Автомашин эзэмшигчид тээврийн хэрэгслийн албан татвар, агаарын бохирдол, авто зам ашигласны татвар төлдөг. Тэгвэл хоёрдугаар сард 2 болон 7-гоор төгссөн автомашинтай иргэд энэ сард багтаан татвараа төлөх юм.

Иймд та тээврийн хэрэгслийн нэгдсэн цахим үйлчилгээний www.smartcar.mn цахим хуудсанд хандаж, авто тээврийн хэрэгслийн албан татвар, агаарын бохирдол, зам ашигласны төлбөрийг аль ч банкны онлайн гүйлгээний эрхтэй төлбөрийн карт, QPay үйлчилгээгээр дамжуулан төлбөрөө төлөх бүрэн боломжтой.

Мөн энэ жилээс төрийн зарим үйлчилгээг "Ebarimt.mn" сайтаар дамжуулан үзүүлж эхэлсэн бөгөөд энэхүү сайт, аппликейшныг ашиглан автомашины татвараа төлөх боломж бүрдсэн байгаа.

Иргэн та авто тээврийн болон өөрөө явагч хэрэгслийн албан татвар, агаар бохирдлын төлбөр, авто зам ашигласны төлбөрийг онлайнаар төлсөн бол төлбөрийн баримтаа хэвлэж, тээврийн хэрэгслийн гэрчилгээндээ хавсаргаарай. Эсвэл өөрт ойрхон татвар хураах дурын цэгт төлбөрийн баримтаа заавал шалгуулж, тамга даруулан баталгаажуулах хэрэгтэй гэдгийг бүү мартаарай.

Дашрамд дуулгахад 1,6-аар төгссөн авто машинтай иргэд 1-р сард багтаж татвараа төлсөн байх ёстой юм. Харин 2,7-оор төгссөн бол хоёрдугаар сард, 3,8-оор гуравдугаар, 4.9-өөр төгссөн бол дөрөвдүгээр, 5,0-ээр төгссөн бол тавдугаар сард багтаж төлбөрөө төлөх ёстой юм.