Хүүхэд хамгааллын үйлчилгээг сайжруулж, хүүхдэд ээлтэй эрсдэлгүй орчин бүрдүүлэх, хүчирхийллээс урьдчилан сэргийлэх, таслан зогсооход олон нийтийн оролцоог нэмэхээр хүүхэд хамгааллын сайн дурын ажилтан бэлтгэх сургалтыг хоёр үе шаттай зохион байгууллаа.

Хөтөлбөрийн хүрээнд гамшиг, онцгой байдлын үед хүүхэд хамгааллын сайн дурын ажилтан ажиллуулах зөвлөмж боловсруулж, харьяа байгууллага болон сайн дурын үйл ажиллагаа явуулдаг иргэний нийгмийн байгууллагуудад хүргүүлнэ. Мөн сургалтад хамрагдсан сайн дурын ажилтнууд орон нутагтаа гэр бүл, хүүхдийн хүчирхийллийг багасгах, сайн дурын эргүүл ажиллуулах, хүүхдийн эсэн мэнд амьдрах, хөгжих, тоглох орчны аюулгүй байдлын эрсдэлийг тодорхойлон зураглал гаргах, холбогдох байгууллагад уламжлах зэрэг арга хэмжээ хэрэгжүүлнэ.

Дөрвөн өдрийн турш үргэлжилсэн сургалтыг Гэр бүл, хүүхэд, залуучуудын хөгжлийн газар НҮБ-ын Хүүхдийн Сангийн дэмжлэгээр "Бүгд залуусын төлөө, Залуус бүгдийн төлөө" төсөлтэй хамтран зохион байгуулжээ. МУБИС-ийн Нийгмийн ажлын тэнхимийн багш нар сургалт, арга зүйгээр дэмжлэг үзүүлэв.

Цаашид Хүүхдийн эрхийн тухай хууль, Хүүхэд хамгааллын тухай хууль, болон бусад холбогдох хууль тогтоомжийн хэрэгжилтийг хянах, олон нийтийн санаачилгыг өрнүүлэхэд хүүхэд хамгааллын сайн дурын ажилтны идэвх, оролцоо, санал санаачилгыг чиглүүлэн, хүүхэд хамгааллын тогтолцоог бэхжүүлэхэд хамтарч ажиллана.

Эхний шатны арга зүйн сургалтад Гэр бүл, хүүхэд, залуучуудын хөгжлийн газар, хэлтэс, Залуучуудын хөгжлийн төвүүдийн 100 орчим мэргэжилтэн, хоёрдугаар шатны сургалтад 18-аас дээш насны сайн дурын ажил хийх сонирхолтой 200 орчим иргэд хамрагдлаа. Оролцогчдод батламжийг цахимаар илгээж, баталгаажуулсан бүртгэлийн дугаараар сайн дурын ажлыг нь бүртгэх аж.