Жүжигчин Дэниел Крейгийн тоглосон "James Bond” цувралын сүүлчийн анги буюу "No Time To Die”-ийн нээлт цар тахлын нөхцөл байдалтай холбогдуулан хойшлогдоод байсан бөгөөд товлосон хугацаанаасаа ийнхүү 18 сарын дараа Лондонд албан ёсоор нээлтээ хийлээ.
Уг киноны шинэ анги нь жүжигчин Дэниел Крейгийн домогт тагнуулчийн дүрийг бүтээсэн хамгийн сүүлийн төсөл болж буйгаараа онцлогтой юм. "James Bond" цувралын 25 дахь анги буюу "No Time to Die” нь Английн жүжигчин Дэниел Крейгийн тоглосон тав дахь "007” буюу домогт тагнуулчийн дүр юм.
Жүжигчин Дэниел Крейг улаан хивсний ёслолын үеэр "BBC Radio 5 Live” -д өгсөн ярилцлагадаа, "Кино урлагийн түүхэнд энэ дүр үнэхээр чухал үүрэг гүйцэтгэсэн. Энэхүү гайхалтай уран бүтээлийн нэг хэсэг байсандаа баяртай байна. Би үнэхээр азтай" хэмээн онцлон дурджээ.
Цувралын шинэ анги пүрэв гаргаас эхлэн Их Британийн кино театруудаар гарч эхлэх аж.
Түүнчлэн "James Bond" цуврал киноны шинэ ангийн нээлт "Royal Albert Hall”-д болсон бөгөөд нээлтийн арга хэмжээнд Их Британийн Уэльсийн хунтайж Чарльз болон түүний гэргий Корнваллын гүнгийн ахайтан Камилла, Кембрижийн гүн Уильям болон гүнгийн авхай Кейт нар оролцжээ.
"Д.Крейгийн "007” дүрийг бүтээсэн сүүлийн анги учраас сэтгэл хөдөлгөм орой болж байна” гэж тус цуврал кинонд Ив Манипеннийн дүрийг гурав дахь удаагаа бүтээж буй жүжигчин Наоми Харрис хэлжээ. Жүжигчин Н.Харрис "BBC” телевизэд өгсөн ярилцлагадаа, " ”James Bond” бол үнэхээр өвөрмөц кино шүү дээ. Тиймээс ч цувралын шинэ анги кино театрт хүрэлцэн очиж, дэлгэцийн бүтээлийг үзэх үзэгчдийн тоог эргэн нэмэгдүүлнэ гэдэгт найдаж байна” хэмээн онцолжээ.
Үүний зэрэгцээ продюсер Барбара Брокколи, продюсер Майкл Уилсон нар ирэх он хүртэл Д.Крейгийг солих талаар бодож эхлэхгүй хэмээн мэдэгдсэн байна. "Одоогоор энэ талаар огт бодохгүй байна. Ирэх жилээс бид ирээдүйд хэн болох талаар бодож эхлэх болно" гэж Барбара Брокколи даваа гарагт "BBC Radio 4”-д өгсөн ярилцлагадаа дурджээ.
Их Британид тасалбарын урьдчилсан борлуулалт халдварын тархалтын эхэн үед кино театрууд хаагдах үеийнхээс өндөр түвшинд байсан гэж "Odeon”, "Cineworld” кинотеатрын сүлжээнүүд мэдээлжээ.
"Odeon” кинотеатрын сүлжээний мэдээлснээр, даваа гаргийн байдлаар урьдчилсан захиалгаар 175000 гаруй тасалбар зарагджээ. Үүний зэрэгцээ цувралын шинэ ангийг "Avengers: Endgame” киноноос хойших хамгийн өндөр дүнтэй урьдчилсан захиалга болсон гэж "Cineworld” кинотеатрын сүлжээнээс мэдээлжээ.