Монголбанк, Санхүүгийн зохицуулах хороо, Монголын банкуудын холбоо, Эдийн засгийн хамтын ажиллагаа, хөгжлийн байгууллага хамтран дэлхийн мөнгөний долоо хоног аяныг нээлээ.

Арав дахь жилдээ зохион байгуулж буй аян нь "Мөнгөнд ухаалаг хандаж, ирээдүйгээ өөрөө бүтээе” уриатайгаар 14 хоногийн хугацаанд үргэлжилнэ. Ингэхдээ хүүхэд, залуусын санхүү, эдийн засгийн боловсролыг дээшлүүлэх, гэр бүл, нийгэмд мэдлэгээ хуваалцах үүрэг оролцоог нь нэмэх зорилгоор сургалт, сурталчилгаа хийх юм. 

Монголбанкны Ерөнхийлөгч Б.Лхагвасүрэн аяныг нээж хэлэхдээ, -Монгол Улсын бүтээж байгаа баялаг, татвар, хураамж зэрэг нь бүгд төгрөгөөр илэрхийлэгддэг. Мөнгөн тэмдэгт бусад валюттай өрсөлдөхийн тулд хүчтэй байх ёстой. Орчин үед мөнгөн тэмдэгт олон хэлбэртэй болж байна. БИд санхүүгийн байгууллагаар үйлчлүүлэхэд тухайн газрынхан гэрээгээ тулгадаг. Иргэд өөрсдийн хүсэл, зорилго, эрх ашгаа гэрээнд оруулж чаддаггүй нь иргэдийн санхүүгийн ойлголт муу байгааг харуулж байгаа”-г онцлов.

Энэ үеэр лектор Г.Мөнгөн ерөнхий боловсролын сургуулийн сурагчдад мөнгөнд хандах хандлагын талаар мэдээлэл өгсөн юм. Тэрбээр, "Хүмүүс тодорхой хэмжээнд хуримтлалтай байж үзээгүй төлөв анзаарагдсан нь мөнгөө яаж менежмент хийх ойлголт муу байгаатай холбоотой. Иймд эхлээд мөнгөө хуримтлуулж, хадгалах чадварыг сурах ёстой”-г хэлж байлаа.

Өнгөрсөн жилийн аян нь "Суралц, хуримтлуул, өсгө” уриатай байсан юм.