Гуравхан сарын дараа УИХ-ын сонгууль болно. Сонгууль болохтой зэрэгцээд гудамжинд лааз өшиглөж явсан нөхөд намаа бараадаж ямар нэгэн албан тушаалд томилогдож эхэлдэг.Тэгвэл өнгөрсөн баасан гарагт МАН-ын дарга У.Хүрэлсүх Сүхбаатар дүүргийн Засаг дарга асан Б.Баярмагнайг өөрийн зөвлөхөөрөө авчээ. Тэрбээр 2017 онд МАН-ын Ерөнхий нарийн бичгийн даргын сунгаанд нэр дэвших хүсэлтээ өгсөн ч одоогийн дарга Д.Амарбаясгаланг улираан сонгосноор түүний мөрөөдөл замхарсан түүхтэй.

Ямартай ч өнгөрсөн 2016 оны УИХ-ын сонгуулийн дараа албан тушаалгүй үлдсэн Б.Баярмагнай ирэх сонгуулиар хоосон хоцрохгүйн тулд ийнхүү Ерөнхий сайд У.Хүрэлсүхийг бараадаж, тоосоо гөвж, азаа үзэхээр шийдсэн бололтой.

Яг үнэндээ өнөөдөр МАН-ынхан нэр дэвших квотоо авахын тулд намын дарга, генсек хоёрынхоо үүдийг сахиж өдөр хоногийг өнгөрөөх болсон нь нууц биш. Гэтэл ийм эгзэгтэй цаг үед Б.Баярмагнай сонгууль болохоос гурван сарын өмнө намын даргынхаа зөвлөх болсон нь аргагүй л мотор сайтай нэгэн гэдгийг харуулж байна.

Ингэж хэлэхийн учир нь түүний хадам ах Б.Баярсайхан нь МАН-д нэлээн нэр нүүртэй төдийгүй нөлөө бүхий эрхмүүдтэй ойр шадарласны хүчинд ГХЯ-ны Хяналт шинжилгээ, үнэлгээ, дотоод аудитын газрын дарга, ГХЯ-ны Төрийн захиргаа удирдлагын газрын дарга, Барилга, хот байгуулалтын Төрийн захиргаа, удирдлагын газрын дарга зэрэг том том албан тушаалуудыг ээлж дараалан хашиж адаг сүүлд нь Беларусын элчин сайдад нэр дэвшсэн ч Ерөнхийлөгч таалаагүйн улмаас мултарсан. Түүний мултрах болсон шалтгаан нь Германд хар тамхины хэрэгт холбогдсон дипломатч Б.Баттүшигээс үүдэлтэй гэдгийг улстөрийн хүрээнийхэн хэлж байв. Угтаа бол Б.Баттүшиг нь Б.Баярсайханы төрсөн дүү хийгээд Б.Баярмагнайгийн хадам ах гэсэн үг.  Б.Баттүшиг 2019 оны тавдугаар сарын 3-нд Турк улс дахь Монголын Станбулын дэд консулаар томилогдоод удаагүй байхдаа хар тамхины хэрэгт холбогдсон нэгэн. Мэдээж түүний эл албан тушаалд томилоход нөлөө үзүүлсэн хүн нь Б.Баярсайхан ба түүний хамтран зүтгэгчид. Ийм хар бараан намтартай учраас Ерөнхийлөгч Б.Баярсайханы Беларусь дахь Элчин сайдын томилгооноос татгалзсан хэрэг.

Энэ бүхнийг тоочсоны шалтгаан нь гэвэл хадам ах нарынх нь энэхүү үйлдлүүд байнга л Б.Баярмагнайг дагалдаж явдаг учраас ийнхүү тоочсон хэрэг. Мэдээж тэрбээр хадам ах нараасаа дутахгүй паянтай нэгэн гэдгийг уншигчид санаж буй биз. Тэрбээр Сүхбаатар дүүргийн Засаг дарга байхдаа зургаан тэрбум төгрөгийн асуудалд нэр холбогдож хэвлэлийн хуудсыг чимж байсан нэгэн. Хэвлэлд дурдснаар түүнийг "2011 оны  наймдугаар сард Сэлбэ голыг сэргээх төслийг Нийгмийн Ардчлал Монголын Залуучуудын Холбоо санаачлан нийслэлийн удирдлагуудад танилцуулж гардан хийх үүрэг хүлээж байсан. Тухайн үедээ буюу 2012 онд Сэлбэ гол орчмыг "Сөүл хотын дундуур урсдаг Чонгэчон гол шиг болгоно” хэмээн ард иргэдийн тархийг угааж, их тойруугийн гүүрнээс "Голден Вилл” хотхоны гүүр хүртэлх 350 метр, "Голден Вилл” хотхоны гүүрээс Арслантай гүүр хүртэлх 1,3 километр газрыг 2 үе шаттайгаар тохижуулна гэж 6 тэрбум төгрөгийн төсөв батлуулж 2012 онд авч байсан” хэмээсэн байв.

Ямартай ч 6 тэрбумын Б.Баярмагнай гэх нэрийг өөртөө зүүх болсон тэрбээр энэ удаад Ерөнхий сайд У.Хүрэлсүхийн суганд хавчуулагдаж УИХ, НИТХ-ын аль нэгэнд ийнхүү нэр дэвшихээр зүтгэж эхлэв үү гэх хардлага тус намынханы дунд байна. Хэрвээ тэрбээр өөрийнхөө хүсэл мөрөөдлийг биелүүлэхээр УИХ-д нэр дэвшсэн ч гэлээ Сүхбаатар дүүргийн иргэд түүнд итгэл үзүүлэх нь юу л бол. Учир нь Б.Баярмагнай бүхэл бүтэн Сэлбэ голыг алга болгочихсон хүн шүү дээ.

Хамгийн хачирхалтай нь Ерөнхий сайд У.Хүрэлсүх яагаад түүнд итгэл хүлээлгэж өөрийнхөө суганд хавчуулж зөвлөх гэдэг сэтэрийг зүүлгэх болов гэдэг нь анхаарал татаж байна. Тэрбээр 2012 онд Сүхбаатар дүүргийн 11, 12, 13, 14 дүгээр хороо буюу орон нутгийн сонгуулийн 15 дугаар тойргоос НИТХ-ын төлөөлөгчөөр сонгогдож байсан ч  сонгогчдынхоо нүдийг баясгах ганц зүйл тойрогтоо хийгээгүй төдийгүй хуралдаа ганцхан удаа сууж байсан гэх дуулиан тухайн үед хэвлэлээр гарч байв.

Ямартай ч Б.Баярмагнай ямар шатрын нүүдэл хийж Ерөнхий сайд, МАН-ын даргыг бараадав гэдгийг цаг хугацаа харуулах бололтой.