Төрийн байгуулалтын байнгны хорооны хуралдаанаар УИХ-ын сонгуулийн тухай хуулийн төслийн анхны хэлэлцүүлгийг хийж байна. Хуулийн төслөө анх өргөн барихдаа 50:26 гэсэн хувилбараар сонгууль явуулахаар тусгаад байсан юм. Гэвч анхны хэлэлцүүлэгт бэлтгэхийн өмнө эрх баригч МАН томсгосон 26 тойргоор сонгууль явуулах нь зүйтэй гэж үзээд байна. 

Д.Эрдэнэбат: -Ажлын хэсгийн бүрэлдэхүүнд орж ажилласан. АН-ын зүгээр оруулсан олон санал дэмжигдсэн гэдгийг хэлэх нь зөв байх. Гэхдээ зарим санал унасан. Тухайлбал, сонгогчид давхардуулж саналаа өгөхгүй байх нөхцөлийг бүрдүүлэх үүднээс өмнөх сонгуулиудад ашигладаг байсан шиг хуруунд нь тэмдэглэгээ хийх саналтай байна. 

УБЕ-ын дарга Б.Баасандорж: -2012 оны сонгуулиас хойш иргэд хурууны хээгээрээ бүртгүүлж саналаа өгдөг болсон. Тиймээс давхардал гарна гэсэн ойлголт байхгүй. Хүндэтгэх шалтгаанаар хурнууы хээ нь өөрчлөгдсөн тохиолдолд иргэний үнэмлэхийг нь шалгаж тулгана.

СЕХ-ны дарга Ч.Содонцэрэн: -Сонгогчдын хурууны хээнд тэмдэглээ хийдэг бэхийг Энэтхэгээс авдаг байсан. Ганцхан Энэтхэгт л үйлдвэрлэдэг байсан юм. Гэтэл үйлдвэр нь хаагдсан. Мөн энэ бэхийг онгоцоор тээвэрлэхийг хориглосон. Дээрээс нь энэ бэхэнд түлэгдсэн хүмүүс гомдол гаргаж байсаан. Бүр хүнд түлэгдсэн зарим хүн эмнэлгийн нотлох баримтаа авч ирээд СЕХ-ноос нөхөн төлбөр авсан. Энэтхэгийн үйлдвэрээс Афганистан, Монгол хоёр л энэ бэхийг авдаг байсан юм билээ. Манай улс 2008 оноос хойш аваагүй. Мөн Афганистан авахаа больсон учраас худалдан авагчгүй болж үйлдвэр нь хаагдсан гэсэн мэдээлэл авсан.