Apple компани iPhone-ы борлуулалтыг нэмэгдүүлэхийн тулд удахгүй гарах хиймэл оюун ухааны боломжуудыг өөрсдийн бараа бүтээгдэхүүндээ ашиглахаар төлөвлөж байна. Ялангуяа тус компаний хувьд эрэлт багатай байгаа Хятад улсын зах зээлд нэвтрүүлэх гэсэн ч нэг асуудал байгаа нь Хятадад хиймэл оюун ухааныг хориглосон явдал байлаа. Технологийн зах зээлийн акулууд болох Microsoft, Google, Meta, Samsung зэрэг "өрсөлдөгчид" нь бүгд хиймэл оюун ухааныг бараа бүтээгдэхүүндээ нэвтрүүлчихсэн байгаа энэ үед Apple-ийн зүгээс хийсэн хамгийн том алхмуудын нэг нь энэ байсан бөгөөд OpenAI-тай хийсэн тус гэрээ нь Apple-ийг шинэ түвшинд хүргэнэ гэж компаний удирдлагууд итгэж байсан аж.

Гэхдээ Хятад улс бол эдгээр хиймэл оюун ухаант технологийн хэрэглээг дотооддоо зохицуулсан дэлхийн анхны орнуудын нэг юм. Өнгөрсөн оны 8-р сард Хятадын Кибер орон зайн алба энэ салбарт шинэ удирдамж гаргаж, Хятадын нутаг дэвсгэр дээр кибер компаниудыг байршуулахаас өмнө зөвшөөрөл авахыг шаардсан байна. Тус байгууллага өнгөрсөн 3-р сарын байдлаар 100 гаруй хиймэл оюун ухааны загварыг баталсан бөгөөд эдгээр нь бүгд Хятадын компаниудынх юм. Apple компани шинэ бүтээгдэхүүнээ ирэх 9-р сард худалдаанд гаргахаас өмнө, хамтран ажиллах Хятадын хиймэл оюун ухааны компанийг хайж байгаа ч одоогоор тохиролцоонд хүрээгүй байна гэсэн мэдээг энэ пүрэв гарагт Wall Street Journal сэтгүүл мэдээллэжээ.

Зах зээлийн судалгааны IDC фирмийн мэдээлснээр Хятадад iPhone гар утасны борлуулалт огцом буурсантай холбоотой Apple-ийн ухаалаг утасны борлуулалт энэ оны эхний улиралд 10%-иар унасан байна. Дашрамд хэлэхэд Хятад улс бол тус компаний хоёр дахь том зах зээл юм.

 

Эх сурвалж: CNN