Эх баригч намын шинэчлэл орон нутагт хэрэгтэй болжээ. Их хурлын сонгуульд ялалт байгуулсан зарим аймгууд орон нутгийн сонгуульд ялалтаа алдаж, нэгдсэн бодлого хөтөлбөрөөр цааш явах боломжгүй болж орхив. Үүний нэг нь Дундговь аймаг. Тус аймагт их хурлын сонгуульд МАН ялалт байгуулж чадсан ч энэ удаагийн орон нутгийн сонгуульд амжилт гаргасангүй. Энэ нь Дундговь аймгийн МАН-ын хорооны удирдлагуудын нутаг усныхаа эрх ашгаас илүү хувийнхаа эрх ашгийг дээгүүр тавьж, эв түнжин муутай байсны нөлөө гэж намын гишүүд үзэж байна.
Ялалт байгуулж чадаагүй дарга нар ажлаа өгч, хариуцлага хүлээдэг "жамтай”. Тэгвэл МАН-ын хяналтын хороо хуралдаж Дундговь аймгийн МАН-ын хорооны удирдлагууд болох О.Батэрдэнэ, С.Сүхбаатар, намын залуучуудын холбооны дарга Ж.Мөнхчулуун нарыг намын эв нэгдлийг бусниулсан, аймаг орон нутгийнхаа иргэдийн итгэлийг алдсан, хувийн эрх ашгаа илүүд үзэж авилга хээл хахуулийн хэрэгт холбогдсон, УИХ-ын түүхэн ялалтыг баталгаажуулаагүй, ардын нам руу залуучуудыг татаж чадаагүй гэдэг шалтгаанаар намаас хасаж, дөрвөн жилийн хугацаанд намаас албан тушаалын дэмжлэг өгөхгүй байхаар шийдвэрлэжээ. Өөрөөр хэлбэл улс төрийн "хатуу” хариуцлага тооцсон нь тэр.
Дээрх шийдвэрээс харвал Дундговь аймгийн МАН-ын хорооны удирдлага, албан тушаалтнууд хоорондоо эв нэгдэлгүй, зөрчилдөөнтэй, ашиг сонирхлын зөрчилтэй явсаар энэ асуудал нь ийнхүү олон жил бугшижээ. Хэрэв зээ энэ асуудлаа эрх баригч нам шийдэж чадахгүй бол үр дүн нь ялагдал байсаар байх болно.
Алдаагаа засаж, шинэчлэх алхам Дундговь аймагт эхлэв бололтой. Дундговь аймгийн МАН-д шударга ёсны салхи сэвэлзэж эхэлснийг намынхан нь хэлж байна. Ингэж шинэчлэл хийхдээ хүнийг хүнээр солих бус олон жил хуримтлагдсан бугшсан асуудлыг үндсээр нь"сугалж”, нийт гишүүд, дэмжигчдийн оролцоог хангасан, нийт эрх ашгийг дээгүүр тавьсан нэгдмэл бодлогоор, нэг баг болж гар нийлэн ажиллаж багийг бүрдүүлэх "ШИНЭЧЛЭЛ” тус аймагт өрнөж байна.
