Сар шинийн баяраас өмнө буюу энэ долоо хоногт багтаан банкууд тэтгэврийн зээлийг тэглэхээр боллоо. Нийгмийн хамгаалал, хөдөлмөрийн сайдаар ахлуулсан ажлын хэсэг шийдэлд хүрснээ өчигдөр мэдээлсэн юм. Ингэснээр "Эрдэнэс Монгол” ХХК-иас гаргаж, Хөгжлийн банкаар баталгаажуулсан бондыг банкууд хүлээн авч, зээлтэй ахмадуудын зургаа хүртэл сая төгрөгийн зээлийг тэглэн бичилтээ хийх аж. УИХ-аас баталсан хуулийн дагуу энэ оны нэгдүгээр сараас тэтгэврийн зээл тэглэсэнд тооцож, ахмадуудын эхний хоёр сарын тэтгэврийг олгоод байсан юм. Тэгвэл одоо банкууд бонд хүлээн авснаар зээл тэглэх ажил бүрэн дуусах нь. Салхитын мөнгөний ордыг эзэмшиж байсан GPF компани Нийслэлийн захиргааны хэргийн анхан шатны шүүхэд гаргасан бүх нэхэмжлэхээсээ татгалзсан тухай албан бичгээ "Эрдэнэс Силвер Ресурс” ХХК-д гаргаж өгснөөр эзэмшлийн асуудал цэгцэрсэн байна. Ингээд тус компани төрийн мэдэлд 100 хувь очсон ордын ТЭЗҮ-ийг богино хугацаанд гаргаж, татварын дараах орлого болох 569 тэрбум төгрөгийн цэвэр ашгийг 2-3 дахин нэмэгдүүлэх боломж хайн ажиллаж байгааг гүйцэтгэх захирал Т.Мөнхбаяр онцолсон. "Эрдэнэс Монгол” ХХК таван жилийн хугацаатай, зургаан хувийн хүүтэй бонд гаргах асуудал шийдэлд хүрлээ. Гэхдээ жигнэсэн дундаж хүү нь 16 хувь байсан тэтгэврийн зээлийг зургаан хувийн хүүтэй активаар солиход үүсэх ашиг, алдагдлын зөрүүг Монголбанкны зохистой харьцааны шалгуурт хэрхэн нийцүүлэх талаар банкуудтай удаан хугацааны хэлцэл хийсний эцэст шийдэлд хүрч, баланс дээр тэтгэврийн зээлийг тэглэхээр болсныг Монголбанкны ерөнхийлөгч Б.Лхагвасүрэн хэлсэн юм. Цаашид зургаа хүртэл сарын хугацаатай тэтгэврийн зээл олгох асуудлыг ярилцаж байгаа, гэхдээ хүүгүй байх хувилбарыг төв банкнаас зүтгүүлж байна. Тухайн банкны тайлан тэнцлээс хамаарч зээлийн шимтгэл, хураамж авах хэлбэрээр тэтгэврийн зээл олгох асуудлыг судалж байгаа гэв. Ийнхүү тэтгэврийн зээл тэглэлт баланс дээр бичигдэж, албан ёсоор дуусгавар болох ажилд "Хаан” болон "Төрийн банк”-ны төлөөлөл оролцсон олон удаагийн уулзалт хэлэлцээрийн дараа хууль бүрэн хэрэгжих боллоо. Хаан банк 2.4 сая хадгаламж эзэмшигчдийнхээ эрх ашигт нийцүүлж, тэдэнд хохиролгүйгээр уг асуудлыг шийдвэрлэхийг эрмэлзсэн бөгөөд хоёрдугаар сард багтааж хуульд заасан шалгуур бүхий тэтгэврийн зээлийг бүрэн тэглэж, гуравдугаар сараас ахмадуудад тэтгэвэр олгоод жигдэрнэ гэдгээ тус банкны төлөөлөл илэрхийлсэн. Түүнчлэн 160 мянга орчим ахмад тэтгэврээ авдаг Төрийн банкны гүйцэтгэх захирал Г.Дөлгөөн "Нийт 223 тэрбум төгрөгийн тэтгэврийн зээл байгаагаас УИХ-аас гаргасан хуулийн дагуу 180 орчим тэрбум төгрөгийн зээл тэглэнэ” гэдгээ илэрхийллээ. Тэд Засгийн газартай хийх дараа дараагийн хэлцлийг амжилттай болно гэж найдаж буйгаа илэрхийлсэн. Энэ хуулийн хүрээнд нийт 695 тэрбум төгрөгийн гэрээг арилжааны банкуудтай хийж, тэтгэврийн зээл аваагүй ахмадуудад үнэт цаас олгох ажлыг үргэлжлүүлж байгааг "Эрдэнэс Монгол” ХХК-ийн гүйцэтгэх захирал П.Ганхүү хэлсэн. Ийнхүү 16 хувийн хүүтэй санхүүгийн бүтээгдэхүүнийг зургаан хувийн бондоор сольсон нь банкуудын хувьд алдагдалтай ч нийгмийн хариуцлагын хүрээнд гаргасан чухал шийдвэр болохыг УИХ-ын дарга Г.Занданшатар онцолж талархлаа илэрхийлсэн юм.