Улаанбаатар хотын Захирагчийн ажлын албанаас нийслэлийн 9 дүүрэг, тэр дундаа төвийн зургаан дүүргийн нийтийн эзэмшлийн зам, талбай, гудамж, тоглоомын талбайг мананцар үүсгэгч машинаар долдугаар сарын нэгэн хүртэл ариутгахаар төлөвлөжээ.

Гуравдугаар сарын 30-наас хойш эдгээр нийтийн эзэмшлийн талбайг мананцар үүсгэгч машинаар дөрвөн удаа ариутгаад байгаа аж.

Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр нийлэлийн удирдах ажилтнуудын шуурхай зөвлөгөөний үеэр ярихдаа, "1545 аж ахуйн нэгж, байгууллагад хяналт тавихад халдвар хамгааллын дэглэмийг зөрчсөн тохиолдол олон байна. Өчигдөр гэхэд 96 зөрчил илэрснээс 80-ыг нь газар дээр нь арилгууллаа” хэмээв. 

Нийслэлийн Засаг дарга бөгөөд Улаанбаатар хотын Захирагч Д.Сумъяабазар шуурхай зөвлөгөөний төгсгөлд нийтийн эзэмшлийн гудамж, зам, талбайн цэвэрлэгээг тогтмолжуулах, нийслэлийн нутаг дэвсгэрт үйл ажиллагаа эрхэлж байгаа аж ахуйн нэгж, байгууллагууд өөрсдийн эзэмшлийн 50 метр хүртэлх талбайд тохижилт хийхийг үүрэг болголоо.