Австралийн Шинэ Өмнөд Уэльсийн их сургуулийн судлаачид "COVID-19”-ийн вакцины коронавирусний эсрэг үйлчлэлийг нь хадгалахын тулд нэмэлт тунг тариулах шаардлагатай болохыг тогтоосноо пүрэв гарагт мэдээлжээ.
"Lancet Microbe” сэтгүүлд нийтэлж, олон нийтэд танилцуулсан энэхүү судалгаа нь вакцины үр дүнг урьдчилан таамагласан анхны бөгөөд хамгийн том судалгаа болж байна. Тодруулбал, вакцины үр дүнг 50-иас дээш хувьд байлгахын тулд нэмэлт тунг эхний хоёр тунг хийлгэснээс нэг жилийн дотор тариулах шаардлагатай байна.
Энэхүү судалгааг ахлан явуулсан, Шинэ Өмнөд Уэльсийн их сургуулийн "Kirby” хүрээлэнгийн Халдварын тархвар судлал, бодлогын шинжилгээний бүлгийн дарга, доктор Дебора Кромерын ярьснаар, халдварлах чадвар өндөр "Дельта” гэх мэт шинэ хувилбарууд цаг хугацааны явцад вакциныг тэсвэрлэх чадвар нь улам нэмэгдэж буй байдал ажиглагджээ.
Тэрбээр үргэлжлүүлэн хэлэхдээ, "Энэхүү судалгаагаар Дельта” тэргүүтэй бусад хувилбарын улмаас халдварын эсрэг вакцины үйлчлэл буурч байгааг тогтоосон. Цаашлаад энэ үр дүн цаг хугацаа өнгөрөх тусам багасна. Бид энэ бууралтыг эсрэг биетийн түвшний дүн шинжилгээнд үндэслэн урьдчилан таамагласан” гэв.
Улс орнууд хүн амынхаа вакцинд хамрагдсан үзүүлэлтүүдийг өндөр байлгахыг зорьж байгаа энэ үед ийм судалгаа нь ихээхэн ач холбогдолтой болохыг тэрбээр онцлоод, нэмэлт тун хийлгэхгүй бол "COVID-19”-өөр халдварлан шинж тэмдэг илрэхээс хамгаалах вакцины үйлчлэл нь зургаан сарын дараа 50 хувиас доошилж буурч магадгүй хэмээн хэлжээ.
Австралийн Эрүүл мэндийн яам 11 дүгээр сарын 9-ний өдрөөс эхлэн иргэддээ вакцины нэмэлт тунд хамрагдахыг санал болгож эхэлсэн ч эрх баригчид үүнийг вакцинд бүрэн хамрагдсан хэмээн үзэх нөхцөлд оруулах эсэх талаар хараахан хэлэлцээгүй байгаа юм.
"Бидний харж байгаачлан "Дельта” шиг халдварлах, өвчлүүлэх чадвар өөр өөр шинэ хувилбарууд цаашид шинээр бий болох учир энэхүү судалгаа нь "COVID-19”-ийн омгуудын эсрэг вакцины үр дүнг үнэлэх үндэс суурийг тавьж байна” гэж Сиднейн их сургуулийн профессор Жейми Трикас ярьжээ.