Английн лигүүдийн наймааны цонх Улаанбаатарын цагаар өглөөний 07:00 цагт хаагдлаа. Цонх хаагдахаас өмнө Премьер лигийн томоохон багууд хэд хэдэн наймаа хийж амжсаны нэг нь Ливерпүүл клуб хоёр шинэ хамгаалагчийг авсан байна.

Тэд Чэмпионшип лигийн Престон Норт Энд багийн төвийн хамгаалагч Бэн Дэвисийг 500 мянган фунтээр авсан бөгөөд тоглогчийн ирээдүйгээс хамаарч 1.1 сая фунтыг нэмж төлөх юм байна. Уг наймааны хүрээнд залуу хамгаалагч Сепп ван ден Бергийг Престон клуб рүү зээлээр явуулжээ.

Мөн Германы Шальке клубийн төвийн хамгаалагч Озан Кабакыг зун хүртэл 1.1 сая фунтээр зээлээр авсан бөгөөд зээлийн хугацаа дуусахад худалдаж авах санал хүргүүлэх боломжтойгоор тохирчээ.

Виржил Ван Дайк, Жоел Матип, Жое Гомез гэсэн гарааны хамгаалагчдаа бэртэлд алдсан Ливерпүүлд төвийн хамгаалагч нэн хэрэгтэй байсан билээ.

Түүнчлэн Арсенал клуб хагас хамгаалагч Жое Виллокийг Ньюкасл клуб рүү зээлээр, хамгаалагч Эйнсли Майтланд Найлсыг Уэст Бром клуб рүү зээлээр, Шкодран Мустафиг Шальке клуб рүү бүр мөсөн явуулжээ.

Харин Лестер Сити клуб довтлогч Демарай Грейг Байар Леверкузен рүү, Манчестер Юнайтед клуб Факундо Пеллистриг Алавес рүү зээлээр, Эвертон клубд Ченк Тосуныг Бешиктас клуб рүү зээлээр, Уолвес клуб Патрик Кутроныг Валенсиа клуб рүү тус тус явуулсан байна.