Монгол Улсын Ерөнхий сайд Л.Оюун-Эрдэнэ ДЦС-уудын өвөлжилтийн ажилтай өнөөдөр танилцлаа. Түүний очсон ДЦС-3 ТӨХК-д өргөтгөл шинэчлэлийн ажил ид өрнөж байна. Энд өндрийн станцыг 50 МВт-аар өргөтгөж, ингэснээр дундын дулааны ачааллыг өндөр рүү шилжүүлж дундын станцыг шинэчлэх дарааллаар ажиллаж буйг станцын удирдлага болон Эрчим хүчний сайд Н.Тавинбэх нар танилцууллаа.
ДЦС-3 нь нийслэлийн цахилгаан дулаан эрчим хүчний 32 хувийг хангадаг, хуучин Тээврийн товчооноос Сансарын туннель хүртэл нийслэлийн төвийн хэсгийн дулааныг магистрал шугамаар дамжуулдаг хуваарьтай. Одоо эрчим хүч, цахилгаан дулааны 5 дахь эх үүсвэр болгохоор шинэчлэн өргөтгөж байна. Эрчим хүчний сайд Н.Тавинбэх хэлэхдээ, "Станцын үндсэн хийцүүдийн ашиглалтын хугацаа ерөнхийдөө дуусаж байгаа. ДЦС-3 1966-1968 онд ашиглалтад орж байсан.
Тиймээс станцын үйл ажиллагаа хэзээ ч зогсоход бэлэн байгаа. Турбо генератор 220 мянган цаг буюу 25 жилийн хугацаатай ажиллах ёстой байдаг. Одоо 220-240 мянган цаг ажиллаад байгаа. Тийм учир бидэнд өнөөдөр станцын үйл ажиллагаа зогсохоос өмнө урьдчилан шинэтгэж чадах уу, эсвэл станц өөрөө зогсох уу гэсэн нөхцөл байдалтай тулгараад байна. Станц хуучирсан учир сэлбэг материал олдохгүй байгаа”-г тодотголоо.
Цахилгаан эрчим хүчний хэрэглээ өнөөдөр манай улсад үйлдвэрлэлээсээ даваад байна. Ялангуяа өвлийн ид оргил ачааллын үед ийм байдал үүсэхээр байна. Үүнийг шийдэх гол арга нь эрчим хүчний шинэ эх үүсвэрийг бий болгож ашиглалтад оруулах явдал гэдгийг Эрчим хүчний сайд Н.Тавинбэх онцолж байна. Энэ талаар Засгийн газрын мөрийн хөтөлбөрт тусгасан шинэ эх үүсвэр дээр эрчимтэй ажиллаж байна. Эрдэнэбүрэнгийн ДЦС дээр гүйцэтгэгчээ шалгаруулаад байна. Тавантолгойн ДЦС-ын тендэрийг зарлаад байна. Нийслэлд 200 мегаватт цагийн баттерей цэнэгт хураагуурын үнэлгээний ажлыг хийж байна.
Одоо байгаа эх үүсвэрүүдийн хүчин чадлыг өргөтөн нэмэгдүүлэхээр ажиллаж байна. Энд 4 ажил төлөвлөснөөс 3-ыг нь гүйцэтгээд буйг мэдээллээ. Одоо үүсээд буй нөхцөл байдалд хэрэглээгээ хэрхэн хангах гэдэг дээр ажиллаж байна. ОХУ-аас авах чадлын хэмжээг 100 мегаваттаар өргөтгөх нь өнөөдөр бидэнд байгаа хамгийн ойрын хувилбарт ажил болоод байна. Ирэх сарын 15 гэхэд өргөтгөх ажлыг дуусгаж хүчин чадлын хэмжээг нэмэгдүүлнэ гэдгийг мэдээллээ.
Ерөнхий сайд Л.Оюун-Эрдэнэ ДЦС-4 ТӨХК-ийн ажил байдалтай танилцах үеэр Ерөнхий сайдын хувьд эрчим хүчний салбарынхныг дархлаажуулалтын вакцины гуравдугаар тунд хамрагдахыг уриаллаа. Тэрээр, "Нэмэлт тунгийн хамрагдалт сайн биш байгаа учраас миний бие ААН-үүдтэй биечлэн уулзаж, заримтай нь утсаар холбогдож байна. Манай улсын хувьд вакцинжуулалтаар Азид тэргүүлж байгаа. Тиймээс бусад улс, орноос эдийн засгаа эхэлж нээж, том төслүүдээ хөдөлгөх боломж манайд бий. Бид өндөржүүлсэн бэлэн байдлын зэргийг нэг шат сулруулсан. Гуравдугаар тун 50 хувьд хүрвэл шар түвшин рүү шилжинэ. Тиймээс олон ажилчинтай байгууллагууд 3-р тунгаа хийлгэх нь чухал байна" гэдгийг онцоллоо.
Түүнчлэн "Ерөнхий сайдын хувьд өнөөдөр анхны төсвөө УИХ-аар батлууллаа. Энэ удаагийн төсөвт 3 агуулгыг онцолсон. Нэгдүгээрт, эрчим хүчний чадавхыг анхаарсан төсөв боллоо. Хоёрдугаарт, хилийн боомтуудыг авто болон төмөр замтай холбох, гуравдугаарт, Улаанбаатар хотын түгжрэлийн үндсэн шийдлийг гаргахад чиглэсэн онцлогтой төсөв баталсан"-ыг тодотгов.