Швейцарийн сэтгэцийн эмч Карл Густав Юнг 1875 оны 7-р сарын 26-нд Швейцарийн Кесвиль хотод төрсөн. Протестант шашны ламын хүү Юнг нам гүм, ажиглагч хүүхэд байжээ. Тэрээр багадаа айлын ганц хүүхэд шиг өссөн бөгөөд бага наснаасаа эцэг эх, багш нарынхаа зан байдлыг ажиглаж, тэдгээрт гарч байгаа бэрхшээлийг шийдвэрлэхийг хичээдэг байсан. Юнгийн ээж Эмили сэтгэцийн өвчтэй байсан ба хүүгээ гурван настай байхад нь сэтгэцийн эмнэлэгт удаан хугацаанд хэвтэн эмчлүүлэх хэрэгтэй болжээ. Түүний аав Юнгийг шашины хүн болно гэж таамаглаж байв. Харин өсвөр насандаа гүн ухаанд шимтэж эхэлсэн Юнг уламжлалаа орхиж, Базелийн их сургуульд элсэн орсон байна. Уг сургуульд биологи, палеонтологи, шашин, археологи зэрэг олон төрлийн судалгааны чиглэлээр суралцаж, эцэст нь анагаах ухаанд шимтэн суралцах болжээ.
Юнг 1900 онд Базелийн их сургуулийг төгссөн бөгөөд хоёр жилийн дараа Цюрихийн их сургуульд докторын зэрэг хамгаалсан байна.
Карл Юнг нь ухамсаргүйн талаар сонирхдог байсан бөгөөд Фройдийн анхны дэмжигч байжээ. Тэрээр Венийн психоаналитик нийгэмлэгийн идэвхтэй гишүүн байсан. 1910 онд Олон улсын психоаналитик нийгэмлэг байгуулагдахад Фройдийн хүсэлтээр Юнг уг нийгэмлэгийн ерөнхийлөгч болжээ. Гэсэн хэдий ч 1912 онд Юнг Америкт болсон лекцийн үеэрээ Фройдийн Эдипийн цогцолборын онолыг шүүмжилсэн байдаг. Мөн тус ондоо Юнг "Ухамсаргүйн сэтгэл судлал” номоо хэвлүүлсэнээр тэдний үзэл баримтлал нэлээдгүй зөрчилтэй тулгарсан бөгөөд Юнг ананлитик онолын өөрийн хувилбарыг боловсруулжээ.
Юнгийн аналитик сэтгэл судлал нь хүний оюун ухаан, бие, сэтгэлийг бүхэлд нь хардаг хандлага юм. Энэхүү хандлага нь амьдралын утга учрыг хайхад хувь хүний ухамсар болон ухамсаргүй талууд, нийтийн ухамсарыг холбон үздэг (Хүний ухамсрын бүрдлүүд нь ухамсар, хувийн ухамсаргүй, нийтийн ухамсаргүй гэсэн хэсгүүд юм). Юнг сэтгэл засалчийн үүрэг бол мөрөөдөл, уран зөгнөлийг (заримдаа урлагаар дамжуулан илэрхийлдэг) шинжилж, бодлыг ухамсаргүй байдлаас ухамсарт хүргэх явдал гэж үздэг. Тэрээр хүн бүр өөрийн гэсэн ухамсаргүй, мөн түүнчлэн өвөг дээдсээсээ ирсэн хамтын ухамсаргүй, шашны гарал үүсэл, соёлын домог зүй, өвөг дээдсийн хувьсалтай байдаг гэж үздэг байв. Хамтын ухамсаргүй байдал нь бүх нийтийн шинж чанартай архетип хувийн шинж чанараар илэрдэг. Тэрээр зан чанарыг гурван туйлын шинж чанараар тодорхойлж болно гэж үзсэн. Энэ онол нь Myers-Briggs Type Indicator (MBTI), үгийн холбоо тогтоох тест, Сэдвийн мэдрэмжийн тест (TAT) зэрэг үнэлгээний үндэс суурь юм. Юнг маш их уншиж, шашин, анагаах ухаан, сэтгэл судлал, парапсихологи, антропологи, гүн ухаан, сонгодог хэл зүй, домог зүй, алхими, ид шид зэрэг олон сэдвийг судалдаг байжээ. Тэрээр мөн олон газар аялж, соёлын антропологийг судалсан нь өөрийн онолоо боловсруулахад нь ихээхэн нөлөөлсөн гэдэг. Юнг бэлгийн харилцааны үүргийн талаар Фройдтой санал нийлэхгүй байв. Тэрээр бэлгийн дур хүслийг зөвхөн бэлгийн энерги биш, харин ерөнхий сэтгэцийн энерги гэж үздэг байсан. Юнгийн хувьд сэтгэцийн энергийн зорилго нь хувь хүнийг сүнслэг, оюун ухаан, бүтээлч байдлаар олон чухал арга замаар урамшуулах явдал байв. Энэ нь мөн хувь хүний таашаал хайж, зөрчилдөөнийг багасгах сэдэл болдог гэж үзэж байжээ.