Оюутан залуус, нийгэмд эерэг өөрчлөлт авчрах Энтрепренеруудыг дэмжих Y4RP-2021 буюу "Бүс нутгийн энх тайван, хөгжилд залуучуудын оролцоо” 2021 төслийн уралдааны шалгаруулалт энэ сарын 6-нд боллоо.
Энэ жил уг уралдаанд 10 гаруй их дээд сургуулийн 35 баг, 105 оюутан залуучууд өрсөлдсөнөөс МУИС, СЭЗИС-ийн хамтарсан "Bright B” баг нэгдүгээр байрт, XYZ баг хоёрдугаар байрт, СЭЗИС-ийн Beta-18 баг гуравдугаар байрт тус тус шалгарчээ.
Энэ удаагийн уралдаанд гудамжны халдлагаас хамгаалах зорилготой "Your Guardian” аппликейшн хөгжүүлэх төсөл нэгдүгээр байр эзэлж, 1 сая төгрөг, өргөмжлөл, БНСУ-д болох Олон улсын форумд оролцох урилгаар шагнуулав. Харин "Харааны бэрхшээлтэй иргэдэд Уран зураг, галлерейг аудио хэлбэрээр сонсгох "Сүүдэрт үлдсэн бүтээл” аппликейшн хөгжүүлэх төсөл хоёрдугаар байрт шалгарч, 500 мянган төгрөг, өргөмжлөл, ургийн бичгийг цахимаар үүсгэх зорилготой USP –Аглаген аппликейшн хөгжүүлэх төсөл гуравдугаар байрт шалгарч 250 мянган төгрөг, өргөмжлөл хүртэв.
Энэхүү төсөлт илтгэлийн уралдааныг энэ жил 7 дахь жилдээ зохион байгуулсан юм. Энэхүү уралдаан нь бүс нутгийн энх тайван, хөгжил дэвшилд залуусыг идэвхтэй оролцуулах, тэдний санал санаачилга, хүсэл мөрөөдлийг нийгэмд бодитоор хэрэгжихэд дэмжих зорилготой юм.
"Bright B” багийн гишүүд Б.Оюунбилиг, "Манай төслийн онцлог нь гудамжны халдлагаас хамгаалахад чиглэсэн анхдагч гэдэг утгаараа шинэлэг болсон. Өөр ийм төрлийн төслүүдтэй харьцуулахад манай апп илүү сэтгэлзүй талруугаа, мөн нэрээ нууцлах функцтэй зэргээрээ онцлог. Бидний судалснаар Зүүн Хойд Азийн орнуудад гудамжны халдлага өндөр хувьтай байдаг юм байна билээ. Бид улс орнуудын цагдаагийн байгууллагын цахим хуудаснаас мэдээллийг олж нэгтгэхэд 5 хүн тутмын 4 нь гудамжны халдлагад ямар нэгэн байдлаар өртдөг нь ажиглагдсан. Үүнээс үзэхэд бүс нутгийн хэмжээнд хүн тайван аж төрөх, аюулгүй байх эрх зөрчигдөж байна. Энэхүү уралдаанд оролцсоноороо төсөл хэрхэн бичих вэ гэдгийг илүү цэгцтэй, дараалалтай сурч авсан. Мөн Хурдасгуур хөтөлбөрийн хүрээнд маш олон менторуудтай танилцаж, тэдний туршлагаас суралцсан, багаар ажиллах чадварт суралцаж чадсан” гэв.
Энэхүү төслийн уралдаан нь дотоодын их дээд сургууль, коллеж, ахлах сургууль болон гадаадын их сургуулиудын оюутан, залуучуудын дунд 2014 оноос хойш жил бүр уламжлал болон зохион байгуулагдаж иржээ. Энэ хугацаанд Монголын их дээд болон ахлах сургуулийн оюутан залуус Зүүн Хойд Азийн энх тайван, аюулгүй байдалтай холбоотой төрөл бүрийн сэдэв, чиглэлээр үр дүнтэй санал санаачилгууд гаргасан байна. Энэ жил МУИС, ШУТИС, ХУИС, СЭЗИС, ХААИС, АШУҮИС, УБИС, МСҮТ болон бусад ахлах сургуулиуд энэхүү уралдаанд оролцжээ.
Тус уралдааныг МУИС, ШУТИС, "Цэнхэр Сүлд” ТББ, "Дэлхийн Энхийн Их Наадам” ТББ, "Солонгосын Нэгдлийг Дэмжих Монголын Форум”, "Зүүн Хойд Азийн Аюулгүй байдал, стратегийн судалгааны хүрээлэн” зэрэг төрийн болон төрийн бус байгууллага, судалгааны хүрээлэн, нийгэмлэгүүд хамтран зохион байгуулав.
