Шинэ төрлийн коронавирусийн голомт болоод байгаа Хятадын Хубэй муж болон Ухань хотод "Covid-19” вирусийн тархалт сүүлийн 48 цагийн дотор эрс буурсан тухай эерэг мэдээллүүд бий.

Гэвч үүнтэй зэрэгцэн Өмнөд Солонгос, Япон, Сингапур зэрэг Азийн бусад оронд халдварын дэгдэлт огцом өсөж, нас баралт бүртгэгдсэн таагүй мэдээг эдгээр улсын холбогдох байгууллагуудаас өгч, анхааруулга хүргүүлж эхлээд байна. Хамгийн гол нь халдварын дэгдэлт огцом нэмэгдэж буй эдгээр орнууд нь манай иргэдийн хувьд хамгийн ихээр зорчдог бөгөөд Монгол иргэд ч олноор амьдарч, ажиллаж, суралцдаг улсууд юм.

Өмнөд Солонгосын эрүүл мэндийн байгууллагын зүгээс мэдээлснээр тус улсад "Covid-19” вирусийн халдвар авсан батлагдсан тохиолдол нэгхэн өдрийн дотор хоёр дахин нэмэгдэж 104-т хүрсэн талаар мэдээлсэн юм. Тэгвэл хэдхэн цагийн өмнө тус улсад уг өвчний халдварын улмаас нас барсан анхны тохиолдол бүртгэгдсэн талаар Эрүүл мэндийн байгууллагынх нь зүгээс мэдэгдлээ.

Тус улсын зүүн өмнөд хэсэгт орших 2.5 сая орчим хүн амтай Дэгү хот нь шинэ төрлийн коронавирусийн шинэ голомт болж болзошгүй нөхцөл байдал үүсээд байгаа юм. Мөн уг хот нь Хятадын Уханьтай адил Өмнөд Солонгосын газар нутгийн төв хэсэгт орших, тээвэр ложистикийн гол зангилаа болсон, үйлдвэрлэл өндөр хөгжсөн томоохон хотуудын нэг байгаа нь тус улсын байдалд эрсдэл дагуулж байгаа аж.

Дэгү хотын захирагч Квон Янг-жин пүрэв гаригт үүссэн нөхцөл байдалтай холбогдуулан хотын иргэдээ шаардлагагүй тохиолдолд гэрээсээ гарахгүй байж, дотор газар байхдаа хүртэл аль болох амны хаалт, маск зүүж халдвараас урьдчилан сэргийлэхийг уриалсан. Мөн тэрээр Засгийн газрын зүгээс БНХАУ-аас өөрийн оронд өвчний тархалтыг нэвтрүүлэхгүй байх урьдчилан сэргийлэх арга хэмжээ хангалттай сайн хэрэгжихгүй байна. Өвчний тархалт хурдацтай нэмэгдэж байгаа нь хотын эрүүл мэндийн дэд бүтцийг сүйрүүлж, иргэдийг айдас, үймээнд автуулахвий гэдгээс эмээж байгаагаа илэрхийлээд Засгийн газраас яаралтай арга хэмжээ авах тусламж хүсжээ.

Дэгү хотод бүртгэгдсэн "Covid-19” вирусийн дийлэнх тохиолдол нь нэг сүмд явдаг иргэд байгаа юм. Тухайлбал, тус хотын Шинхеонжи Христийн шашинд итгэгчдийн сүмд явдаг 61 настай эмэгтэй нь халдвар авсан болохоо мэдэлгүйгээр бусад 20 гаруй хүнд халдвар тараасан нь лхагва гаригт тодорхой болсон.

Харин Япон улсын хувьд өнөөдрийн байдлаар "Covid-19” вирусийн халдвар авсан нь батлагдсан нийт 710 тохиолдол бүртгэгдэж, 3 нас баралт гараад байна. Халдвар авсан иргэдийн дийлэнх нь тус улсын Ёкохама арал дээр тусгаарлагдсан "Diamond Princess” хөлгийн зорчигчид байгаа юм. Японы Эрүүл мэндийн сайд Катунобу Като пүрэв гаригт "Diamond Princess” хөлгийн халдвар авсан байсан хоёр зорчигч нас барсан болохыг мэдэгдлээ. Тус улс нь "Covid-19” вирусийн халдвар бүртгэгдсэн тохиолдлоор БНХАУ-ын дараа бичигдэж байгаа бол Өмнөд Солонгос гуравт, Сингапур дөрөвт бичигдэж байна.