Шүүхийн ерөнхий зөвлөлөөс сонгуульд нэр дэвшигчидтэй холбоотой хэргүүдийн талаар мэдээлэл хийлээ. Энэ үеэр Захиргааны хэргийн шүүхийн шатанд байгаа хэргүүдийн талаар нийслэл дэх Захиргааны хэргийн анхан шатны шүүхийн Олон нийттэй харилцах мэргэжилтэн Амаржаргал мэдээлэл өглөө.Тэрээр "Сонгуулийн маргаан харьяаллын дагуу захиргааны хэргийн давж заалдах шатны шүүхэд анхан шатны журмаар хянан шийдвэрлэгддэг. Өнөөдрийн байдлаар нийслэл дэх Захиргааны хэргийн давж заалдах шатны шүүхэд 10 нэхэмжлэл ирсэн байна. Эдгээрээс шийдвэрлэсэн гурав, татгалзсан дөрөв, хэрэг хянан шийдвэрлэх ажиллагаанд хоёр, хуулийн хугацаанд байгаа нэхэмжлэл нэг байна. Сонгуулийн тухай маргааныг шийдвэрлэх хугацаа нь 30 хоног байдаг.
Хэрэг хянан шийдвэрлэх ажиллагаанд байгаа хоёр хэргээс дурдвал, өнөөдөр Захиргааны хэргийн давж заалдах шатны шүүхэд Н.Энхбаярын нэхэмжлэлтэй СЕХ-нд холбогдох хэргийн шүүх хурал товлох урьдчилсан хэлэлцүүлэг болсон. Хурлаар шүүх хурлыг 2020 оны зургадугаар сарын 19-ний 15.30 цагт товлон зарласан” гэсэн юм.
Харин УИХ-ын сонгуульд нэр дэвшигчдийн холбогдсон эрүүгийн хэргийн талаар Сүхбаатар, Чингэлтэй, Баянзүрх дүүргийн эрүүгийн хэргийн анхан шатны шүүхийн Олон нийттэй харилцах мэргэжилтэн Гэрэлтуяа мэдээлэл өгөв. Тэрээр "Олны анхаарал татсан долоон хэргийн талаар мэдээлэл өгье. Нийслэлийн прокурорын газраас яллах дүгнэлт үйлдэж ирүүлсэн УИХ-ын гишүүн Б.Ундармаад холбогдох хэргийг шүүх хүлээж авсан. Өнөөдрийн байдлаар хуралдааны тов гараагүй байна.
Сүхбаатар дүүргийн эрүүгийн хэргийн анхан шатны шүүхэд Ж.Эрдэнэбат нарт холбогдох хэргийн шүүх хурлыг зургадугаар сарын 16-нд товлосон.
Мөн нэр дэвшигч Д.Эрдэнэбат нар холбогдох хэргийн урьдчилсан хэлэлцүүлгээр яллагдагч нарыг шүүхэд шилжүүлж, гэм буруугийн шүүх хуралдааны зургадугаар сарын 16-нд товлосон.
Чингэлтэй дүүргийн шүүхийн хувьд Э.Бат-Үүл нарт холбогдох хэргийн урьдчилсан хэлэлцүүлэг хоёр удаа хойшилж, хуралдсан. Улмаар яллагдагч нарыг шүүхэд шилжүүлж гэм буруугийн шүүх хуралдааныг зургаадугаар сарын 29-нд хийх тов гарсан.
С.Баяр нарт холбогдох эрүүгийн хэргийн шүүх хуралдаан өнөөдөр боллоо. Шүүгдэгчдийн өмгөөлөгчдийн хүсэлтээр шүүх хуралдааныг зургадугаар сарын 18-нд болгож хойшлууллаа. Ингэхдээ шүүгдэгч нарт авсан таслан сэргийлэх арга хэмжээг өөрчиллөө. Шүүгдэгч С.Баярцогтод 10 тэрбум, С.Баярт таван тэрбум төгрөгийн барьцаа авах таслан сэргийлэх арга хэмжээ авахаар шийдвэрлэв.
Н.Номтойбаярт холбогдох хэргийн шүүх хурлыг өмгөөлөгч нарын хүсэлтийн дагуу зургадугаар сарын 17 хүртэл хойшлуулсан. Ингэхдээ шүүгдэгчид авсан таслан сэргийлэх ажиллагааг хэвээр үлдээсэн.
Түүнчлэн Х.Бат-Ялалтад холбогдох хэргийн шүүх хуралдаан гурван удаа хойшилсон бөгөөд зургадугаар сарын 17-нд болох тов гарсан” гэлээ.