Монгол Улсын Шадар сайд С.Амарсайхан Мэргэжлийн хяналтын ерөнхий газрын удирдлага, албан хаагчидтай өнөөдөр уулзаж, халдварын голомтыг хумих ажлын хүрээнд эрчимжүүлэх шаардлагатай хэд хэдэн чиглэлээр үүрэг, даалгавар өглөө.
Мэргэжлийн хяналтын байгууллагаас "COVID-19” халдварын нөхцөл байдлын хариу арга хэмжээнд авч хэрэгжүүлж буй ажлын явцын талаар мэдээлээд, цаашид салбарын хууль эрх зүйн орчинг сайжруулах, мэдээллийн нэгдсэн цахим системд нэгдэж, чадварлаг хүний нөөцтэй болох зорилт тавин ажиллаж буйг МХЕГ-ын дарга, улсын ерөнхий байцаагч Т.Гантулга танилцуулав.
Өнгөрсөн хугацаанд Улаанбаатар хотын агаарын бохирдлыг бууруулж, сайжруулсан түлшний хэрэглээг нэвтрүүлэх зорилтод ажилд хяналт тавин, үр дүнтэй хэрэгжүүлж, улмаар цар тахлын амаргүй цаг үед ч ард иргэдийнхээ эрүүл мэндийг сахин хамгаалж буй байгууллагын нэг гэдгийг Шадар сайд С.Амарсайхан уулзалтын эхэнд онцлов. Тэрбээр, "Мэргэжлийн хяналт шалгалтын бие даасан, хараат бус, хөндлөнгийн нэгдсэн тогтолцоог хэвээр хадгалах, бэхжүүлэхэд Засгийн газар анхаарч ажиллаж байна. Өнөөгийн хөгжлийн чиг хандлагад нийцүүлэн Мэргэжлийн хяналтын байгууллагын шинэчлэлийг эхлүүлэн урьдчилан сэргийлэх, зөвлөн туслах, тандалт судалгаа хийх зэрэг арга, хэлбэрийг нэвтрүүлж байгаа нь сайшаалтай. Төрийн хяналт шалгалтын тухай хуулийг шинэчлэн найруулж, зарим хяналтын салбар, чиг үүргийг буцаан нэгтгэж нэгдмэл тогтолцоог бэхжүүлэх, байгууллагын нийгмийн үнэлэмж, улсын байцаагчдын ажиллах нөхцөл, нийгмийн баталгааг эрс сайжруулах шийдлээ хүлээсэн асуудлыг зоригтой хэрэгжүүлэх ёстой" хэмээв.
Тэрээр санхүүгийн хяналт шалгалтын чиг үүргийг хяналтын нэгдсэн тогтолцоонд буцаан нэгтгэх ажлыг ойрын хугацаанд хэрэгжүүлэхээ тэмдэглээд, төрийн хяналт шалгалтыг шат шатанд, хууль журмын хүрээнд, хатуу зохион байгуулалттай бүх хүчээ дайчлан явуулах шаардлагатайг онцлов.
Цар тахлын "Улбар шар" түвшинд шилжсэн хүнд цаг үед эдийн засаг нь сэргэж буй аж ахуйн нэгжүүдийг дарамт шахалтад оруулахгүй, зөвлөн тусалж ажиллахыг анхааруулахын зэрэгцээ илт хууль бус үйлдэл гаргасан, гамшгийн үеийн дэглэмийг удаа дараа зөрчсөн тохиолдолд хатуу хариуцлага тооцох, олон нийтэд мэдээллэхийг даалгав.
"Мэргэжлийн хяналтын олон арван шударга зарчимч байцаагчдын хажуугаар тэдний ажлыг харлуулж байгаа албан тушаалтнуудтай хариуцлага тооцож ажиллах хэрэгтэй. Ялагуяа албан тушаалын байдлаа урвуулан ашиглаж бусдад давуу байдал бий болгодог, ААН-үүдийг дарамталж, үндэслэлгүйгээр ажлыг нь зогсоодог, хааж боодог, авлига нэхдэг албан тушаалтнуудтай эвлэрэхгүй" хэмээн Шадар сайд С.Амарсайхан онцоллоо.
Уулзалтын үеэр Шадар сайд, УОК-ын дарга С.Амарсайхан Архангай, Булган, Өмнөговь, Хөвсгөл, Төв аймгийн мэргэжлийн хяналтын байгууллагын төлөөлөлтэй цахимаар холбогдон цаг үеийн мэдээлэл авч, тулгарч буй хүндрэл бэрхшээлийг нь сонслоо.