ШОТЛАНД 0-2 ЧЕХ

Гоол: Патрик Шик 42 дахь минут, 52 дахь минут
Гоолын дамжуулалт: Владимир Куфаль 42 дахь минут, Томаш Соучек 52 дахь минут

EURO 2020-ийн D хэсгийн хоёр дахь тоглолт Шотландын Глазго хотын "Хэмпден парк" цэнгэлдэх хүрээлэнд Шотланд, Чехийн хооронд боллоо.

Тоглолт эхнээсээ хурдан хэмнэл, бөмбөгний төлөөх ширүүн тэмцэл дунд өрнөж харилцан довтолсон. Тоглолтын ихэнх минут талбайн төвд, агаарын тулаанд өрнөсөн бөгөөд үеийн төгсгөлд Чехийн шигшээ баг олон дараалсан довтолгоо хийсний эцэст довтлогч Патрик Шик мөргөж тооны харьцааг нээлээ.

Патрик Шикийн гоол

Тоглолтын хоёрдугаар үе эхлээд хожигдож яваа талбайн эзэд довтолгоондоо хэтэрхий анхаарч хамгаалалтаа мартсаны улмаас сөрөг довтолгоогоор дахин гоол алдлаа. Тус гоол нь Европын аварга шалгаруулах тэмцээнд хамгийн холоос оруулсан гоол (49.5 метрээс) болон бичигдсэн бөгөөд эхний гоолын эзэн Патрик Шик дабл хийлээ.

Шотландын шигшээ баг үлдсэн цагт довтолсоор, Ливерпүүл клубийн зүүн жигүүрийн хамгаалагч, багийн ахлагч Эндрью Робертсоны чадварлаг дамжуулалтууд эзэндээ очсоор байсан ч түүнийг нь "чулуу" болгох тоглогч байсангүй.

49.5 метрээс оруулсан Патрик Шикийн гоол

Хоёр багийн гарааны бүрэлдэхүүн:

Шотланд: Дэвид Маршалл (Дерби), Грант Хэнли (Норвич), Жак Хэндри (Селтик), Стивен О'Доннелл (Модервелл), Энди Робертсон (Ливерпүүл), Лиам Купер (Лидс), Жон МакГинн (Астон Вилла), Скотт МакТоминей (Манчестер Юнайтед), Стюарт Армстронг (Саутхемптон), Линдон Дайкс (КПР), Райан Кристи (Селтик)

Чех: Томаш Вацлик (Севия), Владимир Куфаль (Вест Хэм), Ондрей Челустка (Спарта Прага), Томаш Калас (Бристол Сити), Ян Боржил (Славия Прага), Лукаш Масопуст (Славия Прага), Владимир Дарида (Херта Берлин), Томаш Соучек (Уэст Хэм), Алекс Крал (Спартак Москва), Якуб Янкто (Сампдория), Патрик Шик (Леверкузен)

Өнөө шөнө 00:00 цагаас E хэсгийн эхний тоглолт Польш - Словак, хоёр дахь тоглолт 03:00 цагаас Испани -  Шведийн хооронд болно.