АНУ-ын Конгрессын Төлөөлөгчдийн танхим дахь Бүгд Найрамдах намын бүлгийн дарга Кевин Маккарти баасан гаргийн орой 15 дахь шатны санал хураалтын дүнгээр "спикерээр” сонгогдлоо. Тэрбээр 216 санал авсан бол түүний гол өрсөлдөгч Ардчилсан намын Хаким Жеффрис 212 санал авчээ.
Санал хураалт явуулсан хурлыг Америкийн телевизийн гол сувгууд шууд дамжуулсан байна. Өмнөх шатны санал хураалтад Маккарти мөн ийм тооны санал авсан, гэхдээ энэ ялахад хангалтгүй байв. Сүүлийн шатны санал хураалтад зургаан гишүүн нэр дэвшигчдийн аль нэгэнд нь санал өгөөгүй бөгөөд энэ нь Маккартийн ялалтыг баталгаажуулсан юм.
АНУ-ын Төлөөлөгчдийн танхим нийт 435 суудалтай бөгөөд танхимын даргын сонгуульд ялахын тулд 218 санал авах шаардлагатай.
Төлөөлөгчдийн танхимын дарга нь Америкийн Үндсэн хуульд зааснаар Ерөнхийлөгч болон дэд Ерөнхийлөгч ямар нэг шалтгаанаар үүргээ гүйцэтгэж чадахгүй болсон тохиолдолд ерөнхийлөгчийн үүргийг гүйцэтгэх гурав дахь том албан тушаал юм.
Ямар хуулийн төслийг хэлэлцэж, санал хураахыг Төлөөлөгчдийн танхимын дарга, түүний орлогч, хороодын дарга нар тогтоодог. Тэд хэлэлцэх асуудлын дарааллыг тогтоож, хэлэлцүүлгийг зохицуулах дүрмийг тодорхойлдог.
Бүгд найрамдах намын бүлэг намын гишүүнээ дэмжихээс татгалзсан тул танхимын даргыг сонгох санал хураалтыг 15 удаа явуулах шаардлагатай болжээ. Гэсэн хэдий ч тэдний зарим нь байр сууриа өөрчилсөн байна.
CNN сувгаар мэдээлснээр, Бүгд Найрамдах намын зарим гишүүн Ерөнхийлөгч асан Дональд Трамптай утсаар ярьсны дараа байр сууриа өөрчилжээ.
Хамгийн сүүлд 100 жилийн өмнө буюу 1923 онд Төлөөлөгчдийн танхимын даргыг эхний шатанд сонгож чадахгүй нөхцөл байдал үүсэж байв. Тухайн үед есөн шатны санал хураалт явагдаж байжээ.
АНУ-ын Ерөнхийлөгч Жо Байден Маккарти сонгогдсонд баяр хүргэж, "бүгд найрамдахчуудтай аль болох хамтран ажиллахад" бэлэн байгаагаа илэрхийлсэн байна.
Төлөөлөгчдийн танхимын өмнөх дарга нь Ардчилсан намын Нэнси Пелоси байсан билээ. Тэрбээр 2022 оны 11 дүгээр сард албан тушаалаасаа огцорч байгаагаа зарласан. Тухайн үед завсрын сонгуулиар бүгд найрамдахчууд Төлөөлөгчдийн танхимд хяналтаа эргүүлэн тогтоох төлөвтэй байсан бөгөөд сонгуулийн дүн ч тийм гарсан билээ.