Тэрбээр 2016 оноос хойш Монголбанкны Ахлах хянан шалгагчаар томилогдон ажилласан бөгөөд мөн Хадгаламжийн даатгалын корпорацийн Үндэсний хорооны гишүүн юм.

Түүнд 2019 оны сүүлчээр корпорацийн захирал нь орон сууцны 45 сая төгрөгийн дэмжлэг үзүүлжээ. Энэ нь бараг шинэ жилийн баярын бэлэг бололтой. Уг нь Д.Ганбат нь дэмжлэгээр дутахааргүй бэлтэй нэгэн болохыг түүний хөрөнгө орлогын мэдүүлэг гэрчилдэг юм.

Түүний жилийн орлого 2017 онд 93 орчим сая төгрөг байсан бол 2018 онд 228.3 сая, 2019 онд 142.8 сая төгрөг болжээ. Өөрөөр хэлбэл, өнгөрсөн жил буюу байрны 45 сая төгрөгийн дэмжлэг авах үедээ сард 12 орчим сая төгрөгийн орлоготой байв. Гэр бүлийнх нь орлого өнгөрсөн жил 208 сая төгрөг байсан. Д.Ганбатынх 2015 онд 6, 2017 онд 5, 2018 онд 4, 2019 онд 5 орон сууцтай гэж мэдүүлжээ. Мөн үйлчилгээний зориулалттай 4 объекттой, T.Camry маркын 1 суудлын автомашинтай, 50 сая төгрөгийн үнэлгээ бүхий 5га газартай, 174.7 сая төгрөгийн хадгаламжтай, 550 сая төгрөгийн авлага, 786 сая төгрөгийн өртэй юм байна. Бусад хөрөнгийг нь АТГ-ын xacxom.iaac.mn сайтаас үзэж болно.

Энэ бол орон сууцны дэмжлэг авсан хүний амьдралын бодит байдал. Энэ асуудлаар Шилэн Цогоо буюу Б.Цогтгэрэл байр сууриа илэрхийлж, шударга ёсыг нэхжээ.

Нэхэн сануулахад, Хадгаламжийн даатгалын корпорацийн гүйцэтгэх захирал Х.Бум-Эрдэнэд 45 сая төгрөгийг дэд захирал С.Дамдиндорж гаргаж өгсөн. Үүнийг мөн л орон сууцны нөхцөл сайжруулахад дэмжлэг үзүүлэх нэрээр "бэлэглэсэн" байдаг юм.  

Эх сурвалж: Bolod.mn