Манай улсын төсвийн орлогын дийлэнх хувийг уул уурхайн салбар бүрдүүлдэг. Энэ оны болон ирэх жилийн төсөвт 42 сая тонн нүүрс экспортолж, төсөвт 1.4 их наяд төгрөг төвлөрүүлнэ гэж тооцсон. Иймд дэлхийн зах зээл дээрх ашигт малтмалын үнэ ханш өндөр, эрэлт их байх нь манай улсад ашигтай. Гэтэл "СOVID-19” халдварын улмаас дэлхийн төдийгүй манай улсын эдийн засгийн өсөлт саарч, ашигт малтмалын үнэ ханш тогтворгүй, савлаж байгаа. Гаалийн ерөнхий газрын мэдээлснээр энэ оны эхний хагас жилийн байдлаар нүүрсний экспортын нийт хэмжээ 8.65 сая тоннд хүрч өмнөх оны мөн үеийнхээс 52 хувиар буурсан байна.
Мөнгөн дүнгээр нь авч үзвэл, нүүрсний экспортын орлого энэ оны эхний хагас жилийн байдлаар 690 сая ам.долларт хүрч өнгөрсөн оны мөн үетэй харьцуулахад 850 сая ам.доллараар буурав. Өнгөрсөн оны эхний хагас жилд нийт 18 сая тонн нүүрс экспортолж байжээ.
Нүүрсний экспортыг сарын дүнгээр нь авч үзвэл арай өөр үзүүлэлт гарч байна. Өөрөөр хэлбэл, нүүрсний экспорт буурсан хэдий ч аажмаар сэргэх хандлага ажиглагдаж байна. Тодруулбал, өнгөрсөн зургаадугаар сарын байдлаар 2.36 сая тонн нүүрс экспортолсон нь он гарснаас хойших хамгийн өндөр буюу найман хувиар нэмэгдсэн үзүүлэлт аж.
Цаашид дэлхийн зах зээл дээр ашигт малтмалын үнэ ханш, эрэлт нийлүүлэлт ямар байх, эдийн засгаа дэмжих чиглэлд ямар бодлого баримтлах тухайд УИХ-ын гишүүн Г.Амартүвшин "Дэлхий дахинд түүхий эдийн үнэ харьцангуй тогтвортой байна. Зэс, алтны үнэ харьцангуй өндөр байгаа. Дээр нь БНХАУ нүүрсээ Австрали улсаас авахгүй манайх улсаас түлхүү авахаар боллоо. Энэ нь бидэнд том боломж. Иймд экспортоо дэмжсэн бодлого явуулбал эдийн засагт эерэг нөлөө үзүүлнэ” гэв.
тэрбээр эдийн засгаа сайжруулахын тулд мөнгөний бодлогоо зөв явуулах, гадаадын хөрөнгө оруулагчдыг илүү татаж, хөрөнгө оруулалтаа нэмэгдүүлэх хэрэгтэйг тодотгов.
С.Юмсүрэн
Эх сурвалж: "Монголын үнэн" сонин