Төр нийгмийн зүтгэлтэн Г.Батхүү агсан өнгөрсөн оны тавдугаар сарын 17-нд Төрийн ордонд таалал төгссөн билээ. Уг хэргийг одоогоор хуулийн байгууллагаас шалгаж байгаа юм. Энэ асуудлаар талийгаачийн гэр бүлийнхэн анх удаа хэвлэлийнхэнд хандаж мэдээлэл хийв. Талийгаачийн хүү Б.Ганхөлөг, Б.Цэлмэг болон өмгөөлөгч Ж.Батхуяг нар мэдээлэл өглөө.
Энэ үеэр өмгөөлөгч Ж.Батхуяг "Хэрэг шийдвэрлэгдэхгүй найман сарын хугацаа өнгөрлөө. Энэ хугацаанд хэрэг хаагдлаа, гаднын нөлөөгүй амиа алдсан гэх мэт мэдээллүүд хөвөрсөн. Сүүлийн үед хэргийг улстөржүүлэх, улс төрийн байдлаар ашиглах зорилго ажиглагдаж байна. Тиймээс өөрсдөдөө байгаа үнэн зөв мэдээллийг хүргэхээр мэдээлэл хийж байна. Нэгдүгээрт, шүүх эмнэлгийн шинжээчдийн багийн дүгнэлт гарсан. Дүгнэлтийг дэлгэрэнгүй унших боломжгүй. Анхаарал татсан хэдэн зүйлийг уншъя. Дүгнэлтэд талийгаачийн баруун нүдний чиглэлд хүч үйлчилснээр зовхинд цус хуралт, ухархайн дээд ханын хугарал үүссэн гэж байгаа юм. Хүзүүний зүүн хажууд 7х0.5 сантиметрийн улайлт үүссэн гэсэн байна. Энэ бол боолтын улмаас үүсэж болдог улайлт. Хэвлэл мэдээллээр талийгаачийг өвчний улмаас ухаан алдаж, цус харвасан гэж мэдээлж байсан. Задлан шинжилгээний дүгнэлтээр өвчний улмаас цус харваагүй. Гэмтлийн гаралтай цус харвалт тархинд үүссэн гэсэн дүгнэлт гарсан. Шүүх эмнэлгийн дүгнэлтийн хувьд ийм байна.
Дараа нь УИХ-ын нэр бүхий гишүүнээс үнэн худлыг шалгадаг багажаар тест авсан байна. Дүгнэлтээр асуусан асуултад хариулахдаа сэтгэл санааны хувьд гэм буруугийн түгшүүрийн мэдрэмж өндөр гэж гарсан байгаа юм.
Мөн хэргийн газрыг шалгах явцад талийгаачийн гар утсыг хураан авсан байдаг. Гар утсыг хурааж аваад үзлэг шинжилгээ хийгээд хохирогчид хүлээлгэж өгсөн. Хохирогч шинжилгээний дүгнэлтийг үзэхэд гар утсанд ямар нэгэн мэдээлэл байгаагүй. Үйлдвэрээс гарсан шинэ утас шиг байдалтай байсан. Шинжилгээний дүгнэлтээр ч гар утсанд ямар нэгэн мэдээлэл байхгүй, мэдээллийг сэргээх боломжгүй байна гэсэн дүгнэлт гарсан.
Хэргийг шалгах явцад талийгаачийн ар гэрийнхэн рүү нэр бүхий этгээд мессеж бичсэн. Хэргийн талаар "Би хэргийг харсан. Надад 13 секунтын бичлэг байгаа" гэсэн. Энэ мэдээллийг шалгах явцад нэг хүн тогтоогдсон. Тэр хүн одоо би мэдэхгүй, хараагүй гээд өөр хэрэгт шалгагдаж байгаа юм билээ. Цагдаагийн байгууллагаас шалгаж байгаа юм билээ. Мөрдөн шалгах ажиллагааны явцад янз бүрийн асуудал байсан. Ялангуяа шүүх эмнэлэг байна. Задлан шинжилгээний явцад талийгаачийн ар гэрийнхэн МRI аппаратад оруулъя гэхэд шүүх эмнэлгийнхэн хүлээж аваагүй. Шинжилгээний явцад онош, шинжилгээг дутуу хийсэн нь тогтоогдсон.
Цагдаагийн байгууллага шинжээч томилохдоо эхлээд гар утсан дээр хурууны хээ байна уу, үгүй юү гэдгийг тогтоох ёстой байсан. Гэвч шууд дотор нь юу байсан бэ гэдгийг шалгахаар шинжээч томилсон. Иймэрхүү эргэлзээтэй асуудлууд байна” гэсэн юм.
Хүү Г.Ганхөлөг "Найман сарын хугацаанд бид маш тэвчээртэй хүлээж, ажиглаж суулаа. Бид хүндхэн өдрүүдийг туулж байна. Өвөө, эмээ, ээж минь байна. Хамгийн хэцүү нь дөрвөн настай бага дүү маань хоол идэхгүй, ярихгүй хэцүү байдалтай байна. Найман сарын өмнө бидэнд маш том хар толбо үлдээсэн өдөр байлаа. Ийм өдөр болно гэж хэзээ ч төсөөлж байсангүй. Аав маань Төрийн ордонд ажлын хэсгийн хуралтай гээд явсан. Төрийн тусгай хамгаалалттай газар руу өдрийн цагаар орсон. Буцаж гарч ирээгүй. Өндрөөс унасан л гээд байгаа юм. Энэ бол яалт ч үгүй гаднын нөлөөтэй. Баруун нүд нь хөхөрч хавдсан, хүзүү нь улайсан байдалтай байсан. Зүүн талаараа унасан гэсэн боловч унаагүй талын нүд нь хөхөрч хавдсан байна. Хүзүүний улайлт бол заамдалцсаны шинж шүү дээ. Бид ямар нийгэмд амьдарч байна вэ. Төр нийгмийн зүтгэлтэн, Засгийн газрын гишүүн, УИХ-ын гишүүн хийж байсан хүн Төрийн ордонд нас барлаа. Жирийн иргэдэд амьд явах баталгаа байна уу. Бидний хувьд өнгөрсөн найман сарын хугацаанд маш хүнд байна. Аавыгаа санаж байна. Хуулийн байгууллага аавын минь амь насаа алдсан хэргийг шударга шийдвэрлэнэ гэдэгт итгэж байна” гэсэн юм.
Охин Г.Цэлмэг "Аавыгаа маш их санаж, үгүйлж байна. Эмээ, өвөө маань аавын маань зурагны өмнө олон цагаар сууж, залбирч байна. Ээж минь насаараа ханилсан ханиа алдаж, шимширч байна. Дөрвөн настай дүү маань аавыгаа нэхэж, хоолоо ч идэхгүй байна. Бид аавынхаа амийг нэхэх болно. Шударга ёсны төлөө тэмцэх болно” гэлээ.