Улсын онцгой комисс өнөөдөр ээлжит бусаар хуралдаж шинэ коронавируст халдвараас урьдчилан сэргийлэх чиглэлээр дараах шийдвэрийг гаргалаа.
Нэгдүгээрт, Эрүүл мэндийн сайдаас гаргасан саналын дагуу шинэ коронавируст халдвар тархахаас урьдчилан сэргийлж Монголын уламжлалт сар шинийн баярыг нэг удаа тэмдэглэхгүй байх нь зүйтэй гэж үзсэн байна. Энэ талаарх саналаа холбогдох байгууллага болон Ерөнхийлөгчид танилцуулснаар зарлиг гарна гэдгийг УОК-ын дарга, Шадар сайд Ө.Энхтүвшин онцоллоо. БНХАУ-ын хувьд, цагаан сарын баярын үеэр шинэ коронавирусээс урьдчилан сэргийлэх, хөл хорио тогтоох арга хэмжээг дорвитой хэрэгжүүлж чадаагүйн улмаас өвчний тархалтыг хянаж чадахгүйд хүрсэн гэдгийг тэмдэглэв.
Хоёрдугаарт, Эрүүл мэндийн салбарт нэн хэрэгцээтэй байгаа эм, эмнэлгийн хэрэгсэл, тоног төхөөрөмж, хувийн хамгаалах хэрэгсэл, оношлуур, ариутгал халдваргүйтгэлийн бодис худалдан авах, нөөц бүрдүүлэхэд шаардлагатай хөрөнгийг 2020 оны баталсан төсвийн хүрээнд зохицуулахыг төсвийн ерөнхийлөн захирагч нарт даалгав. Дэлхий нийтэд ховордоод байгаа термокамерын төхөөрөмжийг шуурхай судалж худалдан авахыг Сангийн сайд, Эрүүл мэндийн сайдад үүрэгдлээ.
Гуравдугаарт, гуравдагч орноос БНХАУ-аар дамжин ирж буй Монгол Улсын иргэдэд мэргэжил арга зүйн зөвлөгөө өгч ажиллах, вирусний сэжиг илэрсэн тохиолдолд, ХӨСҮТ, Цэргийн төв эмнэлэг, Асралт мед эмнэлэг, ОБЕГ-ын давтан сургалт сэргээн заслын төвийг тусгайлан бэлтгэж, бэлэн байлгахыг Сангийн сайд, Эрүүл мэндийн сайд, ОБЕГ-ын даргад даалгалаа.
Мөн хилийн Замын-Үүд сумын 100 ортой, Сайншанд сумын 50 ортой шинээр ашиглалтад орсон эмнэлгийн гэрээг яаралтай хийж, улсын комисст хүлээн авах санхүүжилтийг Улсын онцгой комисст танилцуулах, улмаар улсын хилээр нэвтэрч байгаа иргэдийг тус эмнэлэгт түр тусгаарлан байрлуулахыг үүрэг болгов.
Дөрөвдүгээрт, Өмнөговь аймгийн Ханбогд сумын Гашуунсухайт, Ганцмод боомт, Гурвантэс сумын Шивээхүрэн хилийн боомтоор уул уурхайн түүхий эд тээвэрлэхийг гуравдугаар сарын 2-ныг хүртэл хориглохыг ЗТХ-ийн сайд, УУХҮ-ийн сайдад даалгав. Гашуунсухайт боомтоос 130-190 км-ийн цаана коронавирусний дөрвөн тохиолдол бүртгэгдсэн, аюул улам ойртож байгааг сэрэмжлүүлж байна гэдгийг Шадар сайд Ө.Энхтүвшин онцоллоо.
Өнөөдрийн байдлаар БНХАУ-ын 31 мужид шинэ коронавирусний 40235 тохиолдол бүртгэгдсэнээс, 6484 хүний биеийн байдал хүнд, амиа алдсан 909 буюу өчигдрийнхөөс 97-гоор нэмэгдсэн байна. Бүрэн эдгэрсэн 3283 хүн байгааг Эрүүл мэндийн сайд хуралдааны үеэр мэдээлсэн.