Эрүүл мэндийн яамнаас урд хөршид тархаад буй шинэ төрлийн коронавирусын халдварын нөхцөл байдал, урьдчилан сэргийлэхээр хэрэгжүүлж буй ажлуудын талаар ээлжит мэдээллийг хийж байна.
ЭМЯ-ны Нийгмийн эрүүл мэндийн газрын дарга Д.Нарангэрэл: "Шинэ коронавирусын халдвар нэмэгдсээр байна. Сүүлийн өдрүүдэд олон улсын эрдэмтэд судалгаа шинжилгээний ажлаа эрчимжүүлж, шинэ дүгнэлт, мэдээллүүд гаргаад байгаа. Тухайлбал, халдвар авсан нэг хүн дунджаар 5-6 хүнд халдвар тараах магадлалтай гэж судалгааны материалд дурдсан. Түүнчлэн өвчний нууц үе буюу 2-14 хоногт ямар нэгэн шинж тэмдэггүйгээр ойр тойрны хүмүүст халдвар тараах магадлалтай гэж үзсэн байна. ДЭМБ-ын ерөнхий захирал хэлэхдээ коронавирусын халдварын тархалт бол зөвхөн мөсөн уулын орой байж магадгүй тул сонор сэрэмжтэй байхыг анхааруулсан.
Дараагийн нэг асуудал бол амны хаалтны хомсдол үүсээд байгаа. Зарим улсад амны хаалт, хувийн хамгаалах хэрэгслийг ихээр нөөцөлбөл хүлээлгэх хуулийн хариуцлагыг тодорхойлоод байна. Тиймээс иргэд үүнийг анхаарах хэрэгтэй. Үйлдвэрлэгч улсад амны хаалтны хомсдол үүссэн ч бид дотооддоо үйлдвэрлэсэн хэвээр байх болно.” гэсэн юм.
Дэлхийн эрүүл мэндийн байгууллагын мэргэжилтэн О.Ариунтуяа: "Өнөөдрийн байдлаар 43099 тохиолдол бүртгэгдэж, 1018 хүн нас барлаа. Нэгдүгээр сарын 06-наас хойш ЭМЯ, ОБЕГ, МХЕГ хамтран дөрвөн удаагийн эрсдлийн үнэлгээ хийж, эрсдлийг бууруулах ажлыг зохион байгуулсаар байна.
Шинэ коронавирусын халдварын тархалтын байдалд дүн шинжилгээ хийхэд дэгдэлт өндөр байна. Шинжилгээгээр тогтоогдсоноос гадна сэжигтэй тохиолдол хэдэн мянга бий. Энэ бол хэдхэн хоногт буурах төлөвтэй халдвар биш.
Өмнөх туршлагуудаас харахад вирусын тархалт 2-4 сар үргэлжилж байсан. Шинэ коронавирусын эмчилгээний тухайд өвөрмөц эмчилгээ байхгүй, эмнэлзүйн эмчилгээнүүдийг хийсээр байгаа. Тухайлбал, амьсгал дэмжих, хүчилтөрөгч өгөх гэх мэт арга хэмжээнүүдийг хэрэгжүүлж байна. Тиймээс иргэд урьдчилан сэргийлэх арга хэмжээ авч амны хаалт зүүх, олон нийтийн газраар явахгүй байх нь зүйтэй.
Энэ долоо хоногт эмнэлгийн халдвараас сэргийлэх үүднээс эмнэлгийн байгууллагуудад танхимын сургалт зохион байгуулж байгаа. Мөн энэ долоо хоногт 3000 оношлуур нэмж ирэхээр болсон бөгөөд эхний ээлжний 500 ширхэг тест оношлуур өнөөдөр ирж байгаа юм.” гэлээ.