НҮБ-ын Аюулгүйн Зөвлөл Суданы шилжилтийн Засгийн газрыг сэргээн байгуулж, улс төрийн намуудын иргэний төлөөллийг суллахыг шаардсан мэдэгдлийг пүрэв гарагт хийжээ.

Аюулгүйн Зөвлөлийн гишүүд хэвлэлийн мэдэгдэлдээ, даваа гарагт Суданы цэргийнхэн засгийн эрхийг булаан авч, шилжилтийн зарим институцийг татан буулгаж, онц байдал зарлан Ерөнхий сайд Абдуллаа Хамдук болон шилжилтийн Засгийн газрын иргэний төлөөллүүдийг баривчилсанд ихэд түгшиж буйгаа илэрхийлсэн байна.

Мөн баривчилсан бүх хүнээ нэн даруй суллахыг цэргийнхэнд уриалсны сацуу Ерөнхий сайд өргөөндөө эргэн очсон талаарх мэдээллийг анхааралдаа авснаа онцолжээ. Түүнчлэн хүч хэрэглэхээс зайлсхийж, хүний эрх, тэр дундаа тайвнаар жагсах, үзэл бодлоо илэрхийлэх эрх чөлөөг бүрэн дээдлэхийн ач холбогдлыг цохон тэмдэглэжээ.

Тийнхүү Аюулгүйн Зөвлөлийн гишүүд нөхцөл болзолгүйгээр яриа хэлэлцээ өрнүүлэхийг талуудад уриалсан байна. Мөн Суданы ард түмэнтэй эв санааны хувьд нэгдмэл байгаагаа илэрхийлээд, хүртээмжтэй, тайван, тогтвортой, ардчилсан, хөгжин цэцэглэсэн ирээдүйг цогцлоох итгэл найдвар, хүсэл эрмэлзлэлийг биелүүлэхийн төлөө Суданы ардчилсан шилжилтийг хэрэгжүүлэх хүчин чармайлтыг дэмжихэд бэлэн байгаагаа илэрхийлжээ.

Мөн Суданы ардчилсан шилжилтийн үйл явцыг сааруулах аливаа оролдлого нь улсын аюулгүй хийгээд тогтвортой байдал, хөгжил дэвшилд эрсдэл учруулж буйг онцлоод, тус улсын бүрэн эрхт байдал, тусгаар тогтнол, нутаг дэвсгэрийн бүрэн бүтэн байдал, үндэсний эв нэгдлийн төлөө тууштай ажиллахаа дахин нотолжээ. Эцэст нь, Судан дахь нөхцөл байдлыг цаашид анхааралтай ажиглана гэдгээ мэдэгдсэн байна.