Хонконгт коронавирусний халдвар авсан өвчтөний нохойноос халдвар илэрснээр уг халдвар хүнээс амьтанд халдварласан анхны тохиолдол бүртгэгдлээ гэж Хонконгийн Хөдөө аж ахуй, загас агнуур болон байгаль орчныг хамгаалах газар мэдээлжээ.

"Pomeranian” үүлдрийн 17 настай нохойн хамар, амнаас авсан сорьцоос коронавирусний шинжилгээ авахад "сул эерэг” хариу гарсны дараа цусны шинжилгээ авахад коронавирусний халдвар авсан нь тогтоогдсон байна.

"Гэрийн тэжээмэл амьтанд коронавирусний халдвар илэрсэн анхны тохиолдол энэ байх магадлалтай. Мэргэжилтнүүд уг нохойг эзнээсээ халдвар авсан хэмээн таамаглаж байгаа бөгөөд энэ талаарх мэдээллүүдийг Дэлхийн мал амьтны эрүүл мэндийн байгууллагад хүргүүлсэн” гэж Хөдөө аж ахуй, загас агнуур болон байгаль орчныг хамгаалах газрын төлөөлөгч Томас Сит сэтгүүлчдэд мэдээлжээ.

Халдварын шинж тэмдэг илрээгүй байгаа уг нохойн шинжилгээний хариуг сөрөг гарсан даруйд эзэнд нь хүлээлгэн өгөх аж.

"Гэрийн тэжээмэл амьтад коронавирусээр халдварладгийг нотлох баримт байхгүй хэдий ч хүнээс амьтанд халдвар тараахаас урьдчилан сэргийлэхийн тулд амьтадтайгаа харьцахдаа ариун цэврээ сайтар сахихыг зөвлөж байна” гэж Т.Сит хэлжээ.