Японы Байгаль орчны яам ургамлын гаралтай материалаар хурдан автомашин бүтээснээ танилцуулсан тухай "Motor1” цахим хуудсанд мэдээлжээ.

"Японы эрдэмтэд манай гарагийг хог хаягдлаас цэвэрлэх асуудалд өөр өнцгөөс хандахаар шийджээ. Тус улсын Байгаль орчны яамны танилцуулсан "Nano Cellulose Vehicle” (NCV) гэх нэртэй тээврийн хэрэгслийг үнэхээр модоор өөрөөр хэлбэл ургамлын гаралтай материалаар /наноцеллюлозын мяндас/ бүтээжээ” гэж дээрх цахим хуудсанд гарсан мэдээлэлд дурдсан байна.

Энэ материалыг үйлдвэрлэхэд мод болон хөдөө аж ахуйн хог хаягдлыг хоёуланг нь ашиглаж болдог гэнэ. Шинэ материал нь гангаас тав дахин хөнгөн бөгөөд бат бөх юм байна. Байгаль орчинд үзүүлэх ашиг тусынх нь хувьд ийм материалаар бүтээсэн харьцангуй хөнгөн автомашин нь хэрэв дотоод шаталтын хөдөлгүүртэй бол бага түлш зарцуулах бөгөөд харин цахилгаан хөдөлгүүр ашиглавал илүү их цэнэг хураадаг байна.

Үүнээс гадна, наноцеллюлозын мяндсыг өргөнөөр хэрэглэх нь уламжлалт автомашин үйлдвэрлэх үед агаар мандалд хаягддаг нүүрстөрөгчийн хэмжээг ихээхэн бууруулна гэж эрдэмтэд үзэж байгаа аж.