УИХ-ын Тамгын газрын Ерөнхий нарийн бичгийн дарга Л.Өлзийсайхан Швейцарын хөгжлийн агентлагийн Хамтын ажиллагааны газрын дарга Стефаны Бурри тэргүүтэй төлөөлөгчдийг өнөөдөр хүлээн авч уулзлаа.
Уулзалтын үеэр УИХ-ын Тамгын газрын Ерөнхий нарийн бичгийн дарга Л.Өлзийсайхан Монгол Улсад парламентын ардчиллыг төлөвшүүлэх, орон нутгийн засаглалыг бэхжүүлэхэд Швейцарын хөгжлийн агентлаг үнэтэй хувь нэмэр оруулсаар ирснийг тэмдэглээд, найрсаг харилцаанд суурилсан хамтын ажиллагаа цаашид урт хугацаанд амжилттай үргэлжилнэ гэдэгт итгэлтэй байна гэлээ.
Тэрбээр "Швейцарын хөгжлийн агентлаг нь Монгол Улсад ардчилсан парламентын засаглалыг хөгжүүлж, төвлөрлийг сааруулах, нутгийн өөрөө удирдах байгууллагыг бэхжүүлэх, иргэдийн оролцоог нэмэгдүүлэхэд УИХ-ын Тамгын газартай хамтран ажиллаж ирсэн. Энэ хугацаанд "Нутгийн өөрөө удирдах байгууллагын чадавхыг бэхжүүлэх нь”, "Иргэдийн оролцоотой хууль тогтоох ажиллагааг дэмжих нь”, "Монгол Улсын төлөөллийн байгууллагыг бэхжүүлэх нь” зэрэг төслийг хамтран хэрэгжүүллээ. 2016-2021 онд "Монгол Улсын төлөөллийн байгууллагыг бэхжүүлэх нь” төслийн нэгдүгээр үе шатанд УИХ-ын тухай болон УИХ-ын чуулганы хуралдааны дэгийн тухай хууль, УИХ-ын стратеги төлөвлөгөөг шинэчлэхэд техникийн дэмжлэг үзүүлж, Швейцар, Монголын парламентын Тамгын газрууд хооронд техникийн хамтын ажиллагааг эхлүүлсэн. Өнөөдөр бид хамтын ажиллагаагаа шинэ шатанд хүргэх "Монгол Улсад парламентын ардчиллыг бэхжүүлэх нь” төслийг хэрэгжүүлэх гэрээнд гарын үсэг зурах гэж байгаадаа баяртай байна” хэмээв.
Швейцарын хөгжлийн агентлагийн Хамтын ажиллагааны газрын дарга Стефаны Бурри хэлэхдээ "Швейцарын хөгжлийн агентлаг, УИХ-ын Тамгын газрын хамтын ажиллагаа урт хугацаанд, тогтвортой, амжилттай үргэлжилж байна. Энэ үйл ажиллагааны үргэлжлэл болсон шинэ төслийг эхлүүлэх гэж байгаа. Энэ төсөл өргөн цар хүрээг хамрах бөгөөд гол зорилго парламентын хууль тогтоох, хянан шалгах чиг үүргийг хэрэгжүүлэх чадавхыг бэхжүүлэхэд чиглэж байгаа. Швейцарын хөгжлийн агентлаг 2024 оноос төсөл, хөтөлбөрүүдээ албан ёсоор зогсоох шийдвэр гаргасан ч УИХ-ын Тамгын газартай хамтран хэрэгжүүлсэн өмнөх хөтөлбөрүүд маш сайн үр дүнтэй хэрэгжсэн тул хоёрдугаар шатны төслийг эхлүүлэхээр болсныг хэлэх нь зүйтэй. Энэхүү төсөл мөн амжилттай хэрэгжинэ гэдэгт итгэлтэй байна” гэлээ.
Уулзалтын дараа УИХ-ын Тамгын газрын Ерөнхий нарийн бичгийн дарга Л.Өлзийсайхан, Швейцарын хөгжлийн агентлагийн Хамтын ажиллагааны газрын дарга, хатагтай Стефаны Бурри нар УИХ-ын Тамгын газар болон Швейцарын хөгжлийн агентлагийн хамтран хэрэгжүүлэх төслийн гэрээнд гарын үсэг зурлаа.
"Монгол Улсад парламентын ардчиллыг бэхжүүлэх нь” төсөл нь УИХ-ын Тамгын газар, Швейцарын хөгжлийн агентлагийн хамтран хэрэгжүүлсэн "Монгол Улсын төлөөллийн байгууллагыг бэхжүүлэх нь” төслийн хоёрдугаар үе шатны төсөл болж байгаа юм.
Уг төсөл 2.5 жилийн хугацаатай хэрэгжих бөгөөд УИХ-ын хууль тогтоох болон хянан шалгах үйл ажиллагаанд мэргэжил, арга зүй, техникийн туслалцаа үзүүлэх УИХ-ын Тамгын газрын мэргэшсэн албыг бэхжүүлэх, хүний эрхийг дээдэлсэн, жендэрийн мэдрэмжтэй хууль тогтоох үйл ажиллагааг дэмжих, олон улсын сайн туршлагыг нэвтрүүлэх, парламентын ажилд иргэдийн оролцоог хангах ажлыг хийхээр төлөвлөөд байна.
Уулзалт, хамтын ажиллагааны гэрээнд гарын үсэг зурах ёслолд УИХ-ын Тамгын газрын Парламентын судалгааны хүрээлэнгийн захирал Т.Баярмаа, Швейцарын хөгжлийн агентлагийн Монгол дахь Суурин төлөөлөгчийн газрын Засаглалын хөтөлбөрийн ахлах зохицуулагч Л.Золзаяа болон бусад албаны хүмүүс байлцав.