Шүүдэр продакшн, "Voo"-гийн хамтын бүтээл "Хотулун гүнж-Алтан судрын эрэлд” уран сайхны кино энэ сарын 3-наас үзэгчдийн хүртээл болж буй.

Юань гүрний сэдэвт анхны монгол кино гэдгээрээ онцлогтой эл бүтээл зохиолч Б.Шүүдэрцэцэгийн "Хотол цагаан гүнж” түүхэн романаас сэдэвлэсэн бөгөөд романд дүрсэлсэн хүчирхэг баатрууд, шидэт ертөнц, мөнгөн эвэрт буга, Хайду хааны удам дамжсан шүтээн Алтан дэвтрээ эргүүлэн авах бэрх замд тохиолдох саад бэрхшээл, отоо, дайсны довтолгооныг өгүүлсэн эпик тулаант кино юм.  

Хотулун гүнж кино төсөл 2015-2020 он хүртэл бэлтгэлээ хийж, өнгөрсөн жилийн зунаас гурван улирал дамнан, дөрвөн аймгийн есөн газар зургийг нь авчээ. 

Юань гүрний үеийг харуулсан энэхүү киноны Хотулун гүнжийн дүрийг Москва хотод Театр урлагийн дээд сургууль төгссөн жүжигчин, загвар өмсөгч М.Цэрэндолгор, түүний сэтгэлт залуу Абатайн дүрийг жүжигчин Б.Баттогтох бүтээжээ.

Киноны зохиогчоор Б.Шүүдэрцэцэг, Д.Болдхуяг, найруулагчаар С.Баасанжаргал, зураглаачаар Г.Бат-Ирээдүй, тайзны ерөнхий зураачаар Н.Батжаргал, тулааны зураглаачаар Лаки, тулааны найруулагчаар Аска, нүүр хувиргагчаар Б.Эрдэнэчимэг, дроны зураглаачаар П.Долгион, зураглаачаар Б.Энхтөр нар ажилласан байна.

Бөх гүнж хэмээн алдаршсан Хотулун гүнжийн түүхээс сэдэвлэн Хятад, Америкийн хамтарсан "The Cause of Turandot” кино нээгдсэнтэй зэрэгцэн Монголын уран бүтээлчдийн энэхүү кино гарч буйгаараа мөн онцлогтой юм.