АН-ын дотоод нөхцөл байдал улам л хүндэрч байгааг намын дарга асан С.Эрдэнэ хэвлэлээр зарлалаа. Учир нь, тус намын Үндэсний бодлогын хороо энэ сард хуралдаж, Их хурлынхаа товыг зарлахаар болсон. Ингэснээр намынхаа даргыг шинээр сонгоно. Түүнчлэн АН-ын Үндсэн дүрмийг шинэчлэхээр байгаа юм. Гэтэл шинээр боловсруулсан Үндсэн дүрэм өмнөхөөсөө дээрдсэн зүйлгүй, АН-ын одоогийн удирдлагуудын үйл ажиллагаа ч дүрмийн бус байна гэж намынх нь гишүүд үзэж байгаа ажээ. Энэ тухайд АН-ын даргын ажлаа өгөөд удаагүй байгаа С.Эрдэнэ байр сууриа илэрхийллээ. 

Тодруулбал, тэрбээр "Миний хувьд АН-ын Үндсэн дүрэмд заасны дагуу хариуцлагаа хүлээж огцорсноо мэдэгдсэн. Нэгэнт тамгаа шилжүүлээд өгчихсөн, ёс зүйн хариуцлага хүлээнэ гэдэг шийдвэрээ гарсан учраас хүлээцтэй хандаад, аливаад өнөөдрийг хүртэл дуугүй явж байна. Гэхдээ ямар ч зүйлд хэмжээ бий. Өнөөдөр дуугүй байхад хэцүү болж байна. 

Учир нь, бодит байдал дээр АН-ын нөхцөл байдал улам л хүндэрсэн. Нэгэнт өөрчилнө, шинэчилнэ, чадна гээд гараад ирчихсэн хүмүүст боломж олгох ёстой гэж бодож байгаа учраас дуугараагүй, оролцоогүй. Үнэхээр энэ намыг өөрчлөөд, үйл ажиллагааг нь эрчимжүүлээд явчих юм болов уу гэж харсан. Сонгуулиас хойш бараг хагас жилийн хугацаа өнгөрлөө. Намын үйл ажиллагаанд ямар ч өөрчлөлт гарсангүй. Би АН-ын гишүүн. Намын гишүүний хувьд Үндсэн дүрмээр эрх, үүргээ хэрэгжүүлэх боломжтой. Тиймдээ ч би дуугарах эрхтэй. Өнөөдөр АН-ын бүхий л үйл ажиллагаа дүрмийн бус байна. Үүнийг таслан зогсоох цаг нь болсон. 

АН Үндсэн дүрэмтэй юм бол түүнийхээ хүрээнд л ажиллах ёстой. Үндсэн дүрмийг өөрчлөх ажлын хэсэг байгуулж. Тэр ажлын хэсэг дотор ХҮН намд байсан, УИХ-д бие дааж нэр дэвшсэн хүн байна. Өөр намд, "гудамжинд” байсан хүмүүс гарч ирээд АН-ын Үндсэн дүрмийн өөрчлөлтийг гардаад, санаачлаад явж байгаа нь сонин харагдаад байгаа юм.

Яагаад заавал өөр намд байсан, эсвэл намынхаа үнэт зүйл үзэл санаанаас урваад, бие даагаад Үндсэн дүрэм зөрчөөд явчихсан хүмүүсийг оруулж ирж, намын амин судас болсон Үндсэн дүрмийн өөрчлөлтийг боловсруулах ажлын хэсэгт оруулж ажиллуулаад байгаа юм бэ. Энэ нөхцөл байдлыг хараад надад таатай санагдахгүй байгаа юм. Энэ мэтчилэн дуугарах зүйл олон бий. Үндсэн дүрмийн агуулгыг харахад тийм ч их шинэ зүйл байхгүй. Яг л хуучин шигээ явж байна” гэлээ.