Амьдралд заримдаа олон шалтгааны улмаас стрессдэх, сэтгэлээр унаж шаналах үе тохиодог. Энэ үед зөвхөн ганцаараа асуудлыг шийдэх гэж оролдох бус найз нөхөд, гэр бүлийнхэнтэйгээ мэдрэмжээ хуваалцаж, шаардлагатай тохиолдолд мэргэжлийн сэтгэл судлаачид хандах хэрэгтэй аж.

АМЬДРАЛЫН ХЭВ МАЯГАА ЗОРИГТОЙГООР ӨӨРЧИЛЖ СТРЕССТЭЙ НҮҮР ТУЛААРАЙ

Тогтмол дасгал хөдөлгөөн хийх нь таны сэтгэлзүйг өөдрөг байлгахад тустай. Усанд сэлэх, алхах, гүйх, иога хийх зэргээр өөрийнхөө дуртай спортоор өдөрт дор хаяж 30 минут хичээллээрэй. Алхах нь стресс тайлахад тустайгаас гадна 40-өөс дээш насныхан долоо хоногт 2 цаг 30 минут алхвал урт наслах магадлал 3-5 жилээр өсдөг байна.

ХАНГАЛТТАЙ САЙН УНТАЖ АМРАХ

Шөнийн нойроо сайн авах нь стрессээ хянахад тустай. Нойроо авч байх үед хүний бие энергиэ хуримтлуулж, өөртөө шинэчлэл хийж байдаг. Насанд хүрсэн хүмүүс өдөрт 7-8 цагийн нойр авах хэрэгтэй. Харин өсвөр насныхан болон хүүхдүүд өдөрт 9-10 цагийн нойр авах шаардлагатай. Та орой эрт орондоо орж, өглөө эрт босох дадалд суралцаарай.

ЗОХИСТОЙ ХООЛЛОХ

Таны бие стресст өртөхгүй байхын тулд эрүүл, хүчирхэг, аз жаргалтай байх хэрэгтэй. Тиймээс эрүүл зөв хоолоо биеэ цэнэглэх нь зүйтэй. Ингэхийн тулд кофеин болох архины хэрэглээг маш бага байлга. Ус сайн уугаарай. Ус дутагдсаны улмаас хүний бие стресст өртөх магадлал өндөр байдаг.

ТАЙВШРАХАД СУРАЛЦАХ

Өөрийгөө ямар ч үед тайвшруулж сурах нь стрессгүй байхын үндэс мөн. Гэхдээ таны стресс алга урвахтай адил хурдан алга болохгүй. Та тодорхой хэмжээний хугацааг зарцуулж байж стрессээс ангижирна.

Та өөрийгөө тайвшруулахын тулд сайхан хөгжим сонсож, халуун вантай усанд хэвтэж, өдрийн тэмдэглэл хөтлөх зэрэг олон аргыг хэрэглэж болно.

ИОГА БОЛОН БЯСАЛГАЛ ХИЙХ

Иога хийж, өдөр бүр сунгалтын дасгал хийх нь таныг оюун санаагаа цэгцлэхэд тустай. Бясалгал хийх нь стрессийг бууруулахад хамгийн их нөлөөтэй. Иога болон бясалгалыг хослуулах нь илүү үр дүн үзүүлнэ.

Оюун санаандаа очихыг хүссэн, өөрийнхөө хамгийн сэтгэл амар байж чадах газрыг төсөөлөөрэй. Ингэснээр та одоогийн нөхцөл байдлаас ангижирч чадна.

ХИЙХ ДУРТАЙ ЗҮЙЛЭЭ АЗ ЖАРГАЛТАЙГААР ХИЙ

Сэтгэл тавгүйтсэн үедээ өөрийнхөө дуртай зүйлийг хийх цаг гаргаж байгаарай. Энэ нь хөгжим тоглох, зурах, бичих, унших, хоол хийх, спортоор хичээллэх зэрэг юу ч байж болох юм. Та маш шахуу ажлын хуваарьтай бол дор хаяж арван минутыг дуртай зүйлдээ зарцуулаарай.

Стрессээс ангижрахад туслах энгийн зөвлөгөөнүүдийг нэмэлтээр хүргэж байна:

• Бохь зажлах нь стрессийг багасгахад нөлөөтэй. Зарим хүмүүс их идсэнийхээ дараа бохь зажилдаг шүү дээ.
• Ирээдүйд бүтээхийг зорьж буй сайхан зүйлийнхээ тухай төсөөлөн бод.
• Хэрэгтэй гэж үзвэл хүмүүсээс уучлал гуй. Энэ нь тухайн нөхцөл байдлыг улам хүнд болохоос сэргийлнэ. Хэн нэгний өмнө өөрийгөө буруутайгаар мэдэрч явах нь стресст өвдөлт нэмдэг.
• Нарны гэрэлд гарч байгаарай. Учир нь нарны гэрэл таныг улирлын чанартай сэтгэл гутралд өртөхөөс сэргийлнэ.
• Өөрийн сэтгэл хөдлөлөө шударгаар хүлээж ав. Сэтгэл хөдлөлөө хэт их удирдах гэж хичээх нь стрессийг нэмэгдүүлнэ. Уйлмаар байвал уйл. Цээжиндээ хөндүүр тээн явж болохгүй. Доторх мэдрэмж, сэтгэл хөдлөлөө асгартал гаргах хэрэгтэй.
• Таныг стресст өртүүлж буй зүйл тийм ч хэцүү зүйл биш байж болох юм. Харах өнцгөө өөрчлөөд нөгөө талаас нь бодоод үзээрэй.

Стрессээ үл тоож орхиж болохгүй. Юунаас болж  стресстэж байгаа шалтгаанаа тодорхойлж ол. Удаан хугацаанд стрессээ тэвчвэл та эрүүл мэндийн олон асуудалтай тулгарч магадгүй болно. Тиймээс таныг хүнд байдалд оруулаад буй стресстэй нүүр тулж, амьдралын хэв маягаа эрүүл байлгахад анхаараарай.