НҮБ-ын Хүний эрхийн зөвлөлийн чуулган Швейцарийн Женев хотноо 2 дугаар сарын 24-нөөс 3 дугаар сарын 20-нд болж байна. Тус чуулганы өчигдрийн хуралдаанаар, Монгол Улсад ажилласан НҮБ-ын шинжээч, тусгай илтгэгч тайлангаа танилцуулав. 

Бие даасан шинжээч Хуан Пабло Богославски ноднин есдүгээр сарын 2-11-нд Монгол Улсад ажилласан бөгөөд тэрээр тайландаа Монгол Улсын Засгийн газар хамтран ажилласанд талархал илэрхийлэхийн сацуу Монгол Улс НҮБ-ын Хүний эрхийн зөвлөлийн илтгэгч, шинжээч нартай сайн хамтран ажиллаж байгаагийн үлгэр жишээ болж байгааг сайшаав. Тэрбээр, "Монгол Улсын гадаад өр сүүлийн жилүүдэд мэдэгдэхүйц багассан ч иргэд, аж ахуйн нэгжийн гадаад өр их хэвээр байгаагаас эдийн засагт сорилт тулгарч болзошгүйг анхааруулав. Түүнчлэн Монгол Улсын нийгэм, эдийн засгийн хөгжилд уул уурхайн салбар чухал түлхэц болох учиртай бөгөөд хөгжлийн үр шим хүн амын бүх бүлэгт тэгш хүрэхээс гадна байгаль орчин, бэлчээр, нүүдлийн аж ахуйн өвийг харгалзах учиртайг онцлов. Монгол Улс эдийн засгийн тогтвортой байдлыг хангах, уул уурхайн хишгийг шударгаар хуваарилах хэд хэдэн сан байгуулсныг сайшаав.

Хүний эрхийн хамгаалагчийн асуудал хариуцсан НҮБ-ын тусгай илтгэгч М.Форст, Монгол Улс Хүний эрхийн хамгаалагчийн эрх зүйн байдлын тухай хуулийн төслийг хэлэлцэж байгааг сайшаан тэмдэглэв. Хүний эрхийн хамгаалагчдын хувьд, Монгол Улс харьцангуй аюулгүй орчинтой ч, хүний эрхийн хамгаалагчдын ажлыг хөхиүлэн дэмждэг, тэдэнд боломж олгодог, эрхийг нь бүрэн эдлүүлдэг таатай орчин бүрдүүлээгүй байна” хэмээн мэдэгдлээ.

Бие даасан шинжээч, Тусгай илтгэгч нарын тайлантай холбогдуулан манай төлөөлөгч байр сууриа илэрхийлж, Монгол Улсын хэрэгжүүлж байгаа бодлогын талаар мэдээлэв. Үүний дараа Бие даасан шинжээч Х.П.Богославски Хүний эрхийн зөвлөлийн индрээс Монгол Улс өгсөн зөвлөмжийг нь хэрэгжүүлэхээр дорвитой арга хэмжээ авсанд талархав. Тусгай илтгэгч М.Форст тайлан болон мандатыг нь дэмжсэнд манай талд мөн талархаад, Хүний эрхийн хамгаалагчийн эрх зүйн байдлын тухай хуулийн төслийг батлуулахад дэмжиж ажиллахад бэлэн байгаагаа мэдэгдэв. Хэрэв Монгол Улс энэ хуулийг баталбал, Азид хүний эрхийн хамгаалагчийн асуудлаар тусгайлан хууль баталсан анхны улс болж, бусад улс оронд үлгэр жишээ болохыг тэрээр онцоллоо.