүртлэх замыг тэмээтэй туулах "Steppes to the west” аяллаа эхлүүлжээ. 

8. 5 орны 8 аялагч түүнтэй хамт аяллыг эхлүүлсэн ч буцсан. 

Түүнтэй хамт Их Британийн аялагч Карл Бушби, Америкийн аялагч Ангела Максвел, Габриэл Шонерд, Германы аялагч Мурат Яалкин Тэнгиссон нар аяллыг эхлүүлсэн ч замаасаа буцаад байна. 

9. Одоо Н.Байгалмаатай хамт түүний төрсөн дүү Н.Баянмөнх яваа бөгөөд Цагдаагийн Ерөнхий Газрын санаачлагын дагуу аймаг бүрт нэг албан хаагч түүнтэй хамт өртөөчлөн аялахаар болжээ. 

10. Н.Байгалмаа аяллын бүх гутал хувцсаа ээж эгч нарын хамт урлажээ. 

11. Аяллын эхэнд олон улсын аялагчид тэмээндээ нэр өгсөн бөгөөд "Говь”, "Айргана”, "Бровнье”, "Жожо”, "Луу”, "Чингис”, "Клөүд”, "Харли” болон "Кингстон” юм.

Аяллын үеэр хил гарах шилмэл тэмээд Н.Байгалмаатай хамт эх орондоо эргэн ирнэ. 

12. Тэр анх Монголоос Унгар хүртэлх замыг морьтой туулсан австрали аялагчийн тухай сонсож, энэхүү аяллынхаа санааг гаргажээ.

13. "Steppes To The West" аялал гурван жил үргэлжилнэ. 

Б.Байгалмаа 12,000 орчим км замыг зөвхөн тэмээтэйгээр гурван жил туулахдааКазахстан, Узбекстан, Туркменистан, Иран, Турк, Европын орнууд гэх мэт 15 улсаар дайрах юм.

14. Марко Пологийн аялж явсан замыг монгол бүсгүй туулна. 

Италийн нэрт аялагч Марко Пологийн аялж явсан чиглэлийн дагуу буюу Азиас Европ хүртлэх эртний "Торгоны зам"-аар Н.Байгалмаа аяллаа хийх юм. 

 

Н.Байгалмаа аяллынхаа тухай "Эх орноо сурталчилсан, түүх соёлоо таниулсан, монгол эмэгтэйн тэсвэр хатуужил, монгол хүний онцлогийг харуулсан түүхэн аялал болно” хэмээн хэлжээ. 

Тэр одоогоор Говь-Алтай аймгийн Дэлгэр сумд хүрээд байна. 

Ингээд эх орныхоо нэрийг дуурсгах түүхэн аяллынхаа замд яваа түүнд аян замын ерөөл дэвшүүлцгээе.