Нийслэлийн Онцгой комиссоос сайжруулсан түлштэй холбоотой цаг үеийн асуудлаар ээлжит мэдээлэл хийлээ.

Яаралтай түргэн тусламжийн төвд өнгөрсөн шөнө угаарын хийн хөнгөн хордлогын шинжтэй дөрвөн дуудлага ирж, есөн хүн /хоёр хүүхэд, долоон том хүн/ ханджээ. Энэ сарын 2-24-ыг хүртэл 240 дуудлагаар 280 хүн эмнэлгийн тусламж үйлчилгээ авсан бөгөөд одоогоор эмнэлэгт хоёр хүн хэвтэн эмчлүүлж байгаа аж. Дуудлагын тоо харьцангуй буурсныг мэргэжилтнүүд онцоллоо.

Энэ нь төрийн албан хаагч, иргэдийн оролцоо хандалга, түлшээр зөв галлаж сурсантай холбоотой аж. Дуудлага буурлаа гээд тайвширч болохгүйг мэргэжилтнүүд онцолсон юм.

Нийслэлийн мэргэжлийн хяналтаас автомашин шалган нэвтрүүлэх газруудад шалгалт хийж байгаа. Шалгалтаар Өлзийт товчоогоор хоёр тонн түүхий нүүрс оруулахыг завдсаныг илрүүлж, буцаасан байна.

Мөн өнгөрсөн шөнө түүхий нүүрс түлж байгаа талаарх 13 гомдол иржээ. Ингээд шалгалт явуулахад нэгэн айл 35 тонн нүүрс хадгалж байсныг сайжруулсан түлшээр солих арга хэмжээ авсан байна. Мөн дахин нэг айл хоёр шуудай нүүрс нөөцлөн, хэрэглэж байсныг 50 мянган төгрөгөөр торгожээ. Түүнчлэн Сүхбаатар дүүргийн "Цасан гоо” цэцэрлэг түүхий нүүрс түлж байсныг илрүүлсэн байна.

Агаарын бохирдол буурсан учир томуугийн өвчлөл өнгөрсөн оны мөн үеийнхээс гурав дахин буурсан үзүүлэлттэй байгааг эрүүл мэндийн байгууллагаас дуулгасан юм.  Агаарын дундаж температур өнгөрсөн оны мөн үеийнхээс 2-3 дахин хүйтэн байгаа ч энэ сарын 14-20-нд хийсэн ажиглалтаар PМ буюу нарийн ширхэгт тоосонцор өнгөрсөн жилийн мөн үеийнхээс 25 хувиар буурсан байна.

Сайжруулсан түлштэй холбоотой мэдээлэх, асуух зүйл байгаа бол 70114900 дугаарын утсанд холбогдохыг зөвлөлөө.

Угаартахаас урьдчилан сэргийлэх алхам

• Иргэд зуухаа битүүмжилж, цууралт гарсан эсэхийг тогтмол шалгаж байх
• Яндангаа хөөлөх
• Түлшээ зууханд дүүргэж хийхгүй байх
• Унтахын өмнө саванд цэвэр ус хийж тавих. Энэ нь угаарын хийг саармагжуулдаг байна.