Францын шигшээ болон "Нант” багийн гандболч Сирил Дюмулан эд зүйлээ дуудлага худалдаагаар зарж, мөнгийг нь эмнэлгүүдэд ханивласнаас хойш спортын одод түүний жишээг дагаж байна. Энэ сайхан үйлсэд нэгдсэн тамирчид болон цар тахлын эсрэг тэмцэлд зориулсан эд зүйлсийнх нь талаар танилцуулъя.

Рейнольд Денуэкс -2000-2001 оны Францын АШТ-ий алтан медаль

Францад болж байгаа дуудлага худалдааны мэдээллээс эхлээд хүргэе. Рейнальд Денуэкс "Нант” багтайгаа 2000-2001 оны УАШТ-ээс хүртсэн алтан медалиа дуудлага худалдаагаар заржээ. Тэрээр тэгэхэд оны шилдэг дасгалжуулагчаар мөн шалгарсан байдаг. Түүнээс хойш "Нант” УАШТ-дээ нэг ч түрүүлээгүй байгаа гэхээр энэ медаль хэр чухал болох нь тодорхой. Гэсэн ч цар тахалтай тэмцэхэд хандивлажээ. Түүний энэ сайхан сэтгэлийн хариу бүр ч сайхан. Хөгжөөн дэмжигчид нь 13 000 евро цуглуулан медалийг авч, эзэнд нь буцаан бэлэглэжээ.

 Федерика Пеллегрини-2008 оны олимпод түрүүлэхдээ зүүж байсан нүдний шил

 Усанд сэлэлтийн төрлөөр "Бээжин 2008” олимпод түрүүлсэн Федерика Пеллегрини 59 эд зүйлсээ дуудлага худалдаанд тавьжээ. Тэдгээрийн дотор 2008 оны олимпод түрүүлэхдээ болон 2009 оны ДАШТ-д дэлхийн дээд амжилт тогтоохдоо зүүж байсан нүдний шил нь байгаа гэнэ. 59 эд зүйлсийг зарж олсон орлогыг Бергамо хотын эмнэлэгт хандивлах юм байна.

Виктория Азаренко-Гарын үсэгтэй пүүз

Виктория Азаренко гарын үсэгтэй пүүзээ дуудлага худалдаанд тавьжээ. Эхний дуудах үнэ нь 800 ам.доллар. Орлого нь коронавирустэй тэмцэх Майамигийн санд орох юм байна.

Рафаэль Надаль-Францын нээлттэй тэмцээнд түрүүлэхдээ өмсөж байсан цамц

Испанийн теннисчин Рафаэль Надаль 2019 оны Францын нээлттэй тэмцээнд түрүүлэхдээ өмсч байсан цамцаа 22.4 мянган ам.доллараар зарж, мөнгийг нь цар тахлын улмаас хүнд байдалд орсон ядуу өрхүүдэд тусламж болгож өгчээ.

К.Бензема, Н.Канте, М.Льоренте-Хөлбөмбөгчид өмсгөлөө хандивлаж байна

Тоглолтын хувцсаа дуудлага худалдаагаар зарах нь хөлбөмбөгчдийн хувьд хамгийн түгээмэл болоод байна. Одоогоор Карим Бензема "Реал” багт өмсдөг өмсгөлөө зарж Парисын эмнэлгүүдэд хандивласан. "Атлетико”-гийн Маркос Льоренте энэ жилийн "Аваргуудын лиг”-т "Ливерпүүл”-ийг "гол гаргахдаа” өмсч байсан өмсгөлөө зарсан бол Тьерри Анри "Арсенал”-д 100 дахь гоолоо оруулахдаа өмсөж байсан футболкоо 16100 еврогоор заржээ. Тэрээр тоглолтын дараа өрсөлдөгч "Бирмингем” багийн Робби Сэвижтэй өмсгөлөө солилцсон байж. Гэсэн ч уулзаж ярилцаад хоёул өмсгөлөө зарсан аж.  

Дээрхээс гадна Р.Левандовски, Ю.Дракслер, Н.Канте, М.Менди, Б.Павар тэргүүтэй олон хөлбөмбөгчийн өмсгөл дуудлага худалдаанд байна.

Мартен Фуркад-Дэлхийн цомыг тэргүүлэгчийн шар өмсгөл

 Олимпийн таван удаагийн аварга биатлонч Мартен Фуркад К.Бензема, Н.Канте нар өмсгөлөө худалдсан тэр дуудлага худалдаанд Дэлхийн цомыг тэргүүлэгчийн хувиар өмсөж байсан шар өмсгөлөө тавьсан. Дуудлага худалдаанд тавигдсан 89 эд зүйлс нийт 1007 мянган евро болсон байна. М.Фуркадын өмсгөл 12 200 еврогоор зарагджээ. Уулын цаначин Алексис Пинтурогийн дуулга хамгийн өндөр буюу 19 600 еврогоор зарагджээ.

Альберто Контадор-Жирод унаж түрүүлсэн дугуй

Альберто Контадор-2011 онд Жиро Д Итали уралдаанд түрүүлэхдээ унаж байсан дугуйгаа дуудлага худалдаанд тавьсан байна. Тэрээр түрүүгээ допингийн улмаас хүчингүй болгуулсан юм.

 

Испанийн сагсан бөмбөгчид-ДАШТ, ЕАШТ-ий алтан медаль

Испанийн сагсанбөмбөгийн эрэгтэйчүүдийн шигшээ багийн довтлогч Хавьер Бейран, эмэгтэйчүүдийн шигшээ багийн хамгаалагч Марта Саргай нар 2019 оны ДАШТ, ЕАШТ-ий алтан медалиудаа буяны үйлсэд хандивлахаар дуудлага худалдаанд тавьжээ.