УИХ-ын дарга Г.Занданшатар Эдийн засгийн байнгын хорооны дарга Ж.Ганбаатар, хуулийн төслүүдийг хэлэлцүүлэгт бэлтгэх үүрэг бүхий ажлын багийн ахлагчаар ажиллаж буй УИХ-ын гишүүд, бизнес эрхлэгчдийг энэ сарын 19-нд хүлээн авч уулзлаа.
Цар тахлын дараах их сэргэлтийг бий болгох эдийн засаг, бизнесийн эрх зүйн орчныг сайжруулах, боловсронгуй болгох явцыг шуурхайлах үүднээс ирэх намрын чуулганаар хэлэлцэхээр бэлтгэж буй гол гол хуулийн төслүүд болон эдийн засаг, бизнесийн орчинд тулгарч буй асуудлын талаар уулзалтын үеэр ярилцсан юм.
"Бизнесийн орчныг сайжруулах, эрхзүйн чадамжийг дээшлүүлэх нь” сэдэвт энэхүү уулзалтын эхэнд Улсын Их Хурлын дарга Г.Занданшатар чуулганы завсарлагааны хугацаанд хуулийн боловсруулалт, хэлэлцүүлгүүдийг сайн хийвэл ээлжит чуулганууд өндөр бүтээмжтэй болно гэлээ.Мөн МҮХАҮТ, эдийн засгийн чиглэлийн мэргэжлийн холбоодтой уулзахад бизнесийг хүндрэл, чирэгдэлгүй эрхлэх томоохон өөрчлөлтийг бий болгох эрхзүйн орчныг бүрдүүлэх талаар санал тавьж буйг дурьдаад баялаг бүтээгч, ажлын байр бий болгогчдыг дэмжсэн бодлого хэрэгжих тал дээр анхаарах шаардлагатайг тэмдэглэсэн.
Түүнчлэн хог гэж үзээд хаяж буй сарлагийн ширээр олон улсын стандартад нийцсэн экспортын брэнд бүтээгдэхүүн болох арьсан бөмбөг үйлдвэрлэж буй бизнес эрхлэгчтэй очиж танилцсанаа дурьдаад, "Есөн ажилчинтай "Монгол бөмбөг” үйлдвэр Швейцарын хөгжлийн агентлагийн хэрэгжүүлж буй төслөөс авсан багахан хэмжээний зээлээрээ нэмүү өртөг шингээж, чанарын өндөр түвшний эдэлгээ даах бүтээгдэхүүн үйлдвэрлэж буй нь манайд бизнес эрхлэх боломж бололцоо дүүрэн байгааг, эсрэгээрээ тэрхүү бизнесийг нь хөгжүүлэх бодлого, шийдвэр дутмаг байгааг харуулж байна” хэмээв.
Эдийн засгийн байнгын байнгын хорооны дарга Ж.Ганбаатар ард иргэд, бизнес эрхлэгчдийн бизнес эрхлэх сонирхлыг нь өдөөх чиглэлээр төр, засаг, төрийн байгууллагуудын хэрэгжүүлж буй бодлого дутмаг байгаа тул хот, хөдөөгүй ажлын байрны олдоц муу, ажил эрхлэх сонирхолтой хүмүүс ч багассан гэдгийг онцоллоо.
Зөвшөөрлийн тухай хуулийн шинэчилсэн найруулгын төслийг хэлэлцүүлэгт бэлтгэх үүрэг бүхий ажлын багийн ахлагч Х.Ганхуяг өнөөдрийн байдлаар зөвшөөрлийн 1600-аад бичиг баримт байгаа тухай судалгааны дүнг дурьдаад, энэ тоог 400 руу буулгах зохицуулалт хуулийн төсөлд тусгахаар ажиллаж буйг онцолсон. Харин Хөрөнгийн үнэлгээний тухай хуулийн шинэчилсэн найруулгын төслийг хэлэлцүүлэгт бэлтгэх үүрэг бүхий ажлын багийн ахлагч Х.Булгантуяа банкууд хөрөнгийг шаардлагатай үед өндрөөр үнэлдэг, шаардлагагүй үедээ багаар үнэлж авдгийг цэгцлэх, хөрөнгийн үнэлгээчид захиалгаар бус бодит, шударгаар хөрөнгийн үнэлгээ тогтоох ур чадвар, ёс зүйтэй байх шаардлагыг хангасан зохицуулалт төсөлд тусгахаар ажиллаж буй талаараа дурьдлаа.
УИХ-ын гишүүн С.Бямбацогт, "Бизнес эрхлэгчдийг цагддаг, хорьдог байдал ялангуяа цар тахлын үед нэмэгдэх хандлагатай байна. Ийм хандлагыг арилгах эрхзүйн орчныг бий болгох, дорвитой өөрчлөлт хийхэд УИХ анхаарах, мөн хуулиудын зөрчлийг арилгах, 7200 гаруй нэр төрлийн бараа, бүтээгдэхүүнийг гаалийн татваргүйгээр Европын орнууд руу экспортлох боломжоо ашиглах ёстой" гэсэн санал хэлэв.
Энэхүү уулзалтад мөн бизнес эрхлэгчдийн төлөөллийг урьж, оролцуулж, үгийг нь сонссон. "Түмэн шувуут” ХК-ийн ерөнхий захирал Л.Эрхэмбаяр, "АУМ алт” ХХК-ийн захирал Б.Жавзандорж, "БСБ сервис” ХХК-ийн ерөнхий захирал Б.Жаргалсайхан нар эдийн засгийг сэргээхэд төрийн байгууллагууд ажлаа уялдуулах, төр, хувийн хэвшлийн уялдааг хангах, үр дүнг эрхэмлэсэн бизнест л зээл өгөх шаардлагатай гэлээ. Мөн аль яам нь ямар ажлаа хариуцдаг нь ойлгомжтой харагддаггүй байдаг учир энэ асуудлаа цэгцлэх ёстой гэсэн санал хэллээ.
УИХ-ын дарга Г.Занданшатар хуулийн төсөл тус бүрээр зохицуулалтыг боловсронгуй болгох, уялдааг хангах, хэлэлцүүлэгт бэлтгэх явц, хугацааг тогтоон, шуурхайлах чиглэлийг гишүүдэд өгч, "КОВИД-19-ын дараах эдийн засгийн их сэргэлтийн хууль эрхзүйн орчныг бүрдүүлэх шаардлага гарч байна. Энэ ажлыг Эдийн засгийн байнгын хороо ахалж ажиллана. Бизнесийн тааламжтай орчныг ерөнхийд нь бүрдүүлэх асуудлыг өнөөдөр цогцоор нь ярилцлаа. Эдийн засгийн сэргэлтийг бий болгохын тулд хүнд суртлыг дээд, дунд, доод шатанд таслан зогсоож, томоохон төслүүд болон жижиг, дунд бизнесийг бодитой хөгжүүлэх цогц бодлогыг хөгжүүлнэ” хэмээв.