Соёлын сайд Ч.Номин, Гадаад харилцааны сайд Б.Батцэцэг, Байгаль орчин, аялал жуулчлалын сайд Н.Уртнасан болон холбогдох албан тушаалтнууд ажил хэргийн уулзалт, хэлэлцүүлгийг зохион байгууллаа. Уулзалтаар Монгол Улсын гадаад сурталчилгааг эрчимжүүлэх, сурталчилгааны контент бий болгох, цахим маркетингийн чиглэлээр санал солилцов.

Соёлын сайд Ч.Номин Монгол соёл-монгол баялаг төслийн танилцуулгыг энэ үеэр хийсэн бөгөөд тэрээр хэлсэн үгэндээ "Бидэнд баялаг өв соёл, газар зүйн тогтолцоо, соёлын аялал жуулчлалыг хөгжүүлэх түүх гэх мэт маш олон давуу тал бий. Гэсэн хэдий ч өнөөдрийг хүртэл соёлын бүтээлч үйлдвэрлэл дорвитой хөгжихгүй байгаад нөлөөлж буй хэд хэдэн сул тал байна.

Мэргэжлийн менежмент муу, бизнес оршин тогтнож хөгжих бололцоо дутмаг, зах зээл жижиг, дэд бүтэц байхгүй мөн судалгаа, бүртгэлгүй гэх мэт. Соёлын бүтээлч үйлдвэрлэлийг хөгжүүлэхдээ улс болгон өөрийн давуу тал, онцлогтоо тулгуурласан тэргүүлэх чиглэлээ тодорхойлдог. Бид давуу тал, онцлог, тэргүүлэх чиглэлээ тодорхойлж, монгол эрдэмтэн, судлаач, түүхчид болон олон улсын экспертүүдтэй хамтран тандалт судалгааг хийхээр төлөвлөж байна. Тандалт судалгаандаа тулгуурлан соёлын салбарынхаа хүрээллийг тодорхойлж, салбарынхантайгаа нэг ойлголцолд хүрснээр монголынхоо өвөрмөц давуу байдалд тулгуурласан тэргүүлэх чиглэлээ тодорхойлох юм.

Дэлхий дахинд монгол соёл урлагийг сурталчлан, соёлын бүтээлч үйлдвэрлэлийг хөгжүүлж, дэлхийн нүүдлийн соёл иргэншлийн төв болохын тулд нэгдсэн нэг ойлголттой, брэндингтэй, үүнийгээ компанит ажлын хэмжээнд өрнүүлнэ. Сегмэнтчлэн жижиг, жижгээр хийх нь үр дүн муутай гэж харж байгаа болохоор брэндинг гаргана. Соёлын бүтээлч үйлдвэрлэл ирээдүйд монголыг дэлхийн зах зээлд гаргах хамгийн чухал салбар” гэлээ.