Манай улсад өнөөдрийн байдлаар коронавирусын батлагдсан тохиолдол бүртгэгдээгүй ч өндөр эрсдэлтэй орны тоонд ороод байгаа. Иймд иргэдийг сонор сэрэмжтэй байхыг ЭМЯ, ХӨСҮТ-өөс анхааруулж, сэрэмжлүүлсээр байгаа. Гэсэн хэдий ч өмнөд хийлийн боомт газруудад аюулт өвчин бүртгэгдчихлээ.

Өчигдрийн байдлаар Гашуунсухайттай хиллэдэг буюу 100 орчим км-ийн цаана орших Халиут хотод коронавирусын хоёр ч тохиолдол бүртгэгдсэн тухай мэдээлэл гарав.

Үүнээс иргэд болгоомжилж цахим орчинд "Гашуунсухайтад Замын-Үүдэд байгаа бүх техник тоног төхөөрөмж, илрүүлэг оношлуур байгаа юу”, "Манайд ороод ирчихсэнтэй адил сонсогдож байна...”, Гашуунсухайт, Халиут хоёрыг мэддэг болоод хэлж байна. Хурдан арга хэмжээ аваач ээ. Гашуунсухайт орчимд байсан иргэдийн ийш тийшээ явахыг хориглосон нь дээр шүү”, "Одоо яана аа” гэх зэрэг постууд хөврөв.

Гашуунсухайт-Халиутын чиглэлд Монгол Хятадын иргэд олноор зорчдог учраас иргэд айдаст автаж.

Гэхдээ энэ тохиолдол нь Монгол Улсад шинэ коронавирусын халдвартай тохиолдол батлагдсан гэсэн үг биш гэдгийг ЭМЯ-наас онцолж байгаа ч иргэдийн зүгээс "Тухайн газар орон буюу Гашуунсухайт, Халиут хот руу 20 хоногийн дотор зорчсон иргэдээс асуумж авч тусгаарлахыг чухалд үзэж байна. Энэ нь халдвар авсан бол 2-14 хоногийн дотор илэрдэг гэх ч өөрөө халдварласан ч ямар нэгэн шинж тэмдэг илрэхгүй, бусдад халдварлуулсан тохиолдол Сингапур улсад гарсан гэсэн мэдээллээс үүдсэн сэрэмжлүүлэг юм.

Иргэд ухамсартай байгаа нь сайшаалтай. Өмнөговь аймгийн Засаг дарга амралтын өдрийг ч умартан ажиллаж, захирамж гарган тус боомттой ойролцоох Өмнөговь аймгийн Ханбогд, Гурвантэс суманд гамшгаас хамгаалах өндөржүүлсэн бэлэн байдал зарласан тул иргэд тайван байж болох нь. Адгаж тэвдэхгүй аядуу байцгаая бүгдээрээ.