УИХ-ын дарга Г.Занданшатар өнөөдөр УИХ-ын Эдийн засгийн байнгын хорооны дарга Ж.Ганбаатар, Монголбанкны Ерөнхийлөгч Б.Лхагвасүрэн, Санхүүгийн зохицуулах хорооны Д.Баярсайхан, Үндэсний статистикийн газрын дарга Б.Батдаваа нартай уулзаж, чиглэл өглөө.
Эхлээд Монголбанкны Ерөнхийлөгч Б.Лхагвасүрэн эдийн засгийн өнөөгийн нөхцөл байдал, авч хэрэгжүүлж буй арга хэмжээ, ажлуудын явцын талаарх мэдээлэл өглөө. Бодлогын хүүг 11 хувиас 6 хувьд хүргэсэн. Мөн өнгөрсөн жил 55 мянга, 2021 онд 57 мянган иргэдийн бизнесийн болон ипотекийн 3,1 их наяд төгрөгийн зээлийн хүүг он дуустал зогсоосон. Эдийн засгаа сэргээх 10 их наяд хөтөлбөрийн хүрээнд ажлын байрыг дэмжих 1 их наяд 700 тэрбум төгрөгийн зээлийг 23 мянган зээлдэгчдэд олгоод явж байна гэлээ. Цаг үеийн нөхцөл байдалтай уялдуулан газар тариалан, мах бэлтгэл, хүнсний ногоо, ноос ноолуурын чиглэлээр 500 тэрбум төгрөгийн зээл олгохоос 319 тэрбум төгрөгийн зээлийг олгоод байгаагаа дурдав.
Цар тахлын энэ үед бодлогын арга хэмжээнүүдийн хүрээнд эдийн засгийн өсөлт 15,7 хувьд хүрсэн. Гэхдээ эдийн засгийн өсөлт цаашид энэ хэмжээгээр өсөхөд тодорхой бэрхшээлүүд үүсч байна. Ялангуяа улс орнуудын хилийн хязгаарлалт, ачаа тээврийн саатал, тээврийн зардлын болон түүхий эдийн өсөлт зэрэг олон шалтгаанаас эдийн засгийн өсөлтөд сөрөг нөлөө үзүүлэх дүр зураг харагдаж байна гэв.
Эдийн засгийн байнгын хорооны дарга Ж.Ганбаатар тодорхой асуудлаар Эдийн засгийн байнгын хороо Монголбанкинд чиглэл өгч ажиллаж байгаагийн нэг нь хадгаламжийн хүүний асуудал. Өнөөдрийн байдлаар хадгаламжийн хүү буурсан учир зээлийн хүүг бууруулах нөхцөл бүрдсэн гэлээ. Харин 3 хувийн зээлийн хувьд эх үүсвэрүүд олдохгүй байгаа талаар, зээлийн батлан даалтын сан муу ажиллаж байгаа талаар гомдол ирж байгааг Монголбанкны удирдлагуудад сануулав.
Санхүүгийн зохицуулах хорооны дарга Д.Баярсайхан Зээлийн хүүг буруулах стратегийн хүрээнд хөрөнгийн зах зээлийг хөгжүүлэх ялангуяа бондын зах зээлийг хөгжүүлэх зорилт тавиад ажиллаж байна. Энэ хүрээнд бондын зах зээлийн бүртгэлийн журмыг олон улсад нийцүүлэн өөрчилсөн талаараа танилцууллаа.
Үндэсний статистикийн хорооны дарга Б.Батдаваа Монгол Улсын гадаад худалдаа эхний 7 сарын байдлаар экспорт, импорт 30 хувийн өсөлттэй байгаа ч энэ оны 6,7 сарыг 2020 оны мөн үетэй харьцуулахад буурсан гэлээ. Өрхийн орлого бууралттай хэвээрээ байна. Өрхийн орлогыг тогтворжуулж буй нь хүчин зүйл нь тэтгэвэр, тэтгэмж, халамж, хүүхдийн мөнгө гэдгийг дурдлаа. Инфляц эхний 7 сарын байдлаар 7,4 хувьтай гарсан. 7-р сард инфляц нэмэгдэх болсон гол шалтгаан нь шатахуун үнэ гэдгийг онцоллоо.
УИХ-ын дарга Г.Занданшатар, хамгийн чухал нь ажилгүйдэл, ядуурлын асуудалд анхаарах хэрэгтэй байна. Ядуурлын үндсэн шалтгаан ажилгүйдэл. Үүний тулд ажлын байрыг нэмэгдүүлэх хэрэгтэй. Баялаг бүтээгчдээ дэмжиж, эдийн засгаа солонгоруулахын тулд онцгой анхаарах хэрэгтэйг сануулав. Монгол хүн ажилтай, орлоготой байхад ямар ч хүндрэл бэрхшээлийг даван туулаад гарч чадна. Тиймээс ажлын байрыг нэмэгдүүлэхийн тулд бүх төрлийн Зөвшөөрлийн тухай, Тендерийн тухай хуулиудыг өөрчилж, дунд, доод шатны дарамт шахалтыг зогсоох ёстой. Мөн зээл, татварын бодлогоор ажлын байр болгож буй салбарыг дэмжих бодлогыг баримтална. Эдийн засгийн өсөлтийг ажлын байр буй болгосноор хэмжих ёстой.
Энэ бүхний эхлэл хууль эрх зүйн орчинг сайжруулахад анхаарч ажиллая. Мөн хүнсний хангамжийг сайжруулах, үнийг тогтвортой байлгахад онцгой анхаарах нь УИХ-ын зүгээс онцгой анхаарах асуудал мөн хэмээлээ.
Иймээс ковидын үед болон ковидын дараах үед эдийн засгийн нөхөн сэргээлтийг хангахад төрөөс мөнгөний бодлогын чиглэлээр ямар арга хэмжээ авах, хууль эрх зүйн орчинг хэрхэн сайжруулах болон банк санхүүгийн реформыг хийхэд авч хэрэгжүүлж буй арга хэмжээ, цаашид бодлогын талаар ямар ажил зохион байгуулж ажиллах чиглэл гаргахыг УИХ-ын Эдийн засгийн байнгын хороо, Монголбанк, Санхүүгийн зохицуулах хороо, Үндэсний статистикийн газрын удирдлагуудад даалгалаа хэмээн УИХ-ын Хэвлэл мэдээлэл, олон нийттэй харилцах хэлтсээс мэдээлэв.