Японд хүлэмжийн хийн ялгарал 2020 оны санхүүгийн жилд долоо дахь жилдээ дараалан буурч, түүхэн доод үзүүлэлтэд хүрсэн нь "COVID-19” цар тахлын улмаас эдийн засгийн үйл ажиллагаа сааран компаниудын эрчим хүчний хэрэглээ буурсныг харуулжээ.
Тодруулбал, 2021 оны гуравдугаар сар хүртэлх санхүүгийн жилд 1.149 тэрбум тонн нүүрстөрөгчийн давхар исэл ялгарсан нь өмнөх оныхоос 5.1 хувиар буурсан үзүүлэлт болсны сацуу 2019 онд бүртгэгдээд байсан хамгийн бага үзүүлэлтийг шинэчиллээ гэж Байгаль орчны яам мэдээлсэн байна.
Мөн 2020 оны санхүүгийн жилийн үзүүлэлтийг 2013 оныхтой харьцуулахад 18.4 хувиар буурсан ч 2030 он гэхэд 46 хувиар бууруулахад ихээхэн хүчин чармайлт хэрэгтэй байна. Энэхүү шинэ зорилтыг Японы Засгийн газар НҮБ-д 10 дугаар сард хүргүүлсэн билээ. Өмнө нь тус улс 2030 он гэхэд 2013 оныхоос 26 хувиар бууруулахаар төлөвлөж байжээ.
2020 оны санхүүгжийн жилд аж үйлдвэрийн салбараас ялгарах CO2-ын хэмжээ өмнөх оныхоос 8.3 хувиар буурсан бол тээвэр, үйлчилгээний салбарынх тус бүр 10.2, 4.1 хувиар буурсан байна. Харин коронавирусний цар тахлын улмаас иргэд цахимаар ажиллах, сурах болсноор өрхөөс ялгарах хийн хэмжээ 4.9 хувиар өсжээ.