Нийслэлийн Гачуурт тосгонд чацаргана боловсруулах үйлдвэрийг нээлээ. Жилд 600 тонн чацаргана боловсруулж дотоод, гадаадын зах зээлд нийлүүлэх тус үйлдвэрийг олон улсын "Ногоон Ази сүлжээ” ТББ-аас хэрэгжүүлж буй "Жимс, жимсгэнэ боловсруулах үйлдвэр”-ийн төслийн хүрээнд байгуулжээ. Төслийг 2019 оноос эхлэн хэрэгжүүлж өдгөө "Жимс, жимсгэнэ тариалан эрхлэгчдийн сургалт үйлдвэрлэлийн төв”-ийг нийслэлийн Хүнс, ХАА-н газартай хамтран байгуулан үйл ажиллагаагаа эхлүүллээ.
Үйлдвэрийн нээлтийн үеэр нийслэлийн Хүнс, хөдөө аж ахуйн газрын орлогч дарга Д.Пүрэвсүрэн, тус үйлдвэрт нийслэл хотын чацаргана тариалдаг иргэд түүхий эд нийлүүлж болно гэдгийг мэдээллээ. Төслийг БНСУ-ын олон улсын хамтын ажиллагааны КОЙКА байгууллага санхүүжүүлжээ. Төслийн эхний шатанд барилгыг хүлээлгэн өгч, үйлдвэрлэлийн үйл ажиллагааг эхлүүлж буй бол хоёр дахь шатанд буюу 2022-2024 онд бүтээгдэхүүн хөгжүүлэлт, дотоод гадаадын зах зээлд нэвтрүүлэх ажлыг хийхээр төлөвлөжээ.
БНСУ-ын олон улсын КОЙКА байгууллагын Монгол дахь суурин төлөөлөгч Ким Жун Му хэлэхдээ, "Манай байгууллага Монгол Улсын Засгийн газартай "Алсын хараа-2050” бодлогын хүрээнд зам тээвэр, ХАА зэрэг олон салбарт төсөл хөтөлбөр хэрэгжүүлэн хамтран ажиллаж байна. Монголын чацаргана хүний биед нэн чухал хэрэгтэй витамин эрдэс бодисоор баялаг. Тиймээс энэ төсөл маань цаашид үр дүнтэй хэрэгжиж, чацарганаа үр ашигтай боловсруулж, илүү том үйлдвэр болгоно гэдэгт итгэж байна. Үйлдвэрээр дамжуулан аймаг, орон нутгийн иргэдийн аж амьдрал дээшилж, орлого нэмэгдэнэ. Үйлдвэрийн үйл ажиллагаа жигдэрч, тарьж ургуулсан чацарганаараа брэнд бүтээгдэхүүн гаргаж, Монголын зах зээлээс гадна гадаадын зах зээлд гарах цаг удахгүй гэдэгт итгэлтэй байна” гэв.
"Жимс, жимсгэнэ боловсруулах үйлдвэр”-ийн төслийг хэрэгжүүлж буй "Ногоон Ази Сүлжээ” ТББ нь 2007 онд Монгол дахь төлөөлөгчийн газрыг байгуулж, уур амьсгалын өөрчлөлтөөс үүссэн цөлжилт, шар шуурганы эсрэг ойжуулалтын жишиг загвар бүхий 700 га талбайд 800 000 гаруй модыг тарьж арчлан хамгаалж байна. Монгол орны 8 байршилд ойжуулалтын төслийг амжилттай хэрэгжүүлснээр орон нутагт иргэд хүлэмжийн аж ахуй, мод үржүүлэг, чацарганы тариаланг эрхлэн таримал ойн ашиг шимийг хүртэж, өрхийн орлогыг нэмэгдүүлэх замаар орон нутгийн тогтвортой хөгжлийн зорилтыг ханган ажиллаж байгаа юм.